《阿鳳姨ê五度ê空間》

愛麗絲ê頷頸á

作者 A-hong-î...漢羅翻寫Aheng

br>A-lí-suh ê ām-kún-á tn̂g-.khit-.lâi,
愛麗絲ê頷頸á長起來，
Thâu-khak kôan-kôan, chhin-chhiūⁿ kî-lîn-lo̍k,
頭殼高高，親像kî-lîn-lo̍k，
Tham-thâu boeh kah chiáu-á kóng-ōe,
Tham頭boeh kah鳥á講話，
Chiáu-á poe-liáu-liáu.
鳥á飛了了。
A-lí-suh ām-kún-á oan-oan, chhin-chhiūⁿ gô,
愛麗絲頷頸á彎彎，親像鵝，
Àⁿ-thâu boeh kah gín-á kóng-ōe,
Àⁿ頭boeh kah gín-á講話，
Gín-á cháu-liáu-liáu.
Gín-á走了了。
A-lí-suh kám-kak-tio̍h chin bô-liâu,
愛麗絲感覺tio̍h真無聊，
Tó-lo̍h-khì chhiū-á-kha khùn,
倒落去樹á腳睏，
Ām-kún-á chhiūⁿ chôa, khûn kui khûn.
頷頸á像蛇，khûn歸khûn。