《台灣之愛:盧俊義牧會筆記》

| | | 轉寄

父母生活若是端正

有一位日本基督徒醫療傳道協會ê宣教師宮崎亮醫師,東京帝國大學醫學院畢業,bat tī法國kap德國受過嚴格ê醫學訓練,伊志願加入醫療傳道服務隊ê行列,tī一九七一年受差派到非洲ê奈及利亞。日夜無閒工作一年了後,就因為積勞過度而患肺結核病被送回日本就醫。經過五年ê休養,chit段期間有親友替伊紹介婚姻ê對象,伊並無甚麼特別ê條件,只表示kap伊結婚就必須kap伊去非洲。這ná親像當年建造烏山頭水庫ê八田與一工程師仝款,也是要求beh kap伊結婚ê人必須隨伊到台灣來chiah ē-tàng,結果有一位非常賢淑ê女子主動示愛而嫁hō͘伊,婚後in就繼續準備前往非洲投入醫療傳道ê工作。Tī chit段五年ê時間內,宮崎亮醫師也tńg去母校東京醫大,也到法國、美國等地進修,接受koh-khah好ê「全科」醫師訓練,上帝賜hō͘ in兩個gín-á,當時一個三歲、一個一歲。

一直存有非常堅強獻身使命感beh前往非洲工作ê宮崎亮醫師,平日教導bó͘-kiáⁿ認識非洲,kā in講非洲ê súi kap人民ê純樸,以及生活上ê各種細節。婚後ê in,並無添置甚麼家具用品,物質生活非常簡單,出門lóng是āiⁿ幼小ê gín-á行路,扛背包,帶水、食物,每tú-tio̍h假日就全家同齊到鄉村去徒步遠足、野餐。Tú開始ê時,大家lóng認為宮崎亮醫師會因為gín-á漸漸長大,而放棄前往非洲ê念頭。但是chiah-ê親友卻看tio̍h伊夫妻jú積極teh準備,直到in準備就緒並決定beh koh再前往非洲奈及利亞ê時chūn,差不多所有ê親友lóng出來反對,大家lóng極力苦勸in mài去。

因為宮崎亮醫師擁有相當完整ê醫療訓練,而且被日本醫界評鑑是一個相當優秀ê醫療工作者。因此,chiah-ê親朋好友目chiu金金看無法度阻止宮崎亮醫師ê時,in也設法動用伊ê醫學院教授出來遊說伊,希望伊會留tī國內從事臨床教學ê工作,大家lóng講出所有可能造成動搖伊意志ê話,講甚麼留tī日本大有前途;thang訓練koh-khah chē有心ê年輕人去;人應該ài完成koh-khah大ê理想;幫助非洲人也無一定to̍h ài親自去、日本也真需要ah……等等,類似動聽ê話語真chē,但lóng無法度hō͘宮崎亮醫師回心轉意,反tńg hō͘ in夫婦koh-khah堅定信心,堅持原有ê理想kap獻身ê使命感。最後大家只好請一開始就一直保持緘默ê宮崎亮醫師ê父母出來kā伊講,但伊ê父母知影宮崎亮醫師ê心意,並無加講甚麼,只簡短講了chit句話︰「就算lín無為家己設想,也該想看lín ê gín-á,大ê目前已經三歲,koh過幾年就beh去學校了。Tī非洲,gín-á beh受教育就是一個極大ê問題,tī hit-pêng各種設備lóng差日本真chē,lín有無想過gín-á以後受教育ê問題?」 宮崎亮醫師聽完了後,並無加講甚麼,只是淡淡引用bat是基督教內地會有一位美國籍宣教師,bat tī一九二○年代派駐tī中國傳福音時所講過ê一句話︰「父母行為若是端正,gín-á ê教育就已經完成一半,其餘ê,已經m̄是最重要ê lah。」宮崎亮醫師ê chit句話tú好講出伊父母對伊一生ê影響,了後伊就帶bó͘-kiáⁿ快快樂樂再次前往非洲奈及利亞行醫傳道。

這確實是一句箴言,thang用tī家庭生活中ê父母,也thang用tī事業機構主管ê身上,而用tī政治領導階層者ê身上koh-khah是真適合,當然用tī教育工作者身上,則是無比這khah好ê lah。

講究學歷至上、升學第一ê台灣教育,已經有jú來jú惡質化ê趨勢,就是學歷jú高,知識型ê犯罪率也跟tòe升高,見笑感相對日漸淡薄,責任心jú來也jú低落。大家講究ê就是比學歷,展寶ê就是比收入chē少,充滿虛榮心,甚至瀰漫了整個社會,套一句街頭巷尾經常聽tio̍h ê「笑貧不笑娼」chit句話,來形容咱台灣社會,真正是án-ne。但mài bē記得,若繼續án-ne落去,有一工,咱lóng會是最大ê受害者。

所有ê教育,就是tùi父母開始,因為父母就是gín-á學習siōng好ê一面鏡子kap教科書。即使社會上一直迷信「名師出高徒」,其實真正siōng好ê「名師」就是父母家己。因為真實活出正確模樣ê父母,就是siōng好ê因材施教之師,chiah會培養出siōng正經ê gín-á。無chit種ê認識,即使擁有高ê學歷、萬貫家財、顯赫ê社會地位,也是枉然ah﹗ (原載於自由時報2004年6月6日第15頁)

盧俊義牧師的個人網站。