《台灣之愛:盧俊義牧會筆記》

| | | 轉寄

愛,就是生命ê力量

Tī日本東京「代代木」附近,有一間取名「中華拉麵」ê店,是一位tùi台灣移民去ê陳先生夫婦所開ê。Tī一九八五年得tio̍h日本政府hō͘ in頒獎,以感謝伊對日本腦性麻痺gín-á ê照顧。

陳先生夫婦兩人所開chit間拉麵店,lóng是聘僱腦性麻痺ê青少年子弟,in tùi最基本ê「歡迎光臨」開始,到顧客離開時ê「多謝光臨」,lóng是親自調教。In非常用心一而再、再而三教導chiah-ê gín-á,並且用最簡單ê三種無仝ê碗,hō͘ chiah-ê gín-á知影如何辨識價錢,也學會曉怎樣找錢hō͘顧客。每工無嫌費氣教導chiah-ê gín-á怎樣tùi顧客手中接過錢、找錢、洗碗、拭桌á,怎樣面帶微笑來招呼顧客、送顧客、清理店鋪等等。In也tī店內準備了kúi-nā套清氣ê衫褲,以備chiah-ê腦性麻痺ê店員一無小心,將熱phut-phut ê麵湯溢出濺(chōaⁿ)tio̍h顧客ê身上時,thang hō͘顧客作更換之用,然後再kā chiah-ê被濺污ê衫褲送去洗衣店清洗清氣,送還hō͘顧客。伊教in會曉怎樣kā清洗清氣ê衫褲送還到顧客ê厝去,也教chiah-ê gín-á怎樣向顧客賠m̄是ê禮貌。

兩年一個梯次,in夫婦kap東京地區專門收chit種需要「啟智」教育之學生ê學校搭配,訓練chiah-ê腦性麻痺ê gín-á培養自尊心,教in學會曉怎樣過自立生活ê技能。媒體記者發現了後,tī報紙上紹介chit間拉麵店ê陳先生夫婦,日本政府特別頒獎hō͘ in,以感念in ê愛心。顧客知影了後,大家紛紛相招去捧場,並且kā in感謝,同時也為chiah-ê gín-á加油、鼓勵,拉麵ê seng-lí是jú來jú好。

一九八六年九月二十日禮拜六下晡二點半,我kap阮bó͘被帶到chit間拉麵店去kap chit位陳先生夫婦認識。阮談起in聘僱chiah-ê腦性麻痺ê gín-á做員工ê經過,當阮teh o-ló in ê愛心時,陳先生卻是án-ne kā我講︰「其實,阮並m̄是做偉大ê事,阮只不過是將gín-á原本應有ê『上帝形象』擦亮,hō͘上帝ê形象顯明出來而已。」阮聽了後,深受感動。

陳先生夫婦ê話真清楚,上帝創造人ê時chūn,用伊ê形象來造人,原本這形象是美麗ê、良善ê。但咱卻kā chiah-ê原本美麗ê形象kā伊污穢了,致到有真chē gín-á出生了後,tī成長過程中,因為咱ê無小心,hō͘ in原本美麗ê形象無辜kā伊chhòng lâ-sâm去。

其實,咱台灣社會原本是美麗、可愛、純樸ê,只要咱能加盡一份心力kā in拭,就會hō͘原本上帝創造咱台灣chit塊島嶼時ê súi,顯露出koh-khah chē光彩豔麗ê圖案(形象)tī國際社會ê面前,hō͘國際媒體記者會歡喜報導咱ê súi,看tio̍h咱社會可愛而且豐富多彩ê生活樣式,án-ne,咱ê兒女kap下一代子孫就會看tio̍h koh-khah chē咱chit一代ê用心,以及tī辛苦奮鬥kap努力後,所留落來ê堅忍而且深刻腳印。Á這是需要咱付出koh-khah chē ê愛tī chit塊土地上。也只有án-ne,咱chiah會活得有尊嚴,並感受tio̍h國際社會對咱ê尊重kap榮耀。

愛,就是生命ê力量,á這力量就是tùi欣賞kap鼓勵開始。 (原載於自由時報2003年11月23日第19頁)

盧俊義牧師的個人網站。