《台灣之愛：盧俊義牧會筆記》

| | | 轉寄

活出有尊嚴ê生命

作者 盧俊義...台語翻譯: Chuniok 2005.08.21

已經過往ê前台北濟南基督長老教會牧會牧師許鴻謨，退休後移民到加拿大去定居。因為年紀已超過七十歲，因此，得tio̍h加拿大政府發hō͘ ê老人生活金。每年暑假，伊lóng會利用làng縫tńg來台灣探訪一kóa親朋好友。每pái beh tńg來台灣ê前，伊lóng會khà電話到移民局去向官員報告講︰「真失禮，我將有兩個月ê時間無tī加拿大，我beh tńg去台灣故鄉探望親友。Tī hit-pêng，我ê親友ē-tàng提供我生活需要。因此，請m̄免寄錢hō͘我。」

加拿大移民局官員tú開始聽tio̍h án-ne ê電話，總是感覺怪怪，怎樣會有chit種tùi台灣來ê移民者？起先真正認為he只不過是「老人現象」ê一種，並無當作一回事。

許鴻謨牧師tńg來台灣兩個月了後，九月初再次tńg去加拿大。Tī安置好行李了後，伊就隨時khà電話hō͘移民局官員，向in報告家己已經tńg來了，並且也會將tī台灣所tú-tio̍h ê趣味事kap hiah-ê官員分享一下，然後特別再次提醒一pái移民局官員，講m̄免補寄七、八兩個月ê養老金hō͘伊。

Án-ne ê態度hō͘ hiah-ê官員感覺真意外，連續三年了後，in開始認真注意tio̍h án-ne ê一位台灣移民。有一pái移民局官員koh接tio̍h許牧師報告beh tńg去台灣度假ê電話，就趕緊轉hō͘局長接聽，局長就問許牧師，怎會有án-ne ê想法？許鴻謨牧師講︰「我無tī chit-ê國家khiā起，就不配接受chit-ê國家ê福利。」局長聽了後真是感動，講伊是最優秀ê台灣來ê移民。

每年許鴻謨牧師往回台灣、加拿大，伊lóng是án-ne做。加拿大移民局官員每pái接tio̍h伊ê電話，lóng用非常客氣ê語句祝福伊有一個美好ê假期。也因為伊hiah-nih美好ê表現，後來加拿大政府tī討論台灣移民事宜ê時，移民局代表就bat講過án-ne令人感動ê話︰「所有移民當中，台灣人ê品格siōng好。」Chit段故事chiah被傳揚開來。

最近我去南部，回途去車站買車票ê時，tú-tio̍h一對夫妻tú-teh看壁頂ê時刻表，然後tùi錢袋the̍h錢準備買in看準ê班車，行向窗口beh買票。我聽tio̍h chit對夫妻有án-ne ê對話︰

Bó͘講︰「來，身分證the̍h去，咱ē-tàng買老人優待票，khah便宜。」

丈夫講︰「Chhòng啥beh買老人票？咱身體iáu hiah-nih勇壯，一點á lóng無像(sêng)老人。何況咱ê心lóng iáu真年輕。老人票hō͘ hiah-ê真正老ê人買pah﹗」

Bó͘一聽感覺也tio̍h，就順口講︰「老公，án-ne就買全票pah。」講leh就kā身分證khǹg tńg去皮包內。

我聽tio̍h了後感覺真gōng-gia̍h，就向前問chit對夫妻講︰「He是lín ē-tàng享受ê福利ah，為什麼m̄免neh？」

Chit位bó͘緩緩á講︰「國家福利也m̄是憑空來ê，he是全國人民努力辛苦累積起來ê。如果大家lóng會珍惜，án-ne，真正需要幫助ê人就ē-tàng加得tio̍h一kóa照顧。」

我聽了後深受感動，對chit對夫妻加倍尊敬。看tio̍h in恩愛ê背後身影，我有講bōe出ê感動kap感觸。

咱有真chē退役將校軍官、退休公教人員。早已經去外國kap兒女同齊khiā起生活，而且有當地國民ê身分，享有該國政府發hō͘ in ê福利金或是老人生活金，但chit邊卻iáu一直領政府發hō͘伊ê「月退俸」。然後，每pái破病ê時，就趕快tńg來chia享受tio̍h全民健保，kap人事上特別ê「詳細看診」特權。

像許鴻謨牧師án-ne ê人若是加一kóa，咱tī世界各地無論去toh位lóng會受tio̍h歡迎，也會得tio̍h當地人民ê尊敬。像chit對年老ê夫妻若加一kóa，就bē有健保短缺、老人年金不足過安養生活ê事發生，á hiah-ê確實需要幫助ê人就能得tio̍h koh-khah周全ê照顧。án-ne ê社會離伊甸園就無遠loh﹗

一個社會若beh和諧，必須人民知影知足kap誠實，否則儘管擁有萬貫家財，生活也bē快樂，khiā起環境也bē有祥和ê氣氛。á咱社會最缺乏ê，tú好就是chit種知足kap誠實ê心。 （華文原載於自由ê時報2003年12月14日第15頁)

盧俊義牧師的個人網站。