《台灣之愛:盧俊義牧會筆記》

| | | 轉寄

頭一pái長途、長時間出國訪問

七月十七日上午八點四十五分,悅文特別請假半工,由東元開車,姿尹陪伴之下,送我kap淑英去桃園機場,teh辦手續ê時,東元發現阮來台灣機票ê時間kap電腦時間無符合,悅文趕緊去聯合航空接洽,東元mā協助,但因為是旅行社ê têng-tâⁿ,tī機票上phah錯時間,因此,每張票tio̍h付出二千八百元ê更改費用,兩張共加付出五千六百元,原因是阮買ê是套票,m̄是單純ê美國kap台灣ê機票。

Kā手續辦好,the̍h-tio̍h koh-khah tú好ê電子票,我帶in祈禱,並祝福in,互相告辭了後,就án-ne踏上chit段長達二個月koh二工ê出國訪問kap演講行程,距離頂pái一九九二年七到八月,我個人tī美國、加拿大有六個禮拜ê訪問、演講,相隔十五年。

Chit-pái要訪問ê所在包括美國舊金山、密西根、加拿大溫哥華、阿根廷、巴拉圭、巴西等地ê台灣人教會。南美ê行程是阮第一pái去,原本是巴西大安教會邀請我去演講,後來總會傳道幹事林芳仲牧師知影了後,mā請我ē-tàng順續去阿根廷、巴拉圭去訪問一下當地台灣人教會。

六月十四日開始,美國聯合航空koh恢復直飛台美ê航線,這thang節省tī日本停留二點鐘ê時間。

阮tī七月十七日上午八點二十五分來到舊金山機場,所有外國旅客入境lóng必須印雙手十指指印,以及照目睭瞳孔。行出海關,就看見江根樹兄高舉tio̍h雙手招呼阮,伊特別來,是驚阮theh8siuN重ê行李。Á好友許宗宏ê阿姊──許雅正姊mā在場teh thèng候,阮是tòa tī雅正姊ê厝。

七月十八日暗時,第一場演講是tī舊金山聖荷西(San Jose)台美長老教會,he是宗宏tī我出國前臨時安排ê。In tī七月十五日主日禮拜ê時通知會友chit件事,伊ài我kā-in講怎樣讀聖經,hit暗約有三十人出席,這是in教會目前主日禮拜人數七十名ê半數。演講一直到暗時九點半chiah結束。

有真chē-pái,宗宏lóng ài我來舊金山ê時去tòa in-tau,伊kap in bó͘美音會帶我去爬山、釣魚,chit-pái因為伊已經搬到離舊金山約四點鐘車程ê鄉村去,因此,由in阿姊雅正接待阮。伊是kap翁婿連日昌先生tī一九六八年ê時到美國讀冊,cha-bó͘-kiáⁿ Cindy將kap中研院ê游正博兄ê kiáⁿ兒Tim結婚,來結為親家。直到七月二十二日暗時,阮分享了雅正姊講述chit四十年來in tī海外生活、求學,以及參與台灣獨立運動ê各種經歷,特別是tī hiah-ni̍h無閒ê時間中,in m̄-bat放棄事奉福音事工ê機會,宗宏是參與蔡鈴真牧師(現任台神行政副院長)開拓台美教會ê重要幹部之一。

七月十九日,宗宏特別向公司請假兩工,kap美音、雅正姊,阮一陣五人由宗宏開三個gōa點鐘ê車,往Pinecrest湖去度假。這是深山山頂ê公園,真正是有山有水,景色相當美麗。阮tòa tī小木屋,宗宏mā履行了伊boeh教我釣魚技巧ê承諾,只可惜二個日時頭,我lóng無啥收成,伊mā只釣tio̍h一尾鱒魚。Tī chia確實是度假,真愉快。

七月二十一日下晡,阮落山tńg到厝。我接續弓ân心神準備七月二十二日上午ê主日講道kap下晡對灣區台灣同鄉ê演講。

七月二十二日主日禮拜是tī舊金山迦南教會講道,tī-hia tú-tio̍h劉營義兄ê cha-bó͘-kiáⁿ kap蕭信昭姊ê cha-bó͘-kiáⁿ。Á黃三郎兄夫婦mā特別由中半島過來chia,kap阮同齊聚會。因為二年前我bat受邀請專程來演講三工五場,因此in大部分lóng主動詢問、關心我頷頸ê傷勢。下晡三點由同鄉會主辦一場專題演講,我hō͘ in ê題目是「投入生命之愛,chiah有生命生機」,我講述台灣幾則小故事,提醒同鄉mài kā關心台灣ê焦點,lóng khǹg tī政治層面上,加khǹg-kóa心tī人文題材,就會看tio̍h生命tī苦難中ê意義,因為二年前ê演講bat引起極大共鳴,chit-pái演講kah-ná mā無意外,回應ê人相當熱烈。

迦南教會、聖荷西台美長老教會,目前lóng欠缺傳道者多年,這mā是海外台灣人教會,特別是長老教會所tú-tio̍h ê共同問題,mā ē-sái講是七○年代爭相出來北美ê傳道者留落來ê後遺症。目前tī美國洛杉磯、加拿大多倫多欠缺傳道者牧養ê教會真chē,三十、四十人一間教會ê情形真chē,ài chiah-ê教會合併並無容易,問題bē少。

七月二十九日我tī迦南教會iáu有一場主日禮拜,了後就會前往南美阿根廷、巴拉圭、巴西等地,進行長達一個月ê巡迴演講、培靈。

盧俊義牧師的個人網站。