《BONG報bong2選》

| | | 轉寄

北風koh 來挑戰日頭

頂一pái,北風kap 日頭sio 拚,結果北風無kā 路nih ê 人ê 衫褪落來,hō͘日頭贏去,伊感覺chiâⁿ m̄甘願,koh 來chhōe日頭挑戰。

北風:「日頭ah,你頂pái 用老奸步贏我,這pái 我一定beh 討tò-tńg來,你出題,咱koh來拚一pái。」

日頭看著北風a hèng-te-te,無beh chhek 北風ê 意,一頭koh 想beh 徹底phah 贏北風,就隨kā應好:「北風ah,你beh 輸幾pái chiah會甘願leh?Kah 你to 敢koh 來挑戰,好!這pái 我一定beh hō͘你輸kah 服服服。」

日頭想著北風頂pái 輸,是輸leh 無用頭殼,用力用m̄-tio̍h所在。這pái伊又koh 出一個難題hō͘北風lo͘h:「北風,你看頭前有一支電火柱á,咱來比siáng會tàng kā柱á ê 影chhiâu tín 動,koh 愈chhiâu 愈長,好無?」

北風:「好a,kah 是你出題ê,我就無客氣beh 開始a o͘。」

日頭:「Mh,好a,m̄-koh 你mā仝款愛保持風度o͘。」

日頭出這個題了後,tī 邊á 暗暗á 偷笑,想講穩贏ê:「Hi..hi..hi..」

北風leh?北風這pái kám koh會kap頂一pái仝款,中計失敗leh?

北風「hù-ù. . .hù-ù. . .hù-ù. . .」He 影nah會吹bē tín 動leh?怪奇,怪奇a,tio̍h a,愛吹電火柱á chiah tio̍h。

日頭:「有進步,有進步,算你khiáu!M̄-koh 你beh按怎吹chiah會sái kā影吹hō͘長leh?He..he..he..你無法度lah。」

日頭知影beh hō͘影變長,kan-taⁿ伊chiah 有法度,真hiau-pai kā 北風chhiàng 聲。雖bóng 北風hō͘日頭án-ne 笑,m̄-koh伊無失志,繼續想辦法。

北風心內teh 想:「無論是吹影iah 是吹柱á,lóng 無法度hō͘影變長。是beh按怎leh?Ah,有ā!Ha...ha.. ha..日頭!看絕招!」

這個時chūn,頂pái 路過hit 個人lia̍h一隻雞á 又koh 行來,北風sái一下力,kā hit 隻雞á 吹去柱á 頂。

路人:「怪事tiāⁿ-tiāⁿ有,koh 是我tú著,雞ah,雞ah,雞á nah會飛去電火柱á 頂leh?」

北風:「He. . .he. . .我贏a,這pái 我贏a!影變長a!影變長a!」

日頭:「H–!北風,你免歡喜了siuⁿ 早,hit 隻雞á kan-taⁿ hō͘ 影變長一sut-á niâ,我會sái hō͘電火柱á ê 影加長幾nā 倍!」

日頭beh 趕緊落西,想beh hō͘柱á 影變長。

北風:「烏雲!烏雲!去kā日頭cha̍h起來!」

日頭:「Ah,我苦a!這聲輸thiám-thiám a,緊bih起來。」

就án-ne,日頭這pái 比輸koh m̄ 敢認輸,bih 幾nā 工lóng m̄敢出來。北風「一理通,萬理澈」,bē koh 烏白sái 力,後來就變做一個有力量koh 有智慧ê 風a。