《CTT出頭天園地》

 | | | 轉寄

思念所消失ê台灣農村生活 3

作者 Tiuⁿ Bí-lī 張美利 2006.01.15

br>
Kó͘-chui ê Cheng-siⁿ
古　錐　的　精　牲


Chhài-hn̂g-piⁿ--á ū chhī-ti, Pak-tó͘ teh iau ihN--ihN--ihN.
菜　園　邊　仔有　飼　豬,　　腹　肚　在　餓　嚶　嚶　嚶.

A-bú kōaⁿ-phun kín-lâi chhī, Ti -á chia̍h-kàu chin hoaⁿ-hí.
阿母　提　泔　緊　來　飼,　　豬　仔　吃　到　真　歡　喜.

Iô-bóe piáu-sī chiok móa-ì, Chi̍t-chiah chi̍t-chiah pûi-ihN-ihN.
搖　尾　表　示　足　滿　意,　　一　隻　一　隻　肥　嚶　嚶.

Ke-á ah-á móa-tiâⁿ sī, Sió-tī hū-chek kā in chhī.
雞　仔　鴨仔　滿　庭　是,　　小　弟　負　責　給　伊　飼.

Ki-ki ko̍k-ko̍k ûi sin-piⁿ, M̄-bat kui-kí gâu saⁿ-chiⁿ.
吱　吱　咯　咯　圍　身　邊,　　不　識　規　矩　賢　相　爭.

Ke-kak chia̍h-pá khui-siaⁿ thî, Ah-bó chhōa-kiáⁿ khì hî-tî.
公　雞　吃　飽　開　聲　啼,　　鴨　母　娶　子　去　魚　池.

Niau-á siōng ài chhńg hî-chhì, Àm-sî jīn-chin lia̍h niáu-chhí.
貓　仔　上　愛　舔　魚　刺,　　暗　時　認　真　掠　老　鼠.

Káu-á chīn-tiong chò kéng-pī, Chhù-chêng chhù-āu teh sûn-sī.
狗　仔　盡　忠　做　警　備,　　厝　前　厝　後　在　巡　視.

Tāi-ke bô-êng chò tāi-chì, Chiáu-chiah chhiū-téng gîm koa-si.
大　家　無　閒　做　代　誌,　　鳥　隻　樹　頂　吟　歌　詩.