《耶穌言行錄》

Sū

作者 Ko Kim-seng

Chit phō Sèng-chheh Kì-li̍ok,tùi Ê-mn̂g lâi,kàu taⁿ ū 60 gōa nî kú,40 gōa nî bô lâng koh ìn;ài tha̍k,bô tè thang bóe,sǹg sī cho̍at-pán,hòe chheh.Chì-hó pêng-íu,góa ê hū-jîn-lâng ū lâu 5 pún,khńg tī chheh-tû,góa bô sīuⁿ ōe koh ìn.

Sīu chheng-iok Sian-siⁿ ê bían-lē kóng," Ti̍oh ìn" ti̍oh kā she-sīa;tōng-ti̍oh góa ê cheng-sîn,lau-lâng chīu gōng-sīuⁿ,chē-the thèng-hāu sí,m̄-ta̍t-ti̍oh chòe hō͘ i sī khah-îaⁿ.Túi chiah ê chheh,lán to-síau thiam-pó͘,ōe-kù siu-sek lai koh ìn,ǹg-bāng thang pó͘ lán hīan-sî ê khìam-ēng;chheh mîa ōaⁿ sin,Sèng-keng Sóan-li̍ok（聖經選略）khah ha̍p pún-lâi ê ì-gī.

Sèng-keng chôan-phō ū hun Ku-iok kap Sin-iok. Chóng-sī túi pa̍t hong-bīn lâi khòaⁿ,īa sī nn̄g pō͘-hūn;chīu-sī le̍k-sú kap kà-sī.Kà-sī,ū pau-hâm ìau-lí kap lûn-lí.Ìau-lí,sī pài Sīong-tè lâng só͘ ti̍oh sìn ê.Lûn-lí,sī pài Sīong-tè lâng só͘ ti̍oh kîaⁿ ê.Lán ài bêng-pe̍k Sīong-tè ê kà-sū,ti̍oh tāi-seng ōe bat Sèng-keng lāi ê le̍k-sū;chīu lán ji̍p lé-pài-tn̂g thiaⁿ sian-siⁿ kóng tō-lí,á-sī ka-kī tha̍k Séng-keng,khah ōe líau-kái,khah ōe kì-sim,khah ōe khak-sìn,khah ōe ji̍at-thâu,khah ōe bat Sīong-tè,khah ōe thìaⁿ Sīong-tè.Sim-sîn phín-hēng ōe ji̍t-ji̍t ōaⁿ sin.In-ūi lí túi le̍k-sú ōe khòaⁿ-kìⁿ Sīong-tè ê kôan-lêng,tì-hūi,kong-gī,thìaⁿ-thàng,kap kî-thaⁿ chíong-chíong ê kiat-kó.Sèng-keng Sóan-li̍ok chīu-sī ūi-ti̍oh téng-bīn só͘ kóng ê lí-îu,lōe-îong chiah pâi-li̍at móa-móa kán-tan ê le̍k-sú,sī ài chān lan2chiap-sīu Sīong-tè ê chin-lí.

Lán khòaⁿ chheh ê chè-pún bô tâng,lōe-îong chó͘-chit koh-īuⁿ,chīu chai m̄-sī chi̍t lâng tù ê,in bô sîang sî-chūn.Chí-ū chi̍t pún sía Táⁿ-má-jī Ko͘-nîu,kî-û lóng bô mîa.Siat-sú in nā íau o̍ah tī sè-kan,káⁿ ū 100 gōa hè.Tùi chiah ê tù-chok,ū hían-bêng in ê lô-khó͘ kap thìaⁿ Chú,in ū tì-hūi kap thìaⁿ lâng.Lán ti̍oh sìau-līam in,kā in seh-sīa.Koh-khah ti̍oh kám-sīa ê,chīu-sī Sīong-tè,I pang-chān chêng ê lâng chai chhíu,āu ê lâng tit ìm-ńg,chi̍ah ké-chí.

Chheh,taⁿ chhut-pán,si̍t-chāi chhin-chhīuⁿ hé-chhia,kū sòaⁿ-lō͘ Chài siu-lí,chhia-tâi lè îu-chhat,ū sin ê khì-sīong,khai-thong chài kheh,hō͘ chiah ê thian-kok chèng kíaⁿ-jî,thang chē khì îu-lám 39 chō ê tô͘-su-kóan,27 khu ê hoe-hn̂g,ài tha̍k Sèng-keng,tī hīa kìⁿ-ti̍oh koh-o̍ah ê Chú,sim-móa ì-chiok.

1951 nî 11 go̍eh 30 ji̍t.
Ko Kim-seng.

思羅安台語點字網站