《耶穌言行錄》

Tē-11-chiuⁿ,Îa-so͘ tùi Ai-ki̍p tò-lâi，Kàu saⁿ-cha̍p hè ê tāi-chì

作者 Ko Kim-seng.

listen

（Má-thài 2：19-23；Lō͘-ka 2：40-52）
Hi-lu̍t sí líau-āu，Chú ê thiⁿ-sài tī Ai-ki̍p thok-bang7chhut-hīan kā Iok-sek kóng，"Khí-lâi chhōa Eⁿ-á kap lāu-bú khì Í-sek-li̍at ê tōe-hngg，in-ūi ài hāi-sí Eⁿ-á ê lâng í-keng sí lah. "Iok-sek lîam-piⁿ khí-lâi，chhōa Eⁿ-á kap lāu-bú kàu Í-sek-li̍at ê tōe-hngg.Thiaⁿ-kìⁿ Hi-lu̍t ê kíaⁿ sòa-chiap chòe ông chīu kiaⁿ，m̄-káⁿ khì khīa-khí tī Pek-lī-hêng；nā-sī tī bāng nih tit-ti̍oh be̍k-sī，chiah khì Ka-lī-li Ná-sat-le̍k.Îa-so͘ tìam hia kàu tōa-hàn.Sèng-chheh ū kóng，"Eⁿ-á chīam-chīam tōa，cheng-sîn íong-kīaⁿ，tì-hūi chhiong-móa，Sīong-tè ê un-tían pì-īu I. "

Îu-thài lâng ū chi̍t ê *Pôaⁿ-kè-choeh，sī chá chhut Ai-ki̍p ê sî，Sīong-tè siat-li̍p ê .Iok-sek kap Má-lī-a ta̍k nî chīuⁿ Îa-lō͘-sat-léng lâi síu chit ê choeh，kau3Ia5-so͘ cha̍p-jī hè ê sî，I ê pē-bú chhōa I saⁿ-kap khì，tâng-kîaⁿ ê lâng i̍ah chin-chōe.Choeh-kî bêng-pe̍k，tāi-ke tò-lâi，Îa-so͘ íau-kú tī Îa-lou7sat-léng，pē-bú m̄-chāi，li̍ah-chún kìo sī chhap tī tâng-kîaⁿ ê lâng ê tiong-kan.Kîaⁿ kàu chi̍t ji̍t lō͘，chiah chhē bô，chīu tò-tńg khì Îa-lō͘-sat-léng chhē.Chhē kàu saⁿ ji̍t āu，tī tīan-nih chiah tú-ti̍oh，khòaⁿ-kìⁿ I chē tī sian-siⁿ ê tiong-kan the tâm-lūn.Lâng thiaⁿ-kìⁿ I ê ōe lóng-chóng kî-kòai I ê chhang-mîa，gau5in3-tap.Pē-bú khòaⁿ-kìⁿ i̍ah kî-kòai；I ê lāu-bú kóng，Kíaⁿ，síaⁿ-sū hō͘ góan kàu án-ni？lí ê pē kap góa iu-būn chhē lí.Îa-so͘ ìn kóng，"Mi̍h-sái chhē góa？
kiam2m7-chai góa eng-kai tī góa ê Pē ê só͘-chāi？
"Pē-bú thiaⁿ bōe híau-tit，chóng-sī lāu-bú chiong chiah ê ōe khǹg tī sim-lāi.Îa-so͘ chīu kap in tò-khì Ná-sat-le̍k，hàu-sūn pē-bú.Án-ni thang hō͘ lán chai Îa-so͘ tī sè-kan lóng chīn lu̍t-hoat lâi kîaⁿ.Tē gō͘ tîau kóng，"Ti̍oh hàu-kèng lí ê pē-bú. "Îa-so͘ án-ni kîaⁿ sī ài lâng o̍h I ê bô͘-īuⁿ.Gín-ná sui-jîan bōe kàu chhin-chhīuⁿ Îa-so͘ án-ni，íau-kú ti̍oh kîu Sèng Sîn pang-chan lâi o̍h，chīu Sīong-tè tek-khak hoaⁿ-hí thiaⁿ，hō͘-in ná kú ná o̍h hó ê khóan-sit.

Tùi Îa-so͘ cha̍p-jī hè kàu saⁿ-cha̍p hè，hit ê tiong-kan Sèng-chheh bô lóng kì-chài，íau-kú chai Iok-sek sī chòe ba̍k ê sai-hū，phah-sǹg Îa-so͘ i̍ah sī án-ni，in-ūi Sèng-chheh kì-chài，ū lâng kìo I chòe ba̍k sai-hū.Án-ni hō͘ lán chai I káⁿ ū pang-chān Iok-sek chòe kang thàn chi̍ah.I si̍t-chāi sī Sīong-tè，íau-kú"Khut-hā chòe lâng，chîaⁿ lô͘-po̍k ê khóan-sit. "Án-ni lán ti̍oh o̍h Îa-so͘ khiam-pi ê khóan-sit.Sèng-chheh kóng，"Lín eng-kai ti̍oh ū Ki-tok Îa-so͘ hit hō͘ ê sim. "（Hui-li̍p-pí 2：5）

思羅安台語點字網站