《耶穌言行錄》

| | | 轉寄

Tē-33-chiuⁿ,Iû-goân tī soaⁿ-téng kóng tō-lí

listen

(Má-thài 6:5-18).
Iâ-so͘ koh chiong kî-tó ê tāi-chì kà-sī lán,kóng lán m̄-thang chin-chhiūⁿ ké-hó ê lâng,hoaⁿ-hí khiā kong-hêng ê só͘-chāi;tio̍h ji̍p ba̍t-pâng koaiⁿ-mn̂g,kiû- lâng khòaⁿ bōe tio̍h ê Pē,ia̍h m̄-thang chin-chhiūⁿ pài-pu̍t ê lâng ta̍uh-ta̍uh liām,in-ūi lán só͘ khiàm-ēng,bē kiû ê tāi-seng,Thiⁿ-pē í-keng chai.Iâ-so͘ chiū kà-sī in kî-tó,kóng,"Lín kî-tó tio̍h kóng,Goán tī thiⁿ-nih ê Pē,Goān Lí ê miâ sèng.Lí ê kok lîm-kàu.Lí ê chí-ì tit chiâⁿ,tī tōe-nih chin-chhiūⁿ tī thiⁿ-nih.Goán ê ji̍t-si̍t,kin-á-ji̍t hō͘ goán.Sià-bián goán ê ko͘-hū,chhin-chhiūⁿ goán ia̍h ū sià-bián ko͘-hū goán ê lâng.Bo̍h-tit chhōa goán ji̍p tī chhì,tio̍h kiù goán thoat-lī hit ê pháiⁿ ê.In-ūi kok,koân-lêng,êng-kng lóng sī Lí só͘ ū,tāi-tāi bô chīn.À-bēng. "Khòaⁿ chit kúi kù kî-tó ê ōe,ū kúi-nā hāng put-chí iàu-kín ê kà-sī.Thâu-chi̍t hāng,Siōng-tè m̄-nā cho-seng pó-iúⁿ lán,ia̍h ū hō͘ Ki-tok sio̍k-hôe lán,koh hoaⁿ-hí ēng Sèng Sîn têng-thâu-siⁿ lán,lán siông-siông tio̍h siàu-liām chit hō ê tō-lí,jīn Siōng-tè chòe Pē;ēng kiáⁿ ê sim lâi chhin-kūn I.Tē-jī,Sī lán tio̍h kèng-tiōng I ê miâ,ia̍h kiû I hō͘ sè-kan lóng-chóng ê lâng ōe chai I sī chì-sèng,lâi kui tī I.Tē-saⁿ,Sī kiû Siōng-tè hō͘ lán kap lóng-chóng ê lâng hoaⁿ-hí hâng-ho̍k I ê koán-hat,chòe I ê peh-sìⁿ.Tē-sì,Siōng-tè ê chí-ì tī thiⁿ-nih,lóng-chóng chun-thàn,bô ûi-ke̍h;tio̍h kiû I hō͘ lán kap tōe-bīn-chiūⁿ lóng-chóng ê lâng ia̍h ōe án-ni.Tē-gō͘,Thang chai lán jio̍k-sin ū ha̍p-gî ê khiàm-ēng,ia̍h thang tùi Siōng-tè kiû;chóng-sī m̄-thang kè-thâu khòa-lū,ia̍h m̄-thang it-bī siūⁿ ài beh liâm-piⁿ tit-tio̍h hè-mi̍h put-chí chōe,chek-chū chòe kú-tn̂g ê lō͘-ēng,Ta̍k-ji̍t sī kiû ta̍k-ji̍t só͘ tio̍h ēng ê chiū hó;án-ni sī hián-bêng ti-chiok ê sim,ia̍h Siōng-tè bô m̄ siúⁿ-sù lán.Tē-la̍k Tio̍h sòe-jī siūⁿ ka-kī ū sià-bián lâng ê sim á bô;tio̍h kiû Siōng-tè siúⁿ-sù lán chit hō ê sim,chiah thang ǹg-bāng ka-kī ê chōe-kòa ōe tit-tio̍h Thiⁿ-pē ê sià-bián.Lán kî-tó ê sî tio̍h kí-tit ka-kī sī tāng-chōe ê lâng,só͘-í tio̍h sêng-si̍t jīn-chōe kiû sià-bián.Tē-chhit,Sè-kan sī chhì-liān ê só͘-chāi,chin-chōe pháiⁿ-tāi ōe ín-iú lán hām-lo̍h chōe;koh lán ka-kī put-chí loán-jio̍k,bô khùi-la̍t ōe khah-iâⁿ pháiⁿ;só͘-í tio̍h kiû Thiⁿ-pē chín-kiù,chiah ōe bián-tit gûi-hiám.Sèng-chheh kóng,"Lín kan-lân ê ji̍t kiû góa,góa tek-khak kiù lín.

"Lō͘-bé kúi kù sī hō͘ lán chai lán só͘ tùi kî-tó ê,si7u7 koân-lêng ê Siōng-tè;só͘-í tio̍h sìn,tio̍h óa-khò;in-ūi I ōe chiâⁿ bān-hāng ê tāi-chì.Kî-tó ê sî iàu-kín só͘ kóng ê ōe m̄-thang kap sim bô tâng;siat-sú án-ni,chiū bōe-tit-thang kóng,"À-bēng,"á-sī"Sim chèng só͘ goān;"ia̍h Thiⁿ-pē m̄ ún-chún;só͘-í tio̍h ēng sêng-si̍t ê sim,chiū só͘ kiû ê ōe tit-tio̍h.À-bēng ê ì-sù sī sêng-si̍t,sī chí lán kî-tó tio̍h ēng sêng-si̍t,in-ūi Siōng-tè sī chin-si̍t,kóng-chhut chiū kiâⁿ.

Iâ-so͘ ia̍h kà-sī lán kìm-chia̍h ê tō-lí.Kìm-chia̍h ê ì-sù sī in-ūi iu-būn jīn-chōe tī Siōng-tè r5 bīn-chêng;só͘-í m̄-thang chin-chhiūⁿ ké hó ê lâng,tài iu-iông,pìⁿ bīn-sek,ēng kìm-chia̍h beh hō͘ lâng o-ló lán chòe khiân-seng.Iâ-so͘ kóng,"Kìm-chia̍h ê sî thâu-mn̂g tio̍h boah iû,bīn tio̍h sóe,bo̍h-tit ēng kìm-chia̍h hō͘ lâng khòaⁿ,chiū ōe tit-tio̍h Thiⁿ-pē ê siúⁿ. "

思羅安台語點字網站