《耶穌言行錄》

| | | 轉寄

Tē-51-chiuⁿ,Iâ-so͘ tī Khòng-iá chhī chèng-lâng

listen

(Má-thài 14:13-21;Má-khó 6:30-44; Lō͘-ka 9:10-17;Iok-hān 6:1-13)
Iâ-so͘ thiaⁿ-kìⁿ Iok-hān siū hām-hāi,chiū lī-khui hia chiūⁿ chûn khì khòng-iá;chōe-chōe lâng chai,chiū kiâⁿ lō͘ tè I.Beh thiaⁿ I kóng tō-lí,ài khòaⁿ I só͘ chòe. Ji̍t beh àm,ha̍k-seng chiū-kūn Iâ-so͘ kóng," Chia sī khòng-iá,sî í-keng òaⁿ lah,chiáⁿ sì-sòaⁿ chèng-lâng,hō͘ in khì hiuⁿ-siā bóe chia̍h.
" Iâ-so͘ kóng,"M̄-sái chèng-lâng khì;lím thang hō͘ in chia̍h. " Ha̍k-seng kóng,"Goán tī chia bô só͘ ū;to̍k-to̍k ū gō͘ ê piáⁿ,nn̄g bé hî nā-tiāⁿ.
"Iâ-so͘ kóng,"The̍h lâi hō͘ góa. "Liâm-piⁿ hoan-hù chèng-lâng chē tī chháu-po͘,the̍h gō͘ ê piáⁿ,nn̄g bé hî,kia̍h-thâu ǹg thiⁿ chiok-siā peh-phòa;chiong piáⁿ hō͘ ha̍k-seng,ha̍k-seng hō͘ chèng-lâng.Chèng-lâng chia̍h kàu pá,Iâ-so͘ chiū tùi ha̍k-seng kóng,"Khioh hiah ê chia̍h chhun ê seh,m̄-thang phah-sńg. "Ha̍k-seng thàn Iâ-so͘ ê ōe,khioh cha̍p-jī kheng móa-móa.

Koh bô lōa-kú,Iâ-so͘ koh the̍h kúi-nā ê piáⁿ,tām-po̍h sòe-bé hî hō͘ sì-chheng lâng chia̍h kàu pá,chia̍h-liáu,chhun ū chhit nâ móa-móa.

Chá-Í-lī-a hō͘ chi̍t ê chiú-kóaⁿ hū-jîn-lâng ê khì-kū lāi ê mī-hún bōe kián,pân-lāi ê iû bōe ta,kàu khòng-hān kè chiah soah. Koh Í-lī-sa bat ēng tām-po̍h piáⁿ-liāu kiong-kip chīt pah lâng chia̍h kàu ū chhun. Khòaⁿ-kìⁿ chit nn̄g hāng ê tāi-chì chha-put-to saⁿ chhin-chhiūⁿ,chóng-sī lāi-tiong tōa-tōa bô saⁿ-tâng. Í-lī-a kap Í-lī-sa só͘ kiâⁿ m̄-sī óa-khò sa-kī ê khùi-la̍t,chiū-sī óa-khò Siōng-tè chiah ōe án-ni. Iâ-so͘ kiâⁿ ta̍k hāng ê sîn-jiah lóng sī ēng ka-kī ê koân-lêng,in-ūi I sī Siōng-tè.

Iâ-so͘ khòaⁿ-kìⁿ lâng iau-go͘ chiū lîn-bín,che sī hián-bêng I ê tōa chû-sim,chiū-sī ēng I pún-sin lâi iúⁿ-chhī lâng ê sim-sîn,chhin-chhiūⁿ I at kóng,"Góa chiū-sī oa̍h-miā ê piáⁿ. "

Sè-kan ê mi̍h thang chiām-sî iúⁿ-chhī seng-khu nā-tiāⁿ,Ki-tok ōe hō͘ lán ê lêng-hûn éng-oán bōe sí. Lâng sui-bóng ū mi̍h,m̄-chia̍h ōe sí;lâng ū Iâ-so͘ thang óa-khò,nā m̄-khéng chiū-kūn,ia̍h tek-khak tîm-lûn.




思羅安台語點字網站