《耶穌言行錄》

Tē-2-chiuⁿ,Îu-thài lâng

作者 Ko Kim-seng.

listen

Hit-ti̍ap Lô-má lâng ài êng-hían，sì-kòe pà-chìam lâng ê thó͘-tōe，tì-kàu thiⁿ-ê chha-put-to ta̍k kok si̍ok in,Îu-thài kok i̍ah sī án-ni.Lô-má hông-tè chīu hong Hi-lu̍t chòe ông kóan-hat in.Hit-sî Îu-thài lâng îu-gôan síu in ê choeh-kî，i̍ah hìan-chè Sīong-tè，chóng-sī khah-chōe sī gōa-phê.In tiong-kan ū chi̍t kàu，mâi kìo Hoat-lī-sài，síu Mô͘-se ê hoat-tō͘ lé-sò͘，in-ūi án-ni chū-chheng chòe hó. Ū sî khīa tī koe-lō͘，tn̂g-tn̂g kî-tó，tîau-kò͘-ì hō͘ lâng khòaⁿ；chóng-sī in ê sim bô chin-si̍t thìaⁿ Sīong-tè，bô chìau kong-gī khóan-thāi lâng；óa-khò ka-kī，bô óa-khò Îa-so͘,só͘-í bōe tit-ti̍oh Sīong-tè chiap-la̍p.

Îa-so͘ bat kā ha̍k-seng kóng，"Lín ê gī nā bô khah-îaⁿ Hoat-lī-sài lâng ê gī bōe ji̍p thian-kok"（Má-thài 5：20）.

Koh ū chi̍t kàu mîa kìo Sat-thó͘-kai,koh-chài o̍ah ê tāi-chì，ū thiⁿ-sài，lâng ū sîn-hûn chit hō ê tō-lí，in m̄-sìn，kóng lâng chīu soah.Kai-chài Îu-thài lâng íau-kú ū-ê chin-sit kèng Sīong-tè，sìn sèng-chheh só͘ kì-chài；i̍ah chai Bí-sài-a lâi ê sî beh kàu，ta̍k ji̍t the thèng-hāu.Lūn lán chit-ti̍ap pí chá ê Îu-thài lâng khah chai,in-ūi lán ū Sin-iok ê chheh.Chit ê chheh só͘ kì-chài khah-chōe sī kóng Îa-so͘ kìu lâng ê hoat-tō͘.

Siat-sú lán tha̍k Sèng-chheh lóng chai Îa-so͘ ê tāi-chì，i̍ah bô chin-si̍t thìaⁿ I;á-sī chhùi kóng sī I ê ha̍k-seng i̍ah bô thàn，sī bô khah-îaⁿ Hoat-lī-sài lâng，só͘-í lâng ti̍oh hō͘ Sèng Sîn têng-thâu-siⁿ chiah ōe chōe Sīong-tè chin-si̍t ê peh-sìⁿ.

思羅安台語點字網站