《耶穌言行錄》

| | | 轉寄

Tē-70-chiuⁿ,Kî-tó bô ià，jīn-chōe

作者 Ko Kim-seng. 2009.08.09

（Lō͘-ka 18：1-14）
Iâ-so͘ kā lâng kóng，"Lâng eng-kai siông-siông kî-tó m̄-thang ià，"chiū siat phì-jū kóng，"Bó͘-ūi ū chi̍t ê koaⁿ，bô kèng-ùi Siōng-tè，ia̍h bô tùi-tiōng lâng，hit ê siâⁿ ū chi̍t ê chiú-kóaⁿ lâi kìⁿ i kóng，"Ū lâng kap góa kiat-siû，kiû lí thòe góa sin-oan. "Hit ê koaⁿ kú-kú m̄ chhap，āu-lâi ka-kī siūⁿ kóng，"Góa sui-bóng bô kèng-ùi Siōng-tè，ia̍h bô tùi-tiōng lâng，chóng-sī chit ê chiú-kóaⁿ lâng ta̍uh-ta̍uh lâi kiáu-jiáu góa，tek-khak tio̍h thòe in sin-oan，bián-tit éng-éng lâi chô-chak góa. ""

Chú koh kóng，"Lín tio̍h thiaⁿ put-gī ê koaⁿ só͘ kóng ê ōe；hô-hòng Siōng-tè só͘ kéng ê peh-sìⁿ mî-ji̍t kiû-kiò，Siōng-tè sui-jiân iân-chhiân，kiám m̄ thòe in sin-oan. "

Ū lâng lia̍h ka-kī chòe gī lâi khòaⁿ-khin pa̍t lâng，Iâ-so͘ chiong phì-jū kā in kóng，"Nn̄g lâng chiūⁿ tiān-tn̂g kî-tó，chi̍t ê sī Hoat-lī-sài ê lâng；chi̍t ê sī thiu-hiòng ê lâng.Hoat-lī-sài ê lâng ka-kī khiā-teh kî-tó kóng，"Kám-siā Siōng-tè，góa m̄-sī chhin-chhiūⁿ chèng-lâng kiâⁿ lek-sek，put-gī，îm-ok ê tāi-chì，ia̍h bô chhin-chhiūⁿ hit ê thiu-hiòng；chi̍t lé-pài ê tiong-kan góa kìm-chia̍h nn̄g pái，ia̍h ēng só͘ ū ê mi̍h cha̍p-hūn thiu chi̍t hūn. "Hit ê thiu-hiòng ê lâng hn̄g-hn̄g teh khiā，m̄-káⁿ kia̍h-ba̍k ǹg thiⁿ，chiū tûi heng kóng，"Góa ū chōe，Siōng-tè lîn-bín góa. ""Iâ-so͘ koh kóng，"Góa kā lín kóng，chit ê lâng tò-khì in chhù tit-tio̍h chheng-gī，khah-iâⁿ hit ê lâng；in-ūi lâng ka-kī seng chòe koâiⁿ，tek-khak ōe kàng-lo̍h kàu chòe kē；ka-kī chòe kē，tek-khak ōe seng kàu chòe koâiⁿ. "

思羅安台語點字網站