《耶穌言行錄》

| | | 轉寄

Tē-78-chiuⁿ,Má-lī-a ēng iû boah Iâ-so͘

listen

(Má-thài 26:6-13; Má-khó 14:3-9;Iok-hān 12:1-8)
Pôaⁿ-kè-choeh la̍k-ji̍t chêng,Iâ-so͘ kàu Pek-tāi-nî,chiū-sī Lia̍p-sat-lō͘ sí koh-chài oa̍h ê só͘-chāi.Ū lâng in-ūi Iâ-so͘ siat iân-sia̍h,Má-tāi pān iân-sia̍h ê sū;chē ūi ê tiong-kan Lia̍p-sat-lō͘ iā tī-teh.Má-lī-a chiong ke̍k chin,ke̍k kùi-khì ê phang-iû chi̍t kun,lâi boah Iâ-so͘ ê kha,ēng thâu-mn̂g lâi chhit;phang-bī kàu móa chhù.Ū chi̍t ê ha̍k-seng beh bōe Sian-siⁿ,sī Ka-lio̍k lâng Se-bûn ê kiáⁿ miâ kiò Iû-tāi;i kóng,"Siáⁿ-sū m̄ khì bōe chit ê phang-iû,thang tit-tio̍h gûn saⁿ-cha̍p,lâi chín-chè sòng-hiong lâng ah?"Iû-tāi kóng án-ni,m̄-sī beh chiàu-kò͘ sòng-hiong lâng,put-kò sī in-ūi i koán hit ê chîⁿ-tē,beh thau-the̍h só͘ tóe ê gûn-hāng nā-tiāⁿ.

Iâ-so͘ kóng,"Chhut-chāi i,chit ê hū-jîn-lâng khǹg chit ê phang-iû,sī pī-pān góa bâi-chòng ê ji̍t ê lō͘-ēng.In-ūi sòng-hiong ê lâng siông-siông kap lín tī-teh,góa bô siông-siông kap lín tī-teh. "Iâ-so͘ koh kóng,"Piàn thiⁿ-ē put-lūn sím-mi̍h só͘-chāi,thoân chit ê hok-im,iā tek-khak kóng-khí chit ê hū-jîn-lâng ê só͘ kiâⁿ hō͘ lâng kì-liām. "

Lūn chit ê hū-jîn-lâng tit-tio̍h Iâ-so͘ ê kà-sī,sui-jiân bōe pí-tit cha̍p-jī sù-tô͘ ê hó ki-hōe,chóng-sī i ê thiaⁿ Chú pí chōe-chōe lâng khah iâⁿ,koh chai Iâ-so͘ ê tāi-chì pí pa̍t lâng ia̍h khah siông-sè.Lán thang chai thiaⁿ tō-lí tio̍h jīn-chin sòe-jī siuⁿ,chiah ōe ǹg-bāng Sèng Sîn ê pang-chān,ōe chìn-pō͘ thong-ta̍t tō-lí.Nā bô,m̄-nā bōe bêng-pe̍k tō-lí,kiaⁿ-liáu hoán-tńg ōe chhin-chhiūⁿ Iû-tāi,m̄-nā ka-kī bōe kiâⁿ hó,ia̍h m̄ hoaⁿ-hí pa̍t lâng hó ê só͘ kiâⁿ.

思羅安台語點字網站