《耶穌言行錄》

| | | 轉寄

Tē-89-chiuⁿ,Pí-tek m̄ jīn Iâ-so͘

listen

(Má-thài 26:69-75;Má-khó 14:66-72; Lō͘-ka 22:54-62;Iok-hān 18:15-27)
Lâng thoa Iâ-so͘ kàu Kai-a-hoat ê só͘-chāi.Pí-tek hn̄g-hn̄g tè kàu gê-mn̂g,ji̍p-khì kap gê-ia̍h chē,ài khòaⁿ tāi-chì kàu bêng-pe̍k.Tī tiâⁿ-nih ū lâng khí hé,Pí-tek teh chiò hé,ū chi̍t ê lú-pī khòaⁿ i,chiū kóng,"Chit ê lâng ia̍h bat kap Iâ-so͘ chòe-tui. "Pí-tek m̄ jīn,kā hit ê lú-pī kóng,"Góa m̄-bat I. "Tiap-á-kú koh ū chi̍t lâng khòaⁿ-kìⁿ i,kóng,"I ia̍h sī I ê lâng. "Pí-tek kóng,"Góa m̄-sī. "Koh pòaⁿ-sî kú,iū ū chi̍t lâng chhut-la̍t kóng,"Chit ê lâng si̍t-chāi bat kap Iâ-so͘ chòe-tui,in-ūi sī Ka-lī-lī ê lâng. "Pí-tek lóe-mē koh chiù-chōa kóng,"Lí só͘ kóng ê ōe,góa bōe hiáu-tit. "Teh kóng ê sî koe chiū thî.Chú oa̍t-thâu khòaⁿ Pí-tek,Pí-tek kì-tit Chú ê ōe. "Koe thî ê tāi-seng,lí ōe saⁿ-pái kóng m̄-bat góa;"chiū chhut-khì tōa thî-khàu.

Tha̍k chí kúi chat hō͘ lán thang chai hoān tāi-chì m̄-thang óa-khò ka-kī ê khùi-la̍t,in-ūi bô ún-tàng;chhin-chhiūⁿ Pí-tek kā Chú kóng,"Sui-jiân kàu sí ia̍h bô kóng m̄-bat lí;"nā-sī koh bô lōa-kú,chiū kiaⁿ-hiâⁿ kóng pe̍h-chha̍t,koh chiù-chōa kóng i m̄-bat Iâ-so͘.Pí-tek āu-lâi m̄-nā chai ka-kī ê loán-jio̍k,ia̍h oàn-hūn ka-kī m̄ jīn Chú ê tāng-chōe,tōa-tōa hoán-hóe.Pí-tek hoán-hóe chōe ê khoán-sit put-chí thang chòe lán ê khòaⁿ-iūⁿ.

思羅安台語點字網站