《耶穌言行錄》

| | | 轉寄

Tē-90-chiuⁿ, Ka-lio̍k lâng Iû-tāi ê kiat-kio̍k

作者 Ko Kim-seng. 2009.12.27

（Má-thài 27：3-10； Sù-tô͘ Hēng-toān 1：15-20）
Thiⁿ-kng，chè-si-tiúⁿ，tiúⁿ-ló saⁿ-kap kè-bô͘ kong-kek Iâ-so͘，ài hō͘ I sí；chiū pa̍k lâi thoa I kè-sàng hō͘ chóng-tok Pún-tiu Pí-lia̍p-to.Hit-sî bōe sian-siⁿ ê Iû-tāi khòaⁿ-kìⁿ Iâ-so͘ tēng-chōe chiū hoán-hóe，the̍h hit ê gûn saⁿ-cha̍p ê koh hêng chè-si-tiúⁿ，tiúⁿ-ló，kóng，"Góa bōe bô chōe-kòa ê lâng ê huih，góa ū chōe lah. "

Chèng-lâng kóng，"Kap goán ū sím-mi̍h kap-sia̍p？lí ka-kī tio̍h tng. "Iû-tāi pàng hiat-ka̍k hiah ê gûn tī tiān-lāi，thè-khì tiàu-sí，seng-khu poa̍h-tó，pak-tó͘ li̍h-khui，tn̂g-á lâu-chhut.

Chè-si-tiúⁿ kóng，"Ēng huih-kè lok tī khò͘-pâng m̄ ha̍p-gî，"chiū ēng hit ê gûn bóe chi̍t-phiàn tōe，chòe thióng-soaⁿ lâi tâi chhut-gōa lâng.Lâng chiū kiò hit ê tōe，"Huih-tōe. "

Lūn Iû-tāi bōe sian-siⁿ，káⁿ bô phah-sǹg Iâ-so͘ ōe hō͘ lâng tēng I sí-chōe；kàu khòaⁿ I siū tēng-chōe，chiū hoán-hóe；chóng-sī i ê hoán-hóe m̄-sī chhin-chhiūⁿ Pí-tek chhim-chhim oàn-hūn ka-kī ê chōe，kiû sià-bián；put-kò sī chai ka-kī ê só͘ kiâⁿ ū jiá tōa siū-khì，chiū sit-chì，lóng m̄-káⁿ ǹg-bāng Siōng-tè sià-bián i.

思羅安台語點字網站