《林茂生博士論文》

 | | | 轉寄

第七章 教育行政機關ê發展

作者 英語 2017.08.27

第七章 教育行政機關ê發展
一、 中央政府教育行政ê發展
1, 起動tī 1895年
Tī 1895年5月21日，當台灣總督府臨時政府制度設立ê時，to̍h tī民政局部門中列入學務部，這就是tī日本佔領下ê台灣ê第一個教育行政機關ê開始。同時，tī第一任總督樺山將軍ê選擇kah邀請之下，伊澤修二被指派為學務部長，伊澤是當時日本ê卓越教育家之一。 隔tńg年（1896年）4月，軍事行政改做民事行政ê時，學務部分做兩科，to̍h是教務課kah編纂課。前者主要是負責教育事務，後者ê主要功能為編冊kah發行學校教科書。
2. 1897年ê改革
Tī 1897年10月，因為總督府官制改正，設立兩局，to̍h是民政局kah財務局，每一局koh分做幾個部門。Chit時，學務課to̍h是民政局ê幾個課中之一。
3. 1898年ê改革
Tī 1898年6月，總督府koh再改組，民政局kah財務局合併為一，稱做民政部，學務課就稱做民政部學務課。
4. 1901年ê改革
1901年11月，總督府官制改正，民政部分做五局一署，因為án-ne，學務課to̍h soah被列tī總務局內面。學務課以外iáu有其它各種組織，像講編纂組、教科用圖書審查委員會、教員恩給委員會等。值得注意ê是，學務課對醫學校、農業講習所á是糖業講習所，並無透過委任á是其它方式ê管轄權，chiah-ê學校另外設有專門令管理。
5. 1909年ê改革
根據1909年10月，政府ê改正制度，總務局被廢除，學務課就án-ne附屬tī內務局。同時，tī 1901年設立ê編纂組mā遭遇廢除，tī學務課裡重組編纂組。Koh講，1901年5月敕（thek）令第131號解決久長以來懸而未決（hiân--jî-bī-koat）ê學事視察制度ê問題。根據chit仝一個敕令，有一部分政府機構（官制）受tio̍h改進，並指派一位督學官kah幾位督學。
6. 1911年ê改革
根據1911年10月敕（thek）令第260號，總督府官制koh重新改正。因為chit pái ê改組，到taⁿ屬tī內務局ê學務課就án-ne獨立，成做民政部真chē部門中ê一個部門，to̍h是學務部，主管全島教育事務。而且兩課to̍h是學務課kah編修課koh重新設置，後者負責教科書ê出版、編修、檢定kah翻譯，前者主管kui個學校行政事務。除了chit兩課以外，iáu設有公學校教科用圖書審查委員會、教員檢定委員會、學校教員恩給審查金委員會，以及督學委員kah督學補助委員會。
7. 1919年ê改革
Tī 1919年6月，總督府官制koh再重組。過去ê制度由四個局組成，to̍h是財務局、通信局、殖產局kah土木局，改由六局組成，to̍h是內務局、財務局、殖產局、遞信局、土木局kah警務局，並設有法務局。過去ê學務部被廢除，tī內務局設立學務課kah編修課，前者主管kui個教育事務，後者負責教育書籍ê出版、編修、發行、檢定、翻譯kah銷售。除了chit兩課以外，iáu包括以上己敘述ê各種委員會。 Chit-ê制度繼續到1924年，chiah kā兩課合併為一，to̍h是文教課，像以前仝款屬tī內務局。Chit-ê新設立ê文教課，就ná它ê名稱所表明ê，除了通常ê教育事務以外，增加兩個重要ê事務，to̍h是宗教事務kah社會工作。
8. 1926年ê改革
「文教課」向koh khah有權力而且獨立ê「局」邁進，tī 1926年10月12日，根據敕（thek）令第321號，成立文教局，標示中央教育行政上ê新紀元。以下是目前教育行政ê中央編制。
文教局ê人事親像下面（註：1）： 局長···········1人（敕任） 事務官···……2人（薦任） 督學官···……5人（薦任） 編修官···……2人（薦任）
局中四個辦公室親像下面： (1) 庶務係 (2) 督學室，負責 (a)學事視察 (b)改善學校kah成人教育 (c）教育kah文化調查 (3）學務課包括兩係，to̍h是 (a)學務係，負責 一敕語謄本ê有關事項 一教員檢定ê有關事項 一體育kah學校衛生ê有關事項 一專門學校入學資格檢定ê有關事項 (b)編修係，負責 一教科用圖書之編修·檢定、著作、翻譯版kah保管ê有關事項 (4) 社會課，負責有關 (a)神社kah宗教 (b）節日獻穀 (c）圖書館kah博物館 (d）社會團體、人民娛樂kah其他教化團體ê有關事項 (e）軍事救護 (f）賑恤救災工作、兒童保護、失業救濟、公設當鋪等 (g）公益法人
二、地方政府ê教育行政發展
1, 引言
地方教育行政不時因為中央（總督府）官制ê改變來改變。Tī 1896年4月初，設立三縣（主要轄區）kah一廳（次要轄區），每一縣ê內務課lóng指派一名學務主任負責教育事務。 經過1897年5月kah 1898年6月地方官制ê改革，tī每一轄區ê內務部設立學務主任kah學事視察員來主管教育。
2, 1901年ê改革
1901年改革ê結果，新設立二十「廳」，每一廳ê總務課設有一位學事主任。（「廳」是比較khah細ê政治實體，比遭廢除ê「縣」khah細。）Chit-ê制度一直繼續到1909年ê改革。
3, 1909年ê改革
Tī 1909年5月ê改革，kā 20廳改做12廳。每一廳ê庶務課設有學務主任kah伊ê部屬，負責地方學校事務。
4, 1918年ê改革 1919年8月，由庶務課直接任命督學，負責有關學事視察ê事務。這是tī地方學校ê事務上第一位督學。
5. 1920年ê改革
Tī 1920年9月，地方官制經過重大ê改革，全島設五州（khah大ê行政區）kah兩「廳」（khah細ê行政區）。每一州ê內務部新設立教育課，負責學校事務，由階級koh khah koân ê官員掌理chit課，並tī每一課指派兩位督學。
地方教育課負責ê事項真清楚界定親像下： (1) 神社kah神職有關事項 (2) 宗教建築物、宗教團體、修道者、教師kah其它宗教有關事項 (3）兵事有關事項 (4）軍需工業動員有關事項 (5）學校、幼稚園、「書房」、圖書館kah其他學事有關事項 (6）學校職員退休金、遺族撫卹（hú-sut）金kah扶助金ê有關事項 (7）學校衛生有關事項 (8）學事視察有關事項 (9）華語普及有關事項 (10) 社會教化有關事項
Tī每一郡（譯按：州廳以下設郡）、市（譯按：五州中設五市），mā設一位督學負責郡、市內ê學校事務。地方教育活動ê正式組織就án-ne確立落來。當然，它ê制度kah中央政府類似，kan-taⁿ是格局khah細。全島每一州lóng設有一位教育課長（薦任）、9位督學kah 23位屬員，市、郡共有44位督學。三廳（由高雄州分出一廳soah成三廳）有三位督學。以上所描述ê所在，教育行政制度一直繼續到chit-má，並無受tio̍h 1926年中央機關改革ê影響。

註釋
（1）見吉野秀公，頁474-475。