《受恩蒙福的一生》

 | | | 轉寄

Lín厝用啥去Hông看

作者 林宗要 2010.10.03

以賽亞書卅九：1-4

每一個人lóng真了解，家庭對人生ê影響是無法度取代--ê，伊對人生ê成敗mā有決定性ê關係，通常tī成功者ê背後，lóng有一個真值得回憶ê家庭生活。無惡不作ê流氓mā時常生活tī不幸悲慘ê家庭陰影之下ê人。Chiah-ê是人生所bōe-sái疏忽ê事實，因此有理想ê人lóng會真重視建立有良好氣氛ê家庭，來影響厝內ê人，尤其是孩童kap青年，對in ê人格ê完整形成chiah有利。家庭ê性質原本是單純ê生活環境，m̄-koh有ê時咱mā會發現tio̍h家庭其實mā是非常複雜ê所在。有時tī現實中，咱會看tio̍h無啥物tāi-chì會比家庭問題koh-khah oh解決，所以有一句話「清官難斷家內事」，tùi chit句俗語咱mā ē-tàng明白家庭複雜ê性質kap內容。

Tī社會上真chē人會因家庭問題來發生驚人ê結果，財富、人格、甚至性命ê損失。三國誌中ê關羽to̍h是因參予劉備ê家庭問題chiah會發生悲劇：劉備beh認一位義子劉封，去請教孔明，孔明講he是家內事，無方便提出意見。劉備問關羽，關羽反對，因為劉備已經有kiáⁿ兒，chit件tāi-chì hō͘劉封聽tio̍h伊抾恨在心，造成後來發生按兵不動，m̄去救援關公ê tāi-chì，結果關羽hō͘吳國所害，劉備損失了一位非常勇猛ê大將，對了後ê蜀國影響真大。對遮ē-sái看著家庭問題有ê時真複雜、真oh解決，雖然是án-ne，家庭是人類生存所bē-tàng欠缺ê所在，mā to̍h是講人類無法度離開家庭這是事實。

家庭kap人ê性命息息相關，人ê性命（生存）若無tī家庭中形成就會有真chē ê問題發生，mā會有真chē ê缺陷，這是咱ē-tàng瞭解--ê，人確實ē-tàng tī家庭中得tio̍h真chē tī外口無法度hō͘ in ê感受，比如：親情、溫暖、關懷、安全感等等，是人切身需要--ê，che當然是指正常ê家庭來講，所以hiah-ê人時常形容家庭是溫暖ê「眠床」，確實是án-ne。人生tī外口會經歷真chē無情ê風雨kap攻擊、批評，但是chiah-ê受傷ê心靈ài tī家庭中得tio̍h溫暖kap安慰，藉tio̍h感受家ê溫暖kap安全得tio̍h醫治、彌補真chē ê欠缺。

對基督徒來講，家庭是榮耀上帝ê所在，這是上帝hō͘人類siōng大ê恩典kap祝福，因為上帝已經將人生siōng重要ê疼賜hō͘家庭，因此一個上帝賜福ê家庭必定是互相親愛ê家庭。咱時常形容khah完美ê家庭hō͘做「小天堂」to̍h是chit-ê原因。天堂是上帝支配運用主權ê所在，上帝是疼，因此天堂內充滿了疼，所以tī chit-ê家庭中就會真少發現過失kap缺陷，chit種無過失（tī人ê世界來講），是成做「小天堂」ê主要因素。因此基督徒必須ài珍惜咱ê家庭，同心協力來建造伊，hō͘伊ē-tàng真正如咱聖詩433首所描述ê「今求救主khiā teh阮中央，成做伊甸樂園，大家相疼彼此和睦，享受地上天國」雖然基督徒mā有無完全，但是咱必須珍視上帝所賜予咱ê chit種家庭關係，設法hō͘咱ê家庭ē-tàng成做榮耀上帝ê存在，m̄是「身氣惱命」ê所在。這是基督徒信仰生活非常重要ê tāi-chì，伊ê成敗kap咱家己kap咱ê教會lóng有深刻ê連帶關係。

（一） 家庭kap教會
基督徒信仰生活中有一件真重要ê tāi-chì，就是ài認清基督徒ê家庭kap教會ê重大關係，事實上教會是毋是有增長，直接、間接lóng kap咱ê家庭有關，因為教會是tùi咱chiah-ê家庭所組成，教會和家庭是密切bē-tàng分割ê。咱ê家庭完美穩固，自然咱教會mā會tī理想、安定中，若是咱ê家庭一直有問題，無家庭ê氣氛，相信咱ê教會mā會有真chē紛擾、無理想ê信仰風氣。雖然基督徒ê信仰生活是確立tī家己ê經驗，但是chit種獨立ê信仰一定ài經由基督徒之間ê互相分享建立來造就基督徒ê信仰生活，因為咱是tī基督內ê一個信仰共同體（哥林多前書十二章），共同體ê特色to̍h是互相關係良好ê適應。保羅tī哥林多前書十二章中論述tī基督耶穌內底ê肢體性質，to̍h是咱信仰共同體siōng好ê解釋，雖然肢體ê位置無一定仝款，但是伊是平等ê連結tī一個身軀，這是事實。咱每一個基督徒ê家庭，tī無仝ê環境中生活，雖然是位置無仝，但是lóng是屬於基督耶穌ê教會，所以基督徒ê家庭雖然四界分散，lóng同款是上帝厝內ê人。Ná親像咱ê身軀，各有無仝ê存在；口、目、耳雖然功能無仝，但是必須合一，因為是同屬tī一個身軀。上帝將咱安置tī教會無仝ê位，基督徒tī教會ê地位是無分大小kap尊貴、下賤；牧師、主席、長老、執事kap一般ê會員，甚至慕道友lóng是同等，牧師長執無khah尊貴，主席mā無khah特別，因為咱tī上帝面前lóng是同等，只是hō͘安排tī無仝ê位而已，只要你tī目前ê現實中完成受託ê使命，就ē-tàng成做有價值可取ê基督徒，ná親像咱ê 五官各有無仝ê作用，只要tī家己ê位頂koân完成責任，to̍h是盡責。

咱tī教會ê位或者khang-khè是上帝所安排，既然是上帝ê安排，án-ne咱tī教會ê地位kap khang-khè to̍h是貴重而且是有價值--ê。若用此來要求咱ê家庭tī教會ê狀態ê時，相信每一個家庭lóng會有美好ê信仰表現，用榮耀上帝做目標來經營基督化ê家庭生活，是咱家庭siōng重要ê課題，án-ne chiah ē-tàng完成kap教會ê互動責任來服務教會，因為基督徒家庭to̍h是傳揚福音ê基點。確實tùi教會ê成長觀察ê時就會明白，家庭實在是福音ê基點，因為真chē ê基督徒lóng是tùi家庭引chhōa chiah進入教會，家庭對人ê福音ê接觸點比教會闊，因此建立一個健全穩固ê基督化家庭，實在是強化教會siōng好ê事實，咱必須學習猶太人家庭，in ê家長對厝內ê每一份子lóng負責傳道ê任務，培養訓練每一個成員對上帝堅定ê信心是猶太人父母無上ê榮耀kap責任，因此tī信仰ê教育上，猶太人ê家長真成功，這是大家所公認。

家庭既然是福音ê「接觸點」，那教會對家庭mā有真重要ê關係，教會必須時常關照家庭，這可能to̍h是教會生活ê探訪khang-khè pah！因為咱知影榮耀、成功ê家庭必然mā會形成榮耀理想ê教會。

（二） 恁厝用啥去示人－－in tī lín-tau看見啥？
Chit句話是先知問希西家王，hiah-ê巴比倫ê顯貴tī lín-tau看tio̍h啥？Mā用chit句話來思考咱ê家庭，到底一般人tī你ê厝內看見啥？著是講，咱ê厝beh用什麼展現hō͘別人看？相信當時希西家王必定心情愉快，因為巴比倫派特使者來探訪伊，伊帶領chiah-ê使者去參觀伊所ē-tàng向人展現ê事實，這tio̍h是人性，因為人通常lóng會藉tio̍h彰顯伊thang誇口ê事來滿足家己人性ê慾望，講到hiah-ê見笑ê事，通常人lóng會想辦法藏起來，以免hō͘人khau洗，當時ê希西家王mā 仝款，而且伊koh有巴比倫王ê感激之情，因此展示in-tau所有值得誇口ê事物，來表示伊ê強盛kap富足，這mā是人性。但是希西家王疏忽一件事實，to̍h是伊是上帝ê選民，又koh是選民中ê君王，選民ê價值是tī榮耀上帝ê生活，這是選民siōng大ê使命。今á日ê基督徒kap當時ê猶太人仝款是歸屬上帝ê人，所以基督徒ê人生必須是ē-tàng榮耀上帝ê人生，mā to̍h是tī生活上kap家庭中lóng tio̍h 不斷ê hō͘人看見上帝ê榮耀以及上帝偉大ê作為，chiah是上帝所希求ê。當然人若ē-tàng tī基督徒ê厝內看見上帝ê榮光以及上帝ê偉大作為，同時mā ē-tàng看tio̍h chit-ê家庭受tio̍h上帝ê祝福，有人間所有ê一切榮華富貴，相信這mā是上帝所願意！基督徒tī人生中若ē-tàng建立chit種正確ê生活觀，當然，hō͘人看見上帝ê榮光kap偉大比看見咱ê富裕kap所有ê能力koh-khah重要。Tī-chia，咱發現希西家王ê 一ê 錯誤，伊無hō͘上帝tī第一位，伊應該向hiah-ê外邦人紹介上帝，hō͘ in認bat耶和華，chiah是正道，但是伊soah將伊ê財富kap武力展示hō͘ chiah-ê外邦人看，tùi chit-ê tāi-chì說明了希西家王ê têng-tâⁿ，一個歸屬tī上帝ê厝，tī人生中若bōe-sái 時時刻刻顯示上帝ê榮光，he是失敗ê家庭，一個無上帝ê家庭，雖然有phông-phài ê武力kap財富，必定是會敗亡--ê。基督徒ê家庭，若是只有權力kap財富無上帝ê話，這家庭必定是無堅固ê根基，有一日會tú-tio̍h逆境，就會傾倒、毀壞，真chē真體面ê基督徒家庭，因為無kā上帝khǹg tī第一位，致使無gōa久就瓦解，因為基督徒ê人生，若只有無限ê權力、財富soah無信仰ê時，結果就會像建立tī砂土頂ê厝仝款，無法度忍受風雨ê考驗，所以ài榮耀上帝必定ài有相當ê準備！有一篇故事：阿公帶孫去拜訪好朋友，伊ê厝內一切設備lóng是一流--ê，但是chit位主日學小朋友soah問阿公講：為何chit間中無主耶穌？Kah-ná真失望ê款。今á日基督徒必須tī厝內建立一個以上帝為第一位ê良好體系，咱ê厝beh用什麼hō͘別人看？一方面是表示咱所有--ê，另外一方面是咱teh紹介主耶穌基督tī人中間。咱必須確認家己ê身份，然後chiah ē-tàng有正確ê人生觀，咱看tio̍h所羅門王teh受上帝祝福ê時，上帝對伊講：「你願我賜hō͘你什麼？你ē-tàng求。」（列王記上三：5），tī當時伊所處ê境況，伊siōng迫切需要ê是強大ê武力、軍隊以及財富，但是伊soah無求chiah-ê，伊kan-nā求耶和華賜hō͘伊智慧治理上帝所交託ê子民，這是何等正確！因此，上帝kā其他ê祝福lóng hō͘伊，所以成做hit時ê賢者，有良好ê表現。今á日上帝mā-beh問咱：「別人tī lín厝內看見什麼？」看見你有財富、kiáⁿ兒出色穿名牌，生活舒適？Á是看見你有一種kap別人無仝ê基督徒ê氣質，或者是tùi氣質流露出ê良好品性；有疼心、純良，會關心人kap厝邊有良好ê關係？上帝向希西家王所提出ê chit句話，實在是咱ê鑒戒。希西家王是真善良、有信仰ê好王，lóng有chit款情形發生，何況咱chiah-ê平凡ê人，應該koh-khah謹慎！

（三） 基督是我家之主
希西家王用人ê立場，將in厝內ê成就、財富、權力、武器，顯現tī巴比倫人ê面前，若照人ê狀況，是無法度避免ê，但是希西家王tī-chia疏忽了伊是上帝ê子民，伊kap普通人無仝，伊有重大ê使命在身，就是ài不斷ê將榮耀歸hō͘上帝，伊應該hō͘外邦人看見上帝所特別選召ê家庭和諧氣氛以及屬於上帝ê形象，若是希西家王ē-tàng將耶和華偉大ê作為以及伊對上帝ê信仰，顯示hō͘外邦人，同時koh hō͘ in看tio̍h伊ê好額kap強大，相信上帝bōe責怪伊，問題是伊kan-nā將現實ê好額，展示tī外邦人面前，soah kā上帝ê榮耀藏起來，這to̍h是伊失敗ê所在。希西家王chit件tāi-chì hō͘咱基督徒ê家庭有無上ê省思作用，咱ài-the̍h什麼hō͘人看？「基督是吾家之主」ê那幅聖畫下腳有下列特別ê文字：「有一位看bē-tio̍h ê人客，定定kap咱同在」（Teh食飯、睏、做khang-khè ê時）。雖然咱ê主tī咱中間是咱看bē-tio̍h，但是祂soah深深深了解咱ê一切，只要咱每一個家庭ē-tàng迎接祂tī咱厝內，hō͘祂來支配咱信仰ê人生ê時，相信hiah-ê人會真清楚看著榮耀ê主tī咱ê厝內。當一個家庭有上帝榮耀充滿ê時，試想hit-ê家庭ē-tàng hō͘人看tio̍h什麼？To̍h是無私慾ê罪性kap人生ê一切pháiⁿ品性ê作為，所有ê只是聖靈ê果子，充滿tio̍h喜樂、滿足、善良、疼心、溫柔……等ê良好生活ê表現，這to̍h是上帝榮耀ê偉大作為，雖然屬於上帝ê人，無一定有phông-phài ê財富以及榮耀ê權柄，但是祂會kā比chiah-ê現實ê物質koh-khah寶貴ê人生必需品kap良好ê品德賜hō͘祂所喜樂ê人，人生siōng貴重ê物件，當然是良好ê品性，這kóa良好品性是主耶穌基督賜hō͘信靠祂ê人。可惜ê是現代hiah-ê人往往kap希西家王犯仝款ê têng-tâⁿ，tiāⁿ-tiāⁿ tī面前顯示家己ê才能，像財富、kiáⁿ兒ê成就、事業ê成功、生活ê富裕等等。基督徒ê厝內必須hō͘人看見你ê信仰，用信仰展示未信者ê中間是基督徒生活ê主要課題。有一個旅行者tī美國想beh chhōe出美國成功ê原因，伊tùi交通、銀行、教育、科技lóng chhōe bē-tio̍h，一日中晝kap 一個平凡ê作sit人做伙食飯，先讀一段聖經，然後祈禱，chiah發現tio̍h伊所beh ài ê答案。

結論：家庭是見證上帝ê所在，別人tī lín-tau看見什麼？咱ê厝tī人中間誇口什麼？