《台語網放送頭》

| | || 轉寄

保存阿母ê話,台語系有存在ê使命

過去真濟人問我,lín中山醫若會有台語系?現此時,我攏聽著人家講,你敢是中山醫台語系畢業ê,ia̍h若無母語能力若會chiah-ní好?

這是一個經過濟濟人拍拚所建立ê台語系,我必須愛hō͘大家了解我ê母校中山醫台語系對台灣社會ê意義,自2003年開始,除了培養學生對母語ê專業知識能力外,mā陸續參與母語相關活動,親像逐年攏主協辦「世界台語文化營」kap協助其他相關ê母語活動、參加各種文學獎kap投入母語相關研究,hō͘學生m̄-nā tī校園內學習,koh進一步將所學ê物件回饋hō͘社會大眾,因為án-ni chiah會使hō͘阮運用專業知識kap社會產生連結。另外,學生mā愛通過台客語認證考試來證明家己ê專業,根據教育部表示,大專院校相關科系中之台語鑑別度是中山醫台語系最有指標性。如今,學校董事會用各種理由提案beh停招台語系chham外語系,koh積極要求轉型做語言中心,試問,若無一個系所來規劃培養專業母語人才,kan-na單純靠語言中心beh來推廣,án-ne咱iah-ū jōa-chē氣力通來保存阿母ê話?

願董事會會當看māi阮過去為台灣本土基石所做ê拍拚來手下留情。目前,透過臉書、噗浪等各種管道,學生已經成立自救會,mā懇請關心台灣語文ê朋友們做伙來鬥相共kap讚聲,hō͘ 阮一條堅定ê路繼續為台灣母語拍拚。