《胡文池牧師kap布農族》

| | | 轉寄

我所敬仰ê一位牧長─胡文池牧師

br> 原載一九九0年方向雜誌 盧俊義

認bat胡文池牧師夫婦(牧師娘胡葉寶玉),是一九七四年八月,我自台南神學院畢業受派赴台東縣關山教會牧會時。七月三十日暗時九點,我tòe搬家公司ê貨車來到教會,胡牧師夫婦真熱心地幫助我卸下行李,hō͘我非常深刻ê印象。

Hit時,伊雖然已經退休,但是並無歇睏,猶原tī原住民布農族間來回工作。當時tī關山崁頂山腰有一間孫雅各牧師娘所屬芥菜種會開設ê「關山肺結核病診療中心」,胡牧師每工早起必定上山去為tòa tī hia ê病患(全部是原住民)傳福音。風雨無阻,年節無停。伊講得一嘴流利ê布農族語、日語、英語。許多年經病患第一pái聽伊講道,那會有kui面gōng-gia̍h ê表情睜tio̍h大目chiu看tio̍h伊,m̄敢想像有chiah-ni̍h好聽ê布農話是出自平地人ê口。伊真正是有語文恩賜,一九四七年受派去山地向布農族傳福音,一九四九年,伊就用十七個字母編出布農族語,並極力教授推廣,五年了後就出版布農語聖歌集kap馬太福音傳。為幫助tī布農族參與宣教工作者ê需要,伊出版「布農話入門」一書。致使新舊眾宣教師大得助力。

一副修長ê腳是胡牧師上山去傳福音siōng大ê助力。Tùi關山沿tio̍h彎曲ê山路行到利稻koh再tńg來,每趟往往tio̍h花去一禮拜時間,這其間厝裡全交由牧師娘葉寶玉長老肩挑起來。伊是關山鎮兩位助產士ê一位,非常能幹。伊m̄-nā負擔扶養、管教二男六女,iáu-beh幫助生產。這十年來ê無算, ē-tàng án-ne講tī關山地區四十五歲以下,十歲以上ê人口中,有一半是tùi伊ê手中接生落來ê。。孫雅各牧師娘為幫助貧困原住民得tio̍h khah好ê醫療看護,bat tī關山鎮內開辦一間「瑪利亞產院」,就是聘胡牧師娘負責。

胡牧師一九七一年爭退休了後。猶原協助教會事工。尤其是弱小無牧ê教會伊從來m̄-bat推辭。Bat有一段時間伊kap牧師娘騎tio̍h一部輕小ê機車走台東鹿野教會,每pái關山缺少牧師時,伊lóng是兼負牧養ê職責。去關山牧會ê牧師lóng是會得tio̍h伊夫婦、kiáⁿ婿(林寶屏長老)全家大小無微不至ê關照。伊生活相當khiām,對少年一代之奢侈浪費ê生活態度有淡薄á無掠做當然。對人真有憐憫ê心是我一直學習bē得ê,特別tī-chia記述二事:

一、是發生tī一九六四年九月,伊負笈美國進修一個月了後,突然遭遇tio̍h花蓮卓溪一位山地檢查哨主管ê陷害,講胡牧師將帶原住民起革命,並且以tī原住民一位原住民長老家搜出手榴彈、槍械為證,引起警備總部一度驚慌,包抄卓溪布農族村落。Mā逮捕當時當teh台東軍隊中服預官役ê胡牧師長公子阿仁押到玉里警察分川詢問,胡牧師家則被安全人員抄檢。雖然有幾位原住民長執被拷phah到半死狀態,猶原查不出實證,最後警總發現確實是一件故意構陷,chiah澄清了誤會。胡牧師次年六月自美國tńg來國內知影chit-ê tāi-chì,牧師娘尚且心猶餘悸,牧師卻無koh記恨,並且常tī祈禱中紀念國民黨政府。

二、伊有kúi-nā年時間帶關山肺結核病院ê病患每工早起禮拜,從來m̄-bat驚惶受感染,mā m̄-bat因病患貧困日時頭偷溜出病院到外面工作,食飯kap暗時時間chiah tńg來m̄知歇睏療養ê案例á受氣,伊真有耐心一再勸勉。並設法籌錢協助病患家庭生活所需。有一pái,胡牧師夫婦去美國四個月,託我代為上山去帶病患禮拜。我每pái tùi病院tńg來,就趕緊將衫褲the̍h到厝頂上去涼風晒日認為消毒,chit種驚惶之心hō͘我每pái看tio̍h胡牧師、想tio̍h伊,我心中就會有一股慚愧見笑ê感覺,就愈加肯定tī獻身傳道ê精神毅力上。真正是這代iáu不如頂一代。別人不講。起碼我自已經是án-ne。

今年ê現在tú好是胡牧師八十歲生日,伊目前尚且健壯,我真ǹg望伊ē-tàng koh再拼口氣協助翻譯布農族語舊約聖經,果若án-ne,則是台灣教會之幸mā。