《胡文池牧師kap布農族》

| | || 轉寄

獻身獻力kap獻金─兩位有名ê楷模

(原載一九八二年第一五八三期臺灣教會公報) 馬好留

當我寫本文時,我正參加臺灣神學院ê畢業典禮歸來,麥禮蘭博士以「將生命ê道表明出來」(腓立比書二:16)tī畢業典禮中為題講道,大家真受感動。看見hiah-ni̍h多年輕人自神學系、基督教教育系、音樂系kap夜間部畢業,是一件大喜樂ê事。我深ǹg望chiah-ê少年人,對服事基督kap伊ê教會有大ê貢獻。

典禮中有兩位接受特別ê榮譽神學博士學位,這學位m̄是代表in為教會事奉之開始,卻是tī in tùi傳道生涯中所得tio̍h ê榮譽。Chit兩位接受者駱先春博士kap胡文池博士,同in ê bó͘留hō͘台灣教會一個真好ê楷模─「獻身、獻力kap獻金」。

一九六五-一九六九年期間,我ê家庭kap我tòa-tī台東,阮真歡喜認bat駱牧師kap胡牧師夫婦,chit兩個家庭留hō͘阮真chē感動ê事蹟:

(1)為基督教宣教,in tī一個困難ê時期選擇一個艱難ê所在。Tī一九四0-一九五0年間ê台東之農村非常ê偏僻未開發kap sàn-chhiah。對外交通不便,教育ê設備真受限制。但chit兩個家庭煞去了,並且紮落in ê根,不急tio̍h離開。In愛hiah-ê人ê靈魂,hō͘ in知影基督耶穌ê愛。

(2)in建á有力ê基督化家庭,有家庭崇拜、教導gín-á認bat上帝ê啟示。雖然台東ê學校hit時bōe-sái kap西部ê學校相比。但in ê子女長大了後lóng受好ê教育,kap擁有堅強ê基督教信仰。In中間ê幾位相繼得tio̍h博士學位。

(3)in愛人ê靈魂kap肉體。Tī身軀kap靈性上幫助hiah-ê人。以實際ê行動,kap人分享福音:通過in,有真chē ê人接受耶穌基督永恆ê生命。駱牧師是一個佈道家、教師、語言學家kap音樂家。胡牧師娘是一位助產士不時外出接生。In兩對夫婦全心全意獻身tī上帝ê工作,貢獻in所有ê 才能。

(4)in受山地工作委員會委派,以極微薄待遇做艱難ê工作,當時tī阿美、布農、彪馬、東海岸排灣kap雅美部落ê工作tú開始,in to̍h是參與此工作。Tī真chē村莊,in是第一個將耶穌基督紹介hō͘當地ê人。In lóng無怨言ê工作,kap別人分享極微薄ê收入,不要求更換到koh-khah高薪ê職位,in樂意為實行in ê被呼召á付上代價。

(5)in樂意跨越文化ê障礙,kap人分享基督ê愛。原住民tùi in身上發現真實ê朋友,致使原住民願意學習家己ê語言kap了解in生活ê方式。In ê厝kap心為所有ê人開放。

(6)in ê工作結實累累,in幫助建立真chē ê教會,為數百位新ê基督徒受洗,編輯聖詩創作布農kap阿美族ê文字。胡文池牧師是翻譯布農族新約聖經ê主要負責人。

所有台灣基督長老教會ê份子,tio̍h大大ê感謝chit兩個有名ê家庭。今年是什一增長運動ê「奉獻年」,tī駱牧師kap胡牧師ê家庭,咱會得thang看見án-ne榮耀ê榜樣─「獻身、獻力、獻金」,hō͘咱tòe in ê腳蹤。