《白話字文獻e5文明觀》

| | | 轉寄

第三章 《台灣府城教會報中ê現代醫療衛生書寫》(十)

雖然當時病院lāi-té開始推sak看護婦ê教學kap訓練,總是,早期台灣人對看護婦ê認知,kā歸類tī比較khah低下階層ê工作,認為chit ê職業是teh做人ê奴僕。因為án-ne,教會報開始陸續報導「看護婦」kap「助產婦」ê消息,宣揚看護婦ê利益,以及tī台灣建立「看護學」ê必要。1918年2月教會報刊出<看護婦>,chit篇文章先以字面意思解說「看護婦」ê意義是「好人著照顧病人,勇健ê人著保護有病ê人」,所以是有意義koh利益人ê工作。koh以英國出名ê看護婦「Nai-teng-kek-ní」 作例,鼓勵人做看護婦:

Tī英國五十外年前,有一個出名ê看護婦,名叫「Nai-teng-kek-ní」姑娘。英國政府tùi-tiōng伊ê工,送伊五十萬kho͘。伊用chit chân錢來設立看護婦ê學校。到今á日tī西國做看護婦ê人,khah chē是有學問、聰明ê人。皇帝以及國王ê親人亦bat做看護婦。

這篇文章一方面hō͘讀者了解西方看護婦「Nai-teng-kek-ní」ê故事,一方面亦強調看護婦職業ê尊貴。Sòa--落-來,ti71918年6、7、8月刊載ê<王ê看護婦>是連載性質ê短篇故事,作者「文姑娘」描述英國看護婦kap chit ê細漢cha-po͘ gin-na患者ê故事,kúi篇故事以「你是王所奉差來ê看護婦」做為中心,表達看護婦ê職業是受著王(神)所歡喜、祝福 ê涵義。Chiah ê文章一方面宣傳看護婦職業ê利益、高尚,phah破傳統社會認知ni̍h對看護婦ê既定看法,進一步鼓舞婦女擔任看護婦。
Tī「助產學」方面,台南新樓醫院mā開設「產婆講習所」,tī每年三月kap九月募集產婆講習生。有關「新樓醫院附屬產婆講習所」ê消息亦不時tī教會報ê廣告頁中刊載宣傳。當時ê台灣,婦女因為生產ê艱苦,民間時常有請佛、叫司公作sai ê情形。另外,台灣嬰á ê出生死亡率亦真kôan,所以教會報tiāⁿ-tiāⁿ鼓勵婦女來讀,成作婦人對家庭衛生ê認bat。另外,新樓醫院針對生活艱苦ê婦女來醫院生產,不論是平常ê生產á-sī難產,醫院lóng做免費ê施療、助產, 對貧困ê產婦來講,是chiâⁿ大ê幫贊。綜合頂面所討論ê,「看護婦」ê訓練kap「產婆講習所」ê醫學教育,一方面訓練出初代ê女性醫療人員,一方面亦將護理、助產ê知識帶入民間,對早期台灣女性接觸西式醫療有chiâⁿ大ê影響,ē-sái講是台灣護理教育ê開始。
除了具體ê「看護學」kap「產婦講習所」之外,bē-sái忽略ê是,早期有kúi位女性宣教士對台灣婦女ê醫療、助產亦產生真大ê影響kap貢獻。親像「朱約安」(Miss Joan Stuart)kap「文安」姑娘(Miss Annie E. Butler)是長榮女學校ê教育者,真重視本島女子ê教育,in看出「本島婦人生產真艱苦,koh畏cha-p醫生,甘願死,m̄肯hō͘人táⁿ-tiap」ê情形,所以決心從事助產ê工作,對當時地方難產ê婦女形成真大ê幫贊,ē-sái講是台灣初代ê產婆。 Koh像講「台灣初代女醫」ê「宋牧師娘」 ,伊用婦產科kap小兒科方面ê專業,幫助過chē chē台灣ê婦女,因為當時「台灣ê婦人m̄-ài chiū近男子醫生,有女醫對女性來講是真好親近」。 另外,宋牧師娘mā bat出外行醫、佈道,伊koh將行醫ê經過用白話字書寫tī教會報kap讀者分享。 當時不論tī市鎮á-sī鄉村,伊lóng積極推展婦女醫療ê工作,hō͘人稱做「婦女界ê救星」。 1899年,台南新樓醫院建築完成,宋牧師娘有phah算tī舊底ê「舊樓醫院」創辦「女醫院」ê計畫,亦已經得著英國母會ê支持。可惜伊tī 1901年過身,原本台灣第一間由女醫生主持ê女子病院,soah無機會thang完成。