《巴克禮普世版聖經(試讀本)》

| | | 轉寄

巴克禮普世版(試讀本) 使徒行傳第二十二章

1 Pó-lô kóng, "Kok-ūi hū-ló hiaⁿ-tī ah, chhiáⁿ thiaⁿ góa chit-chūn beh ūi ka-kī piān-kái ê ōe." 2 In thiaⁿ-tio̍h Pó-lô ēng Hi-pek-lâi-ōe tùi in kóng, chiū koh-khah an-chēng lo̍h-lâi. Pó-lô kóng, 3 "Góa chiū-sī Iû-thài-lâng, chhut-sì tī Ki-lī-ka ê Tāi-sò͘, tī chit-ê siâⁿ chò Ka-má-lia̍t ê bûn-tô͘ tióng-tōa, kah kin-á-ji̍t tī chia ê kok-ūi kāng-khoán, ū siū lán chó͘-sian giâm-keh lu̍t-hoat ê kà-sī, jia̍t-sim ho̍k-sāi Siōng-Chú. 4 Góa bat pek-hāi chun-siú chit-ê tō-lí ê lâng hō͘ i sí, bô-lūn lâm-lí lóng lia̍h khí-lâi, kā in koaiⁿ lo̍h-kaⁿ. 5 Chè-si-tiúⁿ kah choân tiúⁿ-ló ê gī-hōe ê lâng lóng ē-tàng ūi góa chò-chèng. Góa mā tùi in the̍h-tio̍h kià hō͘ Tāi-má-sek sìn-tô͘ ê phoe. Góa ū khì hia beh lia̍h tī hia ê sìn-tô͘, kā in tòa lâi Iâ-lō͘-sat-léng siū hêng-hoa̍t."

Pó-lô Kui-Chú ê Keng-kòe (St 9:1-19;26:12-18)
6 Góa kiâⁿ beh kàu Tāi-má-sek ê sî, hit sî chha-put-to sī tiong-tàu, hut-jiân ū chin-kiông ê kng tùi thiⁿ chiò-siā tī góa sì-chiu-ûi. 7 Góa poa̍h lo̍h-khì thô͘-kha, thiaⁿ-tio̍h ū siaⁿ tùi góa kóng, 'Sò-lô, Sò-lô, lí ná-ē pek-hāi góa?' 8 Góa ìn kóng, 'Chú ah, Lí sī siáⁿ-lâng?' I ìn góa kóng, 'Góa chiū-sī lí teh pek-hāi ê Ná-sat-le̍k-lâng Iâ-so͘.' 9 Kah góa chò-hóe ê lâng ū khòaⁿ-tio̍h hit-ê kng, bô thiaⁿ-tio̍h tùi góa kóng-ōe Hit-ūi ê siaⁿ. 10 Góa koh mn̄g kóng, 'Chú ah, góa tio̍h án-chóaⁿ chò?' Chú kā góa kóng, 'Khí-lâi, ji̍p-khì Tāi-má-sek. Tī hia ū-lâng ē kā lí kóng góa beh chí-phài lí khì chò ê tāi-chì.' 11 In-ūi hit-ê kng chin kiông, góa soah piàn chheⁿ-mê, góa ê tâng-phōaⁿ kā góa khan ji̍p-khì Tāi-má-sek." 12 Tī hia ū chi̍t-ê miâ-kiò A-ná-nî-a ê lâng, sī chi̍t-ê chun-siú Mô͘-se lu̍t-hoat koh kèng-khiân ê lâng, chin siū tòa tī hia ê Iû-thài-lâng chun-kèng. 13 I lâi chhōe góa, khiā tī góa ê sin-piⁿ, kā góa kóng, 'Sò-lô hiaⁿ-tī, hō͘ lí koh ē khòaⁿ-kìⁿ.' Góa sûi-sî gia̍h thâu chiū ū khòaⁿ-kìⁿ i. 14 I kóng, "Lán chó͘-sian ê Siōng-Chú í-keng kéng-soán lí lâi chai I ê chí-ì, hō͘ lí khòaⁿ-kìⁿ Hit-ūi kong-gī ê lô͘-po̍k, koh thiaⁿ I ê chhùi só͘ kóng ê ōe, 15 In-ūi lí ē chiong lí só͘ khòaⁿ-tio̍h kah só͘ thiaⁿ-tio̍h-.ê, tùi bān-bîn chò kiàn-chèng. 16 Taⁿ kóaⁿ-kín khí-lâi niá-siū sé-lé, kiû-kiò I ê miâ, lâi sé-chheng lí ê chōe.'"

Pó-lô Khì Tùi Gōa-pang-lâng Thoân-tō
17 Āu-lâi góa tńg-lâi Iâ-lō͘-sat-léng, tī sèng-tiān kî-tó ê sî khòaⁿ-kìⁿ īⁿ-siōng. 18 Góa khòaⁿ-tio̍h Chú tùi góa kóng, "Lí tio̍h kóaⁿ-kín lī-khui Iâ-lō͘-sat-léng, in-ūi chit só͘-chāi ê lâng bô beh chiap-la̍p lí ūi-tio̍h Góa só͘ chò ê kiàn-chèng.' 19 Góa ìn kóng, 'Chú ah, in lóng chai góa í-chêng tī ta̍k-ê hōe-tn̂g, chiong sìn Lí ê lâng koaiⁿ lo̍h-kaⁿ koh kā in phah. 20 Lí ê kiàn-chèng-jîn Su-thê-hoán hō͘ lâng sat-hāi ê sî, góa mā khiā tī piⁿ-á kā in chàn-tông, koh ūi hāi-sí i ê lâng kò͘ gōa-saⁿ.' 21 Chú tùi góa kóng, 'Lí khì, góa beh chhe lí khì hn̄g-hn̄g ê Gōa-pang-lâng hia.'" 22 Chèng-lâng chi̍t-ē thiaⁿ-tio̍h Pó-lô kóng chit-kù ōe, chiū tōa-siaⁿ kóng, "Chit khoán lâng tio̍h tùi tē-chiūⁿ siau-bia̍t, m̄-thang hō͘ i oa̍h lo̍h-khì." 23 Kûn-chiòng tōa-siaⁿ jióng, thǹg gōa-saⁿ, ǹg khong-tiong pōaⁿ thô͘-hún ê sî, 24 kun-koaⁿ chiū bēng-lēng kā Pó-lô tòa ji̍p-khì iâⁿ-pâng, ēng piⁿ kā i phah lâi sím-mn̄g, ài beh chai-iáⁿ ūi-sím-mi̍h Iû-thài-lâng án-ne kā i jióng. 25 In tú beh ēng phôe-tòa kā i pa̍k ê sî, Pó-lô tùi piⁿ-á teh khiā ê kun-koaⁿ kóng, "Tùi chi̍t-ê iáu-bōe siū phòaⁿ-chōe ê Lô-má-lâng, lín ēng piⁿ kā i phah, kám thang?" 26 Hit-ê kun-koaⁿ chi̍t-ē thiaⁿ-tio̍h chiū khì kìⁿ iâⁿ-tiúⁿ kóng, "Taⁿ beh án-chóaⁿ chiah hó? Chit-ê lâng sī Lô-má kong-bîn!" 27 Iâⁿ-tiúⁿ lâi kìⁿ Pó-lô, mn̄g i kóng, "Kā góa kóng, lí kám sī Lô-má kong-bîn?" Pó-lô kóng, "Sī." 28 Iâⁿ-tiúⁿ ìn kóng, "Góa ēng chin-chē gîn chiah bé-tio̍h chit-ê kong-bîn-koân." Pó-lô kóng, "Góa chhut-sì chiū-sī Lô-má kong-bîn." 29 Hiah-ê beh sím-mn̄g Pó-lô ê lâng chiū sûi-sî lī-khui. Iâⁿ-tiúⁿ chi̍t-ē chai-iáⁿ Pó-lô sī Lô-má kong-bîn, koh in-ūi kā i pa̍k teh, chiū chin kiaⁿ.

Pó-lô Tī Gī-hōe Hông Sím-mn̄g
30 Keh-tńg-ji̍t, iâⁿ-tiúⁿ ài beh chai Pó-lô hō͘ Iû-thài-lâng kò ê si̍t-chêng, chiū kā i tháu khui, bēng-lēng chiah-ê chè-si-tiúⁿ kah choân gī-hōe chū-chi̍p, chhōa Pó-lô lo̍h-lâi, hō͘ i khiā tī in ê bīn-chêng.