《巴克禮普世版聖經(試讀本)》

| | | 轉寄

巴克禮普世版(試讀本) 哥林多前書第十章

Kéng-kài Pài Ngó͘-siōng
1 Hiaⁿ-tī chí-mōe ah, góa ài lín ē-kì-tit lán ê chó͘-sian lóng kin-tòe Mô͘-se, tī hûn ê pó-hō͘-hā kòe Âng-hái. 2 In tī hûn-tiong kah hái-ni̍h siū sé-lé kui tī Mô͘-se, 3 In lóng chia̍h kāng-khoán lêng-sèng ê chia̍h-mi̍h, lóng lim kāng-khoán lêng-sèng ê chôaⁿ-chúi. 4 Chit-ê chôaⁿ-chúi sī tùi kah in tâng-kiâⁿ ê hit-tè chio̍h-pôaⁿ lâu-chhut, hit-ê chio̍h-pôaⁿ chiū-sī Ki-tok. 5 M̄-koh in tiong-kan chin-chē lâng hō͘ Siōng-Chú bô hoaⁿ-hí, lóng siū húi-bia̍t, sin-si tò kah kui khòng-iá. 6 Taⁿ chiah-ê tāi-chì hō͘ lán chò kàm-kài, kéng-kài lán m̄-thang chhin-chhiūⁿ in án-ne ài chò pháiⁿ tāi-chì. 7 Lín m̄-thang chhin-chhiūⁿ in tiong-kan chi̍t-kóa lâng khì pài ngó͘-siōng, chiàu Sèng-keng kì-chài: Jîn-bîn chē lo̍h-khì chiū tōa-lim tōa-chia̍h, khiā khí-lâi chiū tian-kông thiàu-bú.( chù: CAK 32:6) 8 Lán mā m̄-thang chhin-chhiūⁿ in tiong-kan ū chi̍t-kóa lâng hoān kan-îm, soah chi̍t ji̍t sí nn̄g-bān saⁿ-chheng lâng. 9 Lán mā m̄-thang chhin-chhiūⁿ in tiong-kan chi̍t-kóa lâng chhì-thàm Chú, soah hō͘ chôa kā-sí. 10 Lín mā m̄-thang chhin-chhiūⁿ in tiong-kan chi̍t-kóa lâng nga̍uh-nga̍uh liām, soah hō͘ chip-hêng húi-bia̍t ê thiⁿ-sài kā in châu-bia̍t. 11 In tú-tio̍h chiah-ê tāi-chì thang chò lâng ê kàm-kài, sòa kì-chài lo̍h-lâi thang kéng-kài lán chiah-ê oa̍h tī boa̍t-sè ê lâng. 12 Só͘-í ka-kī siūⁿ-kóng khiā-chāi ê lâng tio̍h kín-sīn chiah bē poa̍h-tó. 13 Lín só͘ tú-tio̍h ê chhì-thàm lóng sī lâng siông-siông ē tú-tio̍h-.ê. Siōng-Chú sī sìn-si̍t, I bē hō͘ lín tú-tio̍h tam-tng bē khí ê chhì-liān. Lín tī siū chhì-liān ê sî, I ē kā lín khui chi̍t-tiâu lō͘, hō͘ lín jím-siū ē tiâu. 14 Só͘-í, chhin-ài ê hiaⁿ-tī chí-mōe ah, tio̍h siám-phiah pài ngó͘-siōng ê tāi-chì. 15 Góa kā lín tòng-chò bat chêng-lí ê lâng teh kā lín kóng. Góa só͘ kóng ê ōe, lín tio̍h ka-kī phòaⁿ-toàn. 16 Lán teh lim hit-ê chiok-siā ê poe, kám m̄-sī teh hun-hióng Ki-tok ê hoeh? Lán teh chia̍h hit-ê peh-khui ê piáⁿ, kám m̄-sī teh hun-hióng Ki-tok ê seng-khu? 17 In-ūi piáⁿ kan-taⁿ chi̍t-tè, lán sui-jiân chin-chē lâng iáu-koh sī chi̍t thé, in-ūi lán chò-hóe chia̍h kāng chi̍t-tè piáⁿ. 18 Ēng chiàu jio̍k-thé ê Í-sek-lia̍t-lâng chò lē, hiah-ê chia̍h chè-mi̍h ê lâng kám m̄-sī kah chè-tôaⁿ ū koan-hē? 19 Án-ne góa sī teh kóng sím-mi̍h? Kám sī teh kóng ngó͘-siōng kah chè-mi̍h ū sím-mi̍h iàu-kín? 20 M̄-sī, góa sī teh kóng Gōa-pang-lâng só͘ chè ê sī chè kúi, m̄-sī teh chè Siōng-Chú, góa bô ài lín kah kúi kau-chhap. 21 Lín bē-tàng lim Chú ê poe mā lim kúi ê poe; bē-tàng chham-ka Chú ê iàn-se̍k koh chham-ka kúi ê iàn-se̍k. 22 Lán ài beh kek hō͘ Chú siū-khì sī-bô? Lán kám ē pí Chú khah kiông? 23 Ū-lâng kóng, "Ta̍k-hāng tāi-chì lóng thang chò," m̄-koh m̄-sī ta̍k-hāng lóng ū lī-ek. Sui-jiân kóng Ta̍k-hāng tāi-chì lóng thang chò, m̄-koh bô lóng tùi lâng ū pang-chō͘. 24 M̄-thang kiû ka-kī ê lī-ek, tio̍h kiû pa̍t-lâng ê lī-ek. 25 Chhī-tiûⁿ teh bē ê mi̍h lóng thang chia̍h, m̄-bián ūi-tio̍h liông-sim ê iân-kò͘ mn̄g-tang mn̄g-sai. 26 In-ūi Sèng-keng ū kóng: Tē kah tē-chiūⁿ ê bān-bu̍t lóng sī Chú-.ê.( chù: SPh 24:1) 27 Nā ū bī-sìn-chiá chhiáⁿ lín chia̍h-pn̄g, lín nā khì, pâi tī lín bīn-chêng ê mi̍h lóng thang chia̍h. M̄-bián ūi-tio̍h liông-sim ê iân-kò͘ lâi mn̄g-tang mn̄g-sai. 28 M̄-koh nā ū-lâng kā lín kóng, "Chiah-ê chia̍h-mi̍h ū chè-kòe ngó͘-siōng." Án-ne ūi-tio̍h hit-ê kā lín kóng ê lâng kah liông-sim ê iân-kò͘, lín chiū m̄-thang chia̍h. 29 Góa só͘ kóng ê sī chí hit-ê lâng ê liông-sim, m̄-sī lín ê liông-sim. Lín bô-tiāⁿ-tio̍h ē mn̄g kóng, "Góa ê chū-iû ūi sím-mi̍h tio̍h hō͘ pa̍t-lâng ê liông-sim lâi chi-phòe?" 30 Góa nā ēng kám-un ê sim lâi chia̍h hit-ê chè-kòe ngó͘-siōng ê mi̍h, ná-tio̍h hō͘ lâng chí-chek? 31 Só͘-í, lín bô-lūn sī chia̍h sī lim, á-sī chò sím-mi̍h, lóng eng-kai ūi-tio̍h êng-kng Siōng-Chú lâi chò. 32 Bô lūn sī tùi Iû-thài-lâng, Hi-lia̍p-lâng, á-sī Siōng-Chú ê kàu-hōe, lín lóng m̄-thang chiâⁿ-chò in ê chó͘-gāi. 33 Lín tio̍h chiàu góa ê bô͘-iūⁿ khì chò. Ūi-tio̍h hō͘ chèng-lâng hoaⁿ-hí, góa m̄-bat kiû ka-kī ê lī-ek, lóng sī kiû chèng-lâng ê lī-ek, thang hō͘ in tit-kiù.