《巴克禮普世版聖經(試讀本)》

| | | 轉寄

巴克禮普世版(試讀本) 哥林多後書第四章

Hûi-àng-á Lāi-bīn ê Pó-pòe
1 Kì-jiân Siōng-Chú liân-bín goán, chiong chit-ê jīm-bū kau-thok goán, goán chiū bô koh lóe-chì. 2 Goán khì-sak ún-môa koh kiàn-siàu ê hêng-ûi, bô chò khi-phiàn lâng ê tāi-chì, bô oai-khiok Siōng-Chú ê tō-lí, chiū-sī tī Siōng-Chú ê bīn-chêng hián-bêng chin-lí, lâi khé-hoat ta̍k-lâng ê liông-sim. 3 Goán só͘ thoân ê hok-im nā ū jia-khàm bô chheng-chhó, chí-ū teh-beh tîm-lûn ê lâng chiah bô chheng-chhó. 4 Chit sè-kan ê sîn-bêng hō͘ hiah-ê m̄-sìn ê lâng ê sim-lêng chheⁿ-mê, bē-tàng khòaⁿ-kìⁿ hok-im ê kng. Chit-ê hok-im teh kiàn-chèng êng-kng ê Ki-tok. Ki-tok sī Siōng-Chú ê hêng-siōng. 5 Goán m̄-sī teh thoân ka-kī, sī teh thoân Ki-tok Iâ-so͘ sī Chú. Goán ka-kī mā ūi-tio̍h Iâ-so͘ ê iân-kò͘ chò lín ê lô͘-po̍k. 6 Hit-ê bēng-lēng kng tio̍h tùi o͘-àm chiò chhut-lâi ê Siōng-Chú, chiū-sī ēng kng chiò tī lán ê sim-lāi, hō͘ lán jīn-bat Siōng-Chú chiò tī Iâ-so͘ Ki-tok ê bīn hit-ê êng-kng. 7 M̄-koh goán chiah-ê ū chit-chióng sio̍k-lêng pó-pòe ê lâng, tú chhin-chhiūⁿ thô͘ chō ê khì-kū, sī beh piáu-sī hit-ê ke̍k-tōa ê koân-lêng sio̍k Siōng-Chú, m̄-sī sio̍k goán. 8 Goán sî-siông tú-tio̍h hoān-lān, m̄-koh bô khut-ho̍k; tú-tio̍h ûi-lân, m̄-koh bô sit-bāng; 9 tú-tio̍h pek-hāi, m̄-koh bô hō͘ Siōng-Chú pàng-sak; siū phah-tó, m̄-koh bô sí-bông; 10 Goán ē-sí ê seng-khu siông-siông tòa Iâ-so͘ ê sí, hō͘ Iâ-so͘ ê oa̍h-miā mā thang tī goán ê seng-khu hián-bêng. 11 Goán oa̍h tī sè-kan, ūi-tio̍h Iâ-so͘ siông-siông tú-tio̍h sí ê gûi-hiám, thang hō͘ Iâ-so͘ ê oa̍h-miā tī goán ē-sí ê seng-khu hián-bêng chhut-lâi. 12 Án-ne, goán tio̍h tiāⁿ-tiāⁿ bīn-tùi sí-bông, lín khiok in-ūi án-ne tit-tio̍h oa̍h-miā. 13 Sèng-keng kóng, "Góa ū sìn, só͘-í góa chiah kóng."( chù: SPh 116:10[115:1 LXX]) Kin-kì chit-khoán sìn-gióng, goán mā sìn, só͘-í chiah án-ne kóng chhut-lâi. 14 Goán chai, hō͘ Chú Iâ-so͘ koh-oa̍h ê Siōng-Chú mā ē hō͘ goán kah Iâ-so͘ tâng-chê koh-oa̍h, koh ē ín-chhōa goán kah lín chò-hóe khiā tī I ê bīn-chêng. 15 Che it-chhè lóng sī ūi-tio̍h lín, beh hō͘ koh-khah chē lâng tit-tio̍h Siōng-Chú ê un-tián, thang hiàn koh-khah chē ê kám-siā lâi êng-kng Siōng-Chú.

Sìn-gióng ê Seng-oa̍h
16 Só͘-í goán bô lóe-chì, sui-jiân goán ê jio̍k-thé chiām-chiām teh soe-jio̍k, m̄-koh goán ê lāi-sim ji̍t-ji̍t teh ōaⁿ-sin. 17 Goán só͘ siū chiām-sî sió-khóa ê kan-khó͘, sī beh hō͘ goán tit-tio̍h bô-thang pí éng-oán ê tōa êng-kng. 18 Goán só͘ tiōng-sī ê m̄-sī khòaⁿ-ē-tio̍h-.ê, sī khòaⁿ bē-tio̍h-.ê, in-ūi khòaⁿ-ē-tio̍h ê sī chiām-sî, khòaⁿ bē-tio̍h ê sī éng-oán.