《巴克禮普世版聖經(試讀本)》

| | | 轉寄

巴克禮普世版(試讀本) 加拉太書第五章

Ki-tok-tô͘ ê Chū-iû
1 ŪI-tio̍h beh hō͘ lán chū-iû, Ki-tok í-keng kā lán tháu-pàng, só͘-í lín tio̍h khiā hō͘ chāi, m̄-thang koh hō͘ lâng ap-chè chò lô͘-lē. 2 Góa Pó-lô kā lín kóng, lín tio̍h chù-ì thiaⁿ. Lín nā beh siū kat-lé, Ki-tok tùi lín chiū lóng bô lī-ek. 3 Góa koh-chài kiông-tiāu chi̍t-piàn, ta̍k-ê siū kat-lé ê lâng lóng tio̍h chun-siú lu̍t-hoat, ná chhin-chhiūⁿ khiàm-chè tio̍h hêng. 4 Lín chiah-ê siūⁿ-beh khò lu̍t-hoat lâi kah Siōng-Chú kiàn-li̍p hô-hó koan-hē ê lâng, chiū-sī kah Ki-tok toān-choa̍t koan-hē, sit-lo̍h Siōng-Chú ê un-tián. 5 In-ūi lán óa-khò Sèng-Sîn, tùi Sèng-Sîn teh thèng-hāu lán só͘ ǹg-bāng kah Siōng-Chú ū hô-hó ê koan-hē. 6 In-ūi lán nā kah Ki-tok Iâ-so͘ kiat-liân, ū siū kat-lé á bô siū kat-lé lóng bô iàu-kín. Iàu-kín ê sī tùi thiàⁿ-sim piáu-hiān chhut-lâi ê sìn-sim. 7 Lín í-chêng chò-liáu chin hó. Sī siáⁿ-lâng kā lín chó͘-tòng, hō͘ lín bô koh sūn-chiông chin-lí? 8 Hit-ê soeh-ho̍k lín án-ne chò ê, tong-jiân m̄-sī Hit-ūi ho͘-tiàu lín ê Siōng-Chú. 9 Sio̍k-gí kóng, "Tām-po̍h-á ê kàⁿ ē hō͘ kui-sn̂g hoat khí-lâi." 10 Tī Chú ê lāi-bīn góa chhim-sìn, lín kah góa ê siūⁿ-hoat bē kóng ū bô-kāng. Hiah-ê teh kiáu-jiáu lín ê, bô-lūn sī sím-mi̍h lâng, lóng ē siū Siōng-Chú chek-hoa̍t. 11 Hiaⁿ-tī chí-mōe ah, góa nā iáu-koh teh thoân kat-lé, án-chóaⁿ iáu-koh teh siū pek-hāi? Góa nā án-ne chò, soan-iông Ki-tok ê si̍p-jī-kè chiū bē siū-tio̍h chó͘-gāi. 12 Hiah-ê teh kā lín jiáu-loān ê lâng, góa khó͘ in m̄ ka-kī iam khí-lâi. 13 Hiaⁿ-tī chí-mōe ah, Siōng-Chú ho͘-tiàu lín sī beh hō͘ lín tit-tio̍h chū-iû, m̄-koh m̄-thang hō͘ lín ê chū-iû piàn-chò hòng-chiòng jio̍k-thé su-io̍k ê ki-hōe. Tio̍h ēng thiàⁿ-sim lâi hō͘-siōng ho̍k-bū. 14 In-ūi choân-pō͘ lu̍t-hoat pau-hâm tī "Thiàⁿ chhù-piⁿ chhin-chhiūⁿ ka-kī" ê kài-bēng lāi-bīn. 15 Lín tio̍h kín-sīn, lín nā kah khîm-siù kāng-khoán sio-kā sio-thun, kàu-bóe it-tēng ē hō͘-siōng châu-bia̍t.

Sèng-Sîn Kah Lâng ê Pún-sèng
16 Góa ê ì-sù sī: lín tio̍h chiàu Sèng-Sîn ê ín-chhōa lâi seng-oa̍h, choa̍t-tùi m̄-thang kiû boán-chiok ka-kī jio̍k-thé ê su-io̍k. 17 In-ūi jio̍k-thé ê su-io̍k kah Sèng-Sîn hō͘-siōng tùi-khòng. pí-chhú sī tùi-te̍k, hō͘ lín bē-tàng chiàu ka-kī só͘ ì-ài ê khì chò. 18 Lín nā hō͘ Sèng-Sîn ín-chhōa, chiū bián siū lu̍t-hoat ê khòng-chè. 19 Lâng jio̍k-thé ê phín-hēng chin bêng-hián, chiū-sī îm-loān, ù-òe, hò͘ⁿ-sek, 20 pài ngó͘-siōng, kiâⁿ siâ-su̍t, kiat oan-siû, sio-cheⁿ, oàn-hūn, siū-khì, kiat-tóng, hun-phài, chū-su, 21 oàn-tò͘, chiú-chùi, hòng-tōng, í-ki̍p kî-tha lūi-sū ê pháiⁿ-phín-hēng. Góa chêng bat kā lín kéng-kò, taⁿ koh chi̍t-pái kā lín kéng-kò, siông-siông chò chit-khoán tāi-chì ê lâng bē-tàng sêng-chiap Siōng-Chú ê Kok-tō͘. 22 M̄-koh Sèng-Sîn só͘ kiat ê kóe-chí sī: thiàⁿ-sim, hoaⁿ-hí, hô-pêng, jím-nāi, chû-pi, siān-liông, tiong-si̍t, 23 un-jiû kah chún-chat. Chiah-ê hêng-ûi it-poaⁿ ê lu̍t-hoat lóng bô teh kìm-chí. 24 Hiah-ê sio̍k Ki-tok Iâ-so͘ ê lâng, í-keng chiong jio̍k-thé kah i ê chêng-io̍k chò-hóe tèng tī si̍p-jī-kè. 25 Kì-jiân lán khò Sèng-Sîn teh oa̍h, tio̍h chiàu Sèng-Sîn ê ín-chhōa lâi seng-oa̍h. 26 Lán m̄-thang tui-kiû hi-êng, m̄-thang hō͘-siōng kek-khì, mā m̄-thang hō͘-siōng oàn-tò͘.