《巴克禮普世版聖經（試讀本）》

 | | | 轉寄

巴克禮普世版（試讀本） 以弗所書第五章

作者 巴克禮普世版小組 2015.10.04

Tī Kng-bêng Tiong Seng-oa̍h
1 Lín kì-jiân chò Siōng-Chú só͘ thiàⁿ ê kiáⁿ-jî, tio̍h o̍h Siōng-Chú. 2 Kiâⁿ-ta̍h mā tio̍h ū thiàⁿ-sim, chhin-chhiūⁿ Ki-tok bat thiàⁿ lán, ūi-tio̍h lán hi-seng ka-kī ê sèⁿ-miā chò phang-phang ê chè-mi̍h hiàn hō͘ Siōng-Chú. 3 Lín kì-jiân sī Siōng-Chú ê chú-bîn, kan-îm kah it-chhè ê ù-òe, á-sī tham-sim, tī lín tiong-kan liân kóng-khí to m̄-thang. 4 M̄-thang kóng kiàn-siàu kah siâ-îm, á-sī hā-liû ê ōe, tian-tò tio̍h tio̍h kóng kám-siā Siōng-Chú ê ōe. 5 Lín khak-si̍t chai, îm-loān, ù-òe, á-sī tham-loân(che sī chi̍t-chióng ngó͘-siōng chông-pài) ê lâng, lóng bē tit thang chiâⁿ-chò Ki-tok kah Siōng-Chú Kok-tō͘ ê chú-bîn. 6 M̄-thang hō͘ lâng ēng hi-ké ê ōe khi-phiàn, in-ūi Siōng-Chú ê siū-khì ē ūi-tio̍h chiah-ê tāi-chì lîm-kàu tī hiah-ê pōe-ge̍k ê lâng. 7 Só͘-í lín m̄-thang kah hit-khoán lâng lâi-óng. 8 In-ūi lín kòe-khì tī o͘-àm tiong, m̄-koh taⁿ lín chiâⁿ-chò sio̍k Chú ê lâng ū kng-bêng, kiâⁿ-ta̍h tio̍h chiàu kng-bêng ê lâng ê khoán-sit. 9 Kng-bêng só͘ kiat ê kóe-chí chiū-sī liông-siān, kong-gī kah chin-lí. 10 Tio̍h bêng-chhat sím-mi̍h sī Chú só͘ hoaⁿ-hí ê tāi-chì. 11 M̄-thang chham-ú tī o͘-àm tiong teh chò bô lō͘-ēng ê tāi-chì, tian-tò tio̍h kā in chek-pī. 12 In am-am khàm-khàm teh chò ê tāi-chì, liân kóng to kiàn-siàu! 13 It-chhè siū chek-pī chiū ē hō͘ kng hián-bêng chhut-lâi, in-ūi hō͘ kng pho̍k-lō͘ chiū ē hián-bêng. 14 Só͘-í ū chi̍t-kù-ōe án-ne kóng: Teh khùn ê lâng tio̍h chhéⁿ,( chù: ISA 26:19; 51:17; 52:1; 60:1) tùi sí-lâng tiong peh khí-lâi!( chù: ISA 26:19) Ki-tok beh kā lí chiò-kng.( chù: ISA 60:1) 15 Só͘-í, lín tio̍h chim-chiok khòaⁿ lín ê kiâⁿ-ta̍h, m̄-thang chò bô tì-sek ê lâng, tio̍h chhong-bêng ê lâng. 16 Tio̍h pá-ak ki-hōe, in-ūi hiān-kim sī siâ-ok ê sè-tāi. 17 Só͘-í, m̄-thang chò gōng-lâng, tio̍h bêng-pe̍k sím-mi̍h sī Chú ê chí-ì. 18 Mā m̄-thang chiú-chùi, in-ūi chiú-chùi ē kā lín pāi-hoāi, tian-tò tio̍h hō͘ Sèng-Sîn kā lín chhiong-móa. 19 Tio̍h ēng si-phian, ēng sèng-si, ēng lêng-koa, hō͘-siōng tùi-chhiùⁿ, tùi sim-té chhiùⁿ sèng-si kah si-phian lâi o-ló Chú. 20 Tio̍h khò lán ê Chú Iâ-so͘ Ki-tok ê miâ, ūi-tio̍h ta̍k-hāng tāi-chì sî-siông lâi kám-siā Thiⁿ-Pē Siōng-Chú.

Hu-chhe ê Koan-hē
21 Lín tio̍h ēng kèng-ùi Ki-tok ê sim lâi hō͘-siōng sūn-ho̍k. 22 Chò hū-jîn-lâng ê, tio̍h chhin-chhiūⁿ sūn-ho̍k Chú án-ne lâi sūn-ho̍k ka-kī ê tiōng-hu. 23 In-ūi tiōng-hu sī hū-jîn-lâng ê thâu, chhin-chhiūⁿ Ki-tok chò kàu-hōe ê thâu. Ki-tok pún-sin mā-sī Kàu-hōe ê kiù-chú, kàu-hōe chiū-sī I ê thé. 24 Chhin-chhiūⁿ kàu-hōe sūn-ho̍k Ki-tok, chò hū-jîn-lâng ê mā tio̍h sū-sū án-ne sūn-ho̍k tiōng-hu. 25 Chò tiōng-hu ê, lín tio̍h thiàⁿ hū-jîn-lâng, chhin-chhiūⁿ Ki-tok thiàⁿ kàu-hōe, mā ūi-tio̍h kàu-hōe hi-seng ka-kī. 26 Án-ne chò sī beh thong-kòe I ê ōe, ēng chúi sé chheng-khì lâi sèng-hòa kàu-hōe kui hō͘ Siōng-Chú, 27 hō͘ kàu-hōe ū êng-kng, bô ù-tiám, bô jiàu-bûn, á-sī kî-tha khoat-tiám, chiâⁿ-chò sèng-kiat bô khoat-tiám lâi hiàn hō͘ Chú ka-kī. 28 Siāng-khoán, tiōng-hu tio̍h thiàⁿ ka-kī ê hū-jîn-lâng chhin-chhiūⁿ thiàⁿ ka-kī ê seng-khu. Thiàⁿ ka-kī ê hū-jîn-lâng chiū-sī thiàⁿ ka-kī. 29 Bô-lâng oàn-hūn ka-kī ê seng-khu, tian-tò kā i pó-sioh chiàu-kò͘, kah Ki-tok tùi-thāi kàu-hōe kāng-khoán. 30 In-ūi lán sī Ki-tok seng-khu ê pah-thé. 31 Sèng-keng kóng, "In-ūi án-ne, lâng beh lī-khui pē-bú, kah i ê bó͘ kiat-liân, nn̄g-lâng chiâⁿ-chò chi̍t-thé."( chù: CSK 2:24) 32 Chit-tōaⁿ keng-bûn khé-sī chi̍t-ê ke̍k-tōa ê ò-biāu. Chiàu góa ê liáu-kái, che sī teh chí Ki-tok kah kàu-hōe ê koan-hē. 33 Chóng-sī, che mā sek-iōng tī lín ta̍k-lâng. Tiōng-hu tio̍h thiàⁿ i ê hū-jîn-lâng chhin-chhiūⁿ ka-kī; hū-jîn-lâng mā tio̍h kèng-ùi i ê tiōng-hu.