《巴克禮普世版聖經（試讀本）》

 | | | 轉寄

巴克禮普世版（試讀本） 以弗所書第六章

作者 巴克禮普世版小組 2015.10.11

Pē-bú Kah Kiáⁿ-jî ê Koan-hē
1 Chò kiáⁿ-jî ê, tio̍h sūn-ho̍k pē-bú. che sī Ki-tok-tô͘ eng-kai chīn ê pún-hūn. 2 "Tio̍h hàu-kèng pē-bú", che sī thâu chi̍t tiâu hù-tài èng-ín ê kài-bēng. 3 Chiū-sī kóng, "Án-ne lín chiū ē sū-sū heng-thong, tī sè-kan hióng-siū tn̂g hòe-siū."( chù: CAK 20:12; SBK 5:16) 4 Chò lāu-pē ê, lín m̄-thang kek kiáⁿ-jî ê siū-khì. Tio̍h ēng Chú ê kéng-kài kah kà-sī lâi kā in pôe-ióng.

Chú-lâng Kah Lô͘-po̍k ê Koan-hē
5 Chò lô͘-po̍k ê, kah sūn-ho̍k Ki-tok kāng-khoán, tio̍h ēng kiaⁿ-hiâⁿ kah sêng-si̍t ê sim sūn-ho̍k lín tī sè-kan ê chú-lâng. 6 M̄-thang tī lâng ê bīn chêng chò hō͘ lâng khòaⁿ, hō͘ lâng hoaⁿ-hí. Tio̍h chhin-chhiūⁿ chò Ki-tok ê lô͘-po̍k, chun-chiàu Siōng-Chú ê chí-ì sêng-sim sêng-ì lâi chò. 7 Kam-sim lo̍k-ì chīn lô͘-po̍k ê pún-hūn, chhin-chhiūⁿ teh ho̍k-sāi Chú, m̄-sī teh ho̍k-sāi lâng. 8 Tio̍h chai, bô-lūn chò lô͘-po̍k á-sī chū-iû ê lâng, Chú lóng ē chiàu ta̍k-lâng ê kiâⁿ-ta̍h lâi kā in pò-siúⁿ. 9 Chò chú-lâng ê, mā tio̍h án-ne khoán-thāi lô͘-po̍k, m̄-thang kā in tōa-siaⁿ khióng-hat. Tio̍h chai, in kah lín lóng sio̍k kāng chi̍t-ūi thiⁿ-téng ê Chú. Chú ēng kāng-khoán ê thāi-tō͘ tùi-thāi múi chi̍t-ê lâng.

Siōng-Chú Só͘ Sù Choân-thò ê Bú-chong
10 Chòe-āu, góa khó͘-khǹg lín tio̍h kah Chú kiat-liân, khò I koân-lêng ê khùi-la̍t lâi chiâⁿ-chò kian-kiông ê lâng. 11 Tio̍h chhēng Siōng-Chú só͘ sù choân-hù ê chiàn-kah, hō͘ lín ē-tàng khiā-chāi, lâi tí-khòng Mô͘-kúi ê khúi-kè. 12 In-ūi lán m̄-sī kah hiat-khì ê lâng kau-chiàn, lán ê tùi-te̍k sī thian-kài ê siâ-lêng, chiū-sī chit-ê o͘-àm sè-tāi ê ú-tiū ê koân-lêng-chiá, chip-chèng-chiá, chiáng-koân-chiá. 13 Só͘-í tio̍h chhēng Siōng-Chú só͘ sù choân-hù ê chiàn-kah, thang tī siâ-ok ê ji̍t-chí ē-tàng tí-khòng tùi-te̍k ê kong-kek, chiàn-tàu kàu-té, khiā-chāi siú-tiâu tīn-tē. 14 Só͘-í lín tio̍h khiā hō͘ i chāi, ēng chin-lí chò tòa hâ io, ēng chèng-gī chò chiàn-kah chhēng, 15 ēng sûi-sî soan-iông hô-pêng ê hok-im chò ê lâi chhēng. 16 Koh tio̍h put-sî ēng sìn-sim chò tîn-pâi, chiah ē-tàng phah-bia̍t siâ-ok-chiá ê hóe-chìⁿ. 17 Koh ēng chín-kiù chò thâu-khoe, ēng Sèng-Sîn chò kiàm, chiū-sī Siōng-Chú ê ōe. 18 Tio̍h khò Sèng-Sîn choân-sim kî-tó, siông-siông khún-kiû. Tio̍h put-sî kéng-séng, sî-siông ūi-tio̍h só͘-ū ê sìn-tô͘ kî-tó. 19 Mā chhiáⁿ ūi-tio̍h góa kî-tó, kiû Siōng-Chú sù góa sìn-sit, thang hó-táⁿ khui-chhùi soan-káng hok-im ê ò-biāu. 20 Ūi-tio̍h chit-ê hok-im, góa chit-má chò chi̍t-ê kòa thih-liān ê tāi-sài, mā tio̍h ūi góa khún-kiû Siōng-Chú sù góa ē-tàng hó-táⁿ lâi soan-iông góa eng-kai kóng ê sìn-sit.

Chòe-āu ê Chhéng-an
21 Lán só͘ thiàⁿ ê hiaⁿ-tī, mā sī tiong-si̍t ê chhe-ēng Chhui-ki-kó͘, ē kā lín pò-kò góa ê tāi-chì kah góa ê kīn-hóng. 22 Ūi-tio̍h án-ne, góa chhe i khì lín hia, sī beh pò lín chai goán ê tāi-chì, thang hō͘ lín an-sim. 23 Goān Thiⁿ-Pē Siōng-Chú kah Chú Iâ-so͘ Ki-tok sù pêng-an, thiàⁿ-sim kah sìn-sim hō͘ chèng hiaⁿ-tī chí-mōe! 24 Goān Siōng-Chú ê un-tián kah só͘-ū ēng put-piàn ê thiàⁿ-sim lâi thiàⁿ Chú Iâ-so͘ Ki-tok ê lâng tông-chāi!