《巴克禮普世版聖經(試讀本)》

| | | 轉寄

巴克禮普世版(試讀本)_馬太福音第17章

1, Koe3lak8 ji̍t, Iâ-so͘ lēng-gōa tòa Pí-tek, Ngá-kok, kap Ngá-kok ê hiaⁿ-tī Iok-hān, chhōa in peh-chiūⁿ koân soaⁿ;
2, tng in ê bīn-chêng hêng-chōng piàn-ōaⁿ, I ê bīn kng iàⁿ-iàⁿ, chhin-chhiūⁿ ji̍t, I ê saⁿ pe̍h, chhin-chhiūⁿ kng.
3, Hut-jiân ū Mô͘-se, Í-lī-a tùi in hián-hiān, kap I kóng ōe.
4, Pí-tek ìn Iâ-so͘ kóng, Chú ah, lán tī chia chin hó; lí nā ài, góa boeh tī chia tah saⁿ keng liâu-á; chi̍t keng hō͘ lí, chi̍t keng hō͘ Mô͘-se, chi̍t keng hō͘ Í-lī-a.
5, I iáu teh kóng ē ê sî, hut-jiân ū kng-kng ê hûn tà in, koh ū siaⁿ tùi hûn-ni̍h chhut, kóng, Chit-ê sī góa thiàⁿ ê Kiáⁿ, góa só͘ hoaⁿ-hí ê; lín tio̍h thiaⁿ I.
6, Bûn-tô͘ thiaⁿ-tio̍h, chiū phak-lo̍h-khì, chīn-chāi kiaⁿ.
7, Iâ-so͘ chìn-chêng bong in, kóng, Khí-lâi, m̄-bián kiaⁿ.
8, In kia̍h ba̍k, bô khòaⁿ-tio̍h chi̍t lâng, chí-ū Iâ-so͘ nā-tiāⁿ.
9, Lo̍h soaⁿ ê sî Iâ-so͘ bēng-lēng in, kóng, Jîn-chú iáu-bē tùi sí-lâng tiong koh-oa̍h, bo̍h-tit ēng só͘ khòaⁿ-tio̍h ê kā lâng kóng.
10, I ê bûn-tô͘ mn̄g I kóng, Án-ne chiū keng-ha̍k-kàu-su kóng Í-lī-a tio̍h seng lâi, sī cháiⁿ-iūⁿ?
11, I ìn kóng, Í-lī-a kó-jiân lâi, boeh heng-khí bān-hāng sū;
12, tān-sī góa kā lín kóng, Í-lī-a í-keng lâi, iā in m̄ bat i; chiàu in só͘ ài lâi khoán-thāi i; chhin-chhiūⁿ án-ne Jîn-chú iā boeh siū in ê hām-hāi.
13, Bûn-tô͘ chiah ē hiáu-tit I só͘ kā in kóng ê, sī chí kiâⁿ sé-lé Iok-hān.
14, Í-keng kàu chèng lâng hia, ū chi̍t lâng chiū-kūn I, kūi I kóng,
15, Chú ah, lîn-bín góa ê kiáⁿ, in-ūi i iûⁿ-hîn chin kan-khó͘; ta̍uh-ta̍uh poa̍h-lo̍h hóe, ta̍uh-ta̍uh poa̍h-lo̍h chúi.
16, Góa chhōa i chiū-kūn lí ê bûn-tô͘, in bōe-ōe i-hó i.
17, Iâ-so͘ ìn kóng, Hàiⁿ ah! m̄ sìn koh pōe-ge̍k ê sè-tāi ah, góa boeh kap lín tòa jōa kú? góa boeh thun-lún lín jōa kú? tòa i lâi chia chiū-kūn góa.
18, Iâ-so͘ chek-pī kúi; kúi chiū tùi i chhut; tùi hit chi̍t sî gín-ná chiū hó.
19, Hit sî bûn-tô͘ thau-thau-á chiū-kūn Iâ-so͘ kóng, Goán cháiⁿ-iūⁿ bē kóaⁿ i?
20, I kā in kóng, Sī ūi-tio̍h lín ê sió sìn; góa si̍t-chāi kā lín kóng, Lín nā ū sìn chhin-chhiūⁿ chi̍t lia̍p kòa-chhài chí, lín chiū boeh kā chit-ê soaⁿ kóng, Tùi chia sóa khì hia, iā boeh sóa khì; koh lín teh-boeh bô chi̍t hāng bōe.
21,22, In iáu tòa Ka-lī-lī-séng ê sî, Iâ-so͘ kā bûn-tô͘ kóng, Jîn-chú boeh siū sàng-kau tī lâng ê chhiú.
23, In boeh thâi I, tē saⁿ ji̍t koh-oa̍h. Bûn-tô͘ chin iu-būn.
24, In kàu Ka-pek-lông, ū siu teng-sè ê chiū-kūn Pí-tek, kóng, Lín sian-siⁿ kiám bô la̍p teng-sè mah? i kóng, Ū.
25, Í-keng ji̍p chhù, Iâ-so͘ tāi-seng kā i kóng, Se-bûn ah, lí phah-sǹg cháiⁿ-iūⁿ? Sè-chiūⁿ chiah-ê ông, tùi siáⁿ-lâng siu hiòng kap thiu teng-sè? sī tùi ka-kī ê kiáⁿ-jî, á-sī tùi gōa-bīn lâng ah?
26, I chi̍t-ē kóng, Tùi gōa-bīn lâng. Iâ-so͘ chiū kā i kóng, Tān-sī án-ne, chiū kiáⁿ-jî thang m̄ bián.
27, Tān-sī bián-tì that-gāi in, lí khì hái-ni̍h pàng tiò, lia̍h tāi-seng chiūⁿ-tiò ê hî, khui i ê chhùi, boeh tit-tio̍h gûn chi̍t ê; the̍h-lâi, ūi-tio̍h góa kap lí la̍p hō͘ in.