《巴克禮普世版聖經(試讀本)》

| | | 轉寄

巴克禮普世版(試讀本) 帖撒羅尼迦後書第一章

1 Góa Pó-lô kah Se-lah í-ki̍p Thê-mô͘-thài siá phoe hō͘ Thiap-sat-lô-nî-ka sio̍k Thiⁿ-Pē Siōng-Chú kah Chú Iâ-so͘ Ki-tok ê kàu-hōe. 2 Goān lín tùi Thiⁿ-Pē Siōng-Chú kah Chú Iâ-so͘ Ki-tok tit-tio̍h un-tián kah pêng-an.

Ki-tok Chài-lîm Hit Sî ê Sím-phòaⁿ
3 Hiaⁿ-tī chí-mōe ah, goán eng-kai ūi-tio̍h lín put-sî kám-siā Siōng-Chú, án-ne chò sī tong-jiân, in-ūi lín ê sìn-sim ū tōa sêng-tióng, lín sio-thiàⁿ ê sim mā it-ti̍t teh ke-thiⁿ. 4 Só͘-í goán tī Siōng-Chú ê chèng kàu-hōe lóng ēng lín lâi chò khoa-kháu, in-ūi lín siū pek-hāi kah jím-siū hoān-lān ê sî, ū pó-chhî jím-nāi kah sìn-sim. 5 Che chèng-bêng Siōng-Chú phòaⁿ-tēng lín ē-kham-tit sêng-siū Siōng-Chú ê Kok-tō͘, lín chiū-sī ūi-tio̍h che teh kè-sio̍k siū-khó͘. 6 In-ūi Siōng-Chú chiàu kong-gī teh sím-phòaⁿ, ē ēng chai-lān pò-èng hiah-ê hō͘ lín tú-tio̍h chai-lān ê lâng, 7 mā hō͘ lín chiah-ê tú-tio̍h chai-lān ê lâng, kah goán tâng-chê tit-tio̍h an-hioh, chiū-sī tī Chú Iâ-so͘ kah ū koân-lêng ê thiⁿ-sài tī hóe-iām tiong tùi thiⁿ hián-hiān ê sî, thang kah goán chò-hóe tit-tio̍h tháu-pàng. 8 Hit sî, I ē hêng-hoa̍t hiah-ê m̄-bat Siōng-Chú kah m̄ sūn-ho̍k lán ê Chú Iâ-so͘ ê hok-im ê lâng. 9 Chit-chióng lâng ē siū éng-oán bia̍t-bông ê hêng-hoa̍t, kah Siōng-Chú keh-lī, lī-khui I êng-iāu ê khùi-la̍t. 10 Chú chài-lîm ê ji̍t, I tùi chiah-ê sìn-tô͘ tit-tio̍h êng-iāu, koh tit-tio̍h só͘-ū sìn I ê lâng o-ló, in-ūi lín ū sìn goán tùi lín só͘ chò ê kiàn-chèng. 11 Ūi-tio̍h án-ne, goán mā put-sî thè lín kî-tó, goān lán ê Siōng-Chú hō͘ lín ê seng-oa̍h ē hû-ha̍p I ê ho͘-tiàu, mā siúⁿ-sù lín ū khùi-la̍t lâi oân-sêng it-chhè hiòng-siān ê goān-bōng kah khò sìn-sim só͘ chò ê kang, 12 thang hō͘ lán ê Chú Iâ-so͘ ê miâ tùi lín tit-tio̍h êng-kng, lín mā tùi I tit-tio̍h êng-kng. Che lón sī lán ê Siōng-Chú kah Chú Iâ-so͘ Ki-tok ê un-tián.