《巴克禮普世版聖經(試讀本)》

| | | 轉寄

巴克禮普世版(試讀本) 提多書第二章

Kiān-choân ê Kàu-gī
1 Chóng-sī lí ê kà-sī tio̍h hû-ha̍p kiān-choân ê kàu-gī. 2 Tio̍h khǹg lāu-lâng m̄-thang ài lîm-chiú, tio̍h toan-chong siú-kí, koh ū sûn-choân ê sìn-gióng, thiàⁿ-sim kah nāi-sim. 3 Mā tio̍h án-ne khǹg lāu hū-jîn-lâng, giân-hêng kú-chí tio̍h ha̍h tī kèng-khiân ê sìn-gióng, m̄-thang húi-pòng, mā m̄-thang chò chiú-kúi, tio̍h chò hó bô͘-hoān lâi kà-sī lâng, 4 chiah ē-tàng kà-sī siàu-liân ê hū-jîn-lâng thiàⁿ in ê tiōng-hu, thiàⁿ in ê kiáⁿ-jî, 5 koh tio̍h siú-kí, cheng-kiat, liāu-lí ka-sū, siān-liông, sūn-ho̍k ka-kī ê tiōng-hu, bián-tit Siōng-Chú ê tō-lí siū húi-pòng. 6 Lí mā tio̍h án-ne khǹg siàu-liân ê cha-po͘-lâng siú-kí. 7 Lí ta̍k-hāng tāi-chì tio̍h ka-kī chò hó bô͘-hoān, kà-sī lâng ê sî tio̍h sêng-khún toan-chong, 8 giân-sû tio̍h toan-chiàⁿ bô thang hō͘ lâng chí-chek, hō͘ hoán-tùi ê lâng bô teh thang kóng lán ê pháiⁿ-ōe soah ka-kī kám-kak kiàn-siàu. 9 Tio̍h khǹg lô͘-po̍k tio̍h sūn-ho̍k chú-lâng, ta̍k-hāng tāi-chì hō͘ in hoaⁿ-hí, bô ìn-chhùi ìn-chi̍h, 10 m̄-thang thau-the̍h, tio̍h piáu-hiān cha̍p-hun ê tiong-sìn, thang hō͘ lán ê Kiù-Chú Siōng-Chú ê kà-sī tī ta̍k hong-bīn koh-khah kong-chhái. 11 In-ūi Siōng-Chú chín-kiù choân jîn-lūi ê un-tián í-keng hián-bêng chhut-lâi. 12 Chit-ê un-tián kéng-kài lán tio̍h khì-sak bô kèng-khiân ê seng-oa̍h kah sio̍k-sè ê su-io̍k, tī chit-ê sè-kan kòe siú-kí, kong-gī kah kèng-khiân ê seng-oa̍h. 13 Án-ne lâi thèng-hāu hit-ê chhiong-móa hok-khì ê ǹg-bāng, chiū-sī lán chì-chun ê Siōng-Chú kah Kiù-Chú Iâ-so͘ Ki-tok êng-kng ê hián-hiān. 14 Ki-tok ūi-tio̍h lán hiàn ka-kī ê sèⁿ-miā sī beh kiù-sio̍k lán thoat-lī it-chhè ê chōe-ok, hō͘ lán chiâⁿ-chò I sûn-kiat ê chú-bîn, thang jia̍t-sim chò hó-sū. 15 Chiah-ê tāi-chì lí tio̍h kóng, tio̍h khó͘-khǹg, chhiong-hun ūn-iōng lí ê chit-koân lâi chek-pī lâng. M̄-thang hō͘ lâng kā lí khòaⁿ-khin.