《巴克禮普世版聖經(試讀本)》

| | | 轉寄

巴克禮普世版(試讀本) 希伯來書第一章

1 Siōng-tè Thong-kòe I ê Kiáⁿ Tùi Lán Kóng-ōe Kó͘-chá Siōng-Chú thok chèng sian-ti ēng kok-chióng hong-hoat tùi lán ê chó͘-sian kóng-ōe. 2 M̄-koh tī chit-ê boa̍t-sè, thong-kòe I ê Kiáⁿ tùi lán kóng-ōe. Siōng-Chú ū siat-li̍p I lâi sêng-chiap bān-bu̍t, koh ū thong-kòe I lâi chhòng-chō chit-ê sè-kài. 3 Ki-tok hoán-èng Siōng-Chú ê êng-iāu, sī Siōng-Chú pún-chit ê chin-siōng. I ēng I koân-lêng ê ōe teh î-chhî bān-bu̍t ê tia̍t-sū, sé-tû jîn-lūi ê chōe liáu-āu, taⁿ chē tī chì-koân chì-chun Siōng-Chú ê chiàⁿ-pêng.

Sèng-Kiáⁿ Pí Thiⁿ-sài Khah Úi-tāi
4 Siōng-Chú thê-seng Sèng-Kiáⁿ ê tē-ūi, hō͘ I pí chèng thiⁿ-sài khah chun-kùi, tú chhin-chhiūⁿ Siōng-Chú só͘ siúⁿ-sù I ê miâ pí thiⁿ-sài khah úi-tāi. 5 Siōng-Chú kám bat tùi tó chi̍t-ê thiⁿ-sài kóng, "Lí sī Góa ê kiáⁿ, Góa kin-á-ji̍t chò lí ê lāu-pē?"( chù: SPh 2:7) Mā m̄-bat chí jīm-hô chi̍t-ê thiⁿ-sài kóng, "Góa beh chò i ê Thiⁿ-Pē, i beh chò Góa ê kiáⁿ."( chù: SBS 7:14; LTS 17:13) 6 Kàu Siōng-Chú teh-beh chhōa I ê Sèng-Kiáⁿ ji̍p sè-kan ê sî, kóng, "Siōng-Chú só͘-ū ê thiⁿ-sài lóng tio̍h kèng-pài I."( chù: SBK 32:43; SPh 97:7 LXX) 7 Koan-hē thiⁿ-sài, Siōng-Chú kóng, "Siōng-Chú ēng I ê thiⁿ-sài chò hong, ēng hóe-iām chò I ê chhe-ēng."( chù: SPh 104:4) 8 M̄-koh koan-hē Sèng-Kiáⁿ khiok kóng, "Siōng-Chú ah, Lí ê pó-chō éng-oán chûn-chāi, Lí kok-tō͘ ê koân-pèng sī chèng-ti̍t. 9 Lí ài kong-gī, oàn-hūn put-hoat, só͘-í Siōng-Chú, lí ê Siōng-Chú, ēng hoaⁿ-hí ê iû boah lí, Iâⁿ-kòe boah lí ê tâng-phōaⁿ.( chù: SPh 45:6-7) 10 Koh kóng, "Chú ah, Lí tī khí-chho͘ ū chhòng-chō tē, thiⁿ mā sī lí ê chhiú só͘ chō-.ê. 11 Thiⁿ kah tē ē siau-bia̍t, Lí khiok ē kú-tn̂g chûn-chāi. Thiⁿ kah tē lóng ē chhin-chhiūⁿ saⁿ-khò͘ chiām-chiām kū khì. 12 Lí ē chiong thiⁿ kah tē chhin-chhiūⁿ teh kńg gōa-saⁿ kā in kńg khí-lâi, in chiū ē piàn-ōaⁿ. Chóng-sī Lí éng-oán bē piàn-ōaⁿ, Lí ê hòe-siū bû-kiông bû-chīn.( chù: SPh 102:25-27) 13 Siōng-Chú kám bat tùi tó chi̍t-ê thiⁿ-sài kóng, "Chē tī Góa ê chiàⁿ-pêng, ti̍t-kàu Góa hō͘ lí ê tùi-te̍k khut-ho̍k tī lí ê kha-ē."?( chù:SPh 110:1) 14 Thiⁿ-sài kám m̄-sī lóng teh chò Siōng-Chú chhe-ēng ê Sèng-Sîn, siū chhe-phài lâi ho̍k-sāi teh-beh niá-siū chín-kiù ê lâng?