《巴克禮普世版聖經(試讀本)》

| | | 轉寄

巴克禮普世版(試讀本) 希伯來書第二章

Úi-tāi ê Chín-kiù
1 Só͘-í lán tio̍h koh-khah kian-siú só͘ thiaⁿ-tio̍h ê sìn-sit, chiah bián-tit phian-lī chin-tō. 2 In-ūi thong-kòe thiⁿ-sài só͘ thoân ê sìn-sit sī chin ê, pōe-ge̍k bô sūn-ho̍k ê lâng lóng tio̍h siū èng-tit ê pò-èng. 3 Án-ne lán nā hut-lio̍k chiah-ni̍h-tōa ê chín-kiù, kám ē-tàng tô-siám èng-tit ê hêng-hoa̍t? Chú pún-sin khí-thâu to̍h ū kóng-khí chit-ê chín-kiù, hiah-ê thiaⁿ-kìⁿ ê lâng mā ū kā lán chèng-si̍t chit-ê tāi-chì. 4 Siōng-Chú koh ū ēng sîn-jiah, kî-sū, ta̍k-khoán tōa-koân-lêng ê chok-ûi kah chiàu I ka-kī ê chí-ì hun-phòe Sèng-Sîn hō͘ lán ê siúⁿ-sù, lóng chò-hóe chò-chèng.

Chín-kiù ê Khai-thok-chiá
5 Siōng-Chú pēng bô chiong só͘ kóng teh-beh lâi ê sè-kài kau hō͘ thiⁿ-sài koán-lí. 6 M̄-koh Sèng-keng ū chi̍t-ê só͘-chāi kóng, "Lâng sī sím-mi̍h, Lí kéng-jiân kā i koan-hoâi? Lâng ê kiáⁿ sī sím-mi̍h, Lí kéng-jiân kā i khòaⁿ-kò͘?" 7 Lí hō͘ i sió-khóa khah-su thiⁿ-sài, Koh ēng êng-kng kah chun-kùi hō͘ i chò hoa-koan, 8 hō͘ i koán-hat bān-bu̍t.( chù: SPh 8:4-6) Siōng-Chú hō͘ lâng koán-hat bān-bu̍t, án-ne bêng-bêng pau-hâm it-chhè ê mi̍h, m̄-koh kàu taⁿ lán iáu-bōe khòaⁿ-tio̍h ū-lâng teh koán-hat bān-bu̍t. 9 Lán khòaⁿ-kìⁿ hit-ê chiâⁿ-chò lâng chiām-sî sió-khóa khah-su thiⁿ-sài ê Iâ-so͘ í-keng keng-kòe sí-bông ê kan-khó͘, tit-tio̍h êng-kng kah chun-kùi ê hoa-koan. I án-ne óa-khò Siōng-Chú ê un-tián thang ūi-tio̍h chèng-lâng lâi sí. 10 Hit-ūi chhòng-chō koh î-chhî bān-bu̍t ê Siōng-Chú, ūi-tio̍h beh chhōa chin-chē kiáⁿ-jî chìn-ji̍p êng-kng, chiah tio̍h hō͘ chín-kiù ê khai-thok-chiá Iâ-so͘ tùi khó͘-lān lâi sêng-choân. Siōng-Chú án-ne chò sī ū sek-tòng. 11 Sū-si̍t-siōng, hit-ê hō͘ lâng chiâⁿ-sèng ê kah hiah-ê tit-tio̍h chiâⁿ-sèng ê lóng tùi kāng-chi̍t-ê goân-thâu chhut, in-ūi án-ne, Iâ-so͘ chheng in chò hiaⁿ-tī pēng bô kám-kak kiàn-siàu. 12 Iâ-so͘ tùi Siōng-Chú kóng: Góa beh tùi Góa ê hiaⁿ-tī chí-mōe pò-iông Lí ê miâ, Tī hōe-chiòng ê bīn-chêng o-ló Lí ê miâ.( chù: SPh 22:22) 13 Iâ-so͘ koh kóng, "Góa beh sìn-khò Siōng-Chú."( chù: ISA 8:17 LXX) Iū-koh kóng, " Khòaⁿ ah! Góa kah Siōng-Chú só͘ hō͘ Góa ê kiáⁿ-jî lóng tī chia."( chù: ISA 8:18) 14 Kì-jiân kiáⁿ-jî lóng sī ū hoeh ū bah ê lâng, Iâ-so͘ pún-sin mā kāng-khoán chiâⁿ-chò ū hoeh ū bah ê lâng. ŪI-tio̍h beh thong-kòe I ê sí lâi húi-bia̍t hit-ê chiáng-koán sí-bông ê Mô͘-kúi, 15 koh tháu-pàng hiah-ê it-seng kiaⁿ-hiâⁿ teh chò sí-bông lô͘-lē ê lâng. 16 Tong-jiân Iâ-so͘ teh koan-sim ê m̄-sī thiⁿ-sài, sī A-pek-la̍h-hán ê kiáⁿ-sun. 17 Só͘-í Iâ-so͘ tī ta̍k hong-bīn lóng tio̍h kah hiaⁿ-tī chí-mōe kāng-khoán, chiah ē-tàng tī Siōng-Chú ê bīn-chêng chò jîn-chû koh tiong-si̍t ê chè-si-tiúⁿ, thang hō͘ chèng-lâng ê chōe tit-tio̍h sià-bián. 18 In-ūi Iâ-so͘ ū chhin-sin keng-le̍k siū-khó͘ kah chhì-thàm, chiū ē-tàng pang-chō͘ hiah-ê siū chhì-thàm ê lâng.