《巴克禮普世版聖經(試讀本)》

| | | 轉寄

巴克禮普世版(試讀本) 彼得前書第五章

Siōng-Chú ê Iûⁿ-kûn Góa chit-má ēng tiúⁿ-ló ê sin-hūn khó͘-khǹg lín 1 tiong-kan ê tiúⁿ-ló. Góa koh sī Ki-tok siū-khó͘ ê kiàn-chèng-jîn, mā chò-hóe ū hūn teh-beh hián-hiān ê êng-kng. 2 Lín tio̍h bo̍k-ióng Siōng-Chú kau-tài lín ê iûⁿ-kûn, kā in chiàu-kò͘. M̄-sī bián-kióng, sī chiàu Siōng-Chú ê chí-ì kam-sim-lo̍k-ì. M̄-sī ūi-tio̍h tham-châi, sī hoaⁿ-hí lâi sū-hōng. 3 Mā m̄-sī chò Siōng-Chú kau-tài lín ê iûⁿ-kûn ê chú-lâng lâi kā in koán-hat, tio̍h chò in ê bô͘-iūⁿ. 4 Án-ne tī Tōa-Bo̍k-chiá hián-hiān ê sî, lín chiah ē tit-tio̍h bē sit-khì kong-chhái ê êng-koan. 5 Kah án-ne kāng-khoán, lín siàu-liân-lâng tio̍h sūn-ho̍k tióng-pòe. Lín tāi-ke tio̍h khiam-sùn hō͘-siōng tùi-thāi, in-ūi Sèng-keng ū kì-chài kóng, "Siōng-Chú kah kiau-ngō͘ ê lâng tùi-te̍k, siúⁿ-sù un-tián hō͘ khiam-pi ê lâng." 6 Só͘-í lín tio̍h tī Siōng-Chú tōa khùi-la̍t ê chhiú-ē ka-kī khiam-pi, I kàu-sî ē kā lín ko-seng. 7 Lín tio̍h chiong it-chhè ê chhau-hoân kau-thok hō͘ Siōng-Chú, in-ūi I koan-sim lín. 8 Tio̍h kín-sīn, tio̍h kéng-séng, in-ūi lín ê tùi-te̍k Mô͘-kúi chhin-chhiūⁿ teh háu ê sai, sì-kè kiâⁿ teh chhōe thang thun-chia̍h ê lâng. 9 Tio̍h khò kian-tēng ê sìn-sim lâi tí-khòng i, lín chai choân sè-kài ê hiaⁿ-tī chí-mōe lóng teh siū kāng-khoán ê khó͘-lān. 10 M̄-koh tán lín chiām-sî siū-khó͘ liáu-āu, siúⁿ-sù it-chhè un-tián ê Siōng-Chú, chiū-sī thong-kòe Ki-tok ho͘-tiàu lín tit-tio̍h I éng-oán ê êng-kng ê Hit-ūi, ē chhin-sin sù lín khùi-la̍t lâi têng-sin kiàn-li̍p kian-kò͘ ê ki-chhó͘. 11 Goān koân-lêng kui hō͘ Siōng-Chú ti̍t-kàu éng-oán. Amen!

Chòe-āu ê Chhéng-an
12 Thong-kòe tiong-si̍t ê hiaⁿ-tī Se-lah, góa siá chit-tiuⁿ té-té ê phoe hō͘ lín, lâi bián-lē lín, mā kiàn-chèng che sī Siōng-Chú chin-si̍t ê un-tián. Lín tio̍h tī chit-ê un-tián téng-bīn khiā-chāi. 13 Tiàm-tī Pa-pí-lûn kah lín pêⁿ-pêⁿ siū kéng-soán ê kàu-hōe í-ki̍p góa ê kiáⁿ Má-khó kā lín chhéng-an. 14 Lín tio̍h ēng thiàⁿ-sim ê sio-chim lâi hō͘-siōng chhéng-an. Goān só͘-ū sio̍k Ki-tok ê lâng lóng tit-tio̍h pêng-an!