《巴克禮普世版聖經（試讀本）》

 | | | 轉寄

巴克禮普世版（試讀本） 約翰一書第五章

作者 巴克禮普世版小組 2016.12.12

Iâⁿ-kòe Sè-kan
1 Sìn Iâ-so͘ sī Ki-tok ê lâng lóng sī Siōng-Chú ê kiáⁿ-jî. Thiàⁿ pē-bú ê mā ē thiàⁿ i só͘ seⁿ ê kiáⁿ-jî. 2 Lán nā thiàⁿ Siōng-Chú koh chun-siú I ê kài-bēng, án-ne lán chiū chai lán ū teh thiàⁿ Siōng-Chú ê kiáⁿ-jî. 3 Chun-siú Siōng-Chú ê kài-bēng chiū-sī thiàⁿ Siōng-Chú. I ê kài-bēng m̄-sī oh chun-siú-.ê. 4 In-ūi Siōng-Chú ê kiáⁿ-jî lóng ē-tàng iâⁿ-kòe sè-kan. Lán ê sìn-gióng hō͘ lán iâⁿ-kòe sè-kan. 5 Iâⁿ-kòe sè-kan ê sī siáⁿ-lâng? Kám m̄-sī hiah-ê siong-sìn Iâ-so͘ sī Siōng-Chú ê Kiáⁿ ê lâng?

Kiàn-chèng Iâ-so͘ Ki-tok
6 Chit-ê Iâ-so͘ Ki-tok sī tùi chúi kah hoeh lâi-.ê. M̄-sī kan-taⁿ ēng chúi, sī ēng chúi kah hoeh. 7 Sèng-Sîn chhin-chū kiàn-chèng chit-ê sū-si̍t, in-ūi Sèng-Sîn chiū-sī chin-lí. 8 Ū saⁿ-ê teh chò kiàn-chèng, chiū-sī Sèng-Sîn, chúi kah hoeh. Chit saⁿ-ê kiàn-chèng lóng ū it-tì. 9 Lâng ê kiàn-chèng lán to chiap-siū, Siōng-Chú ê kiàn-chèng koh-khah ū hāu-le̍k, in-ūi chit-ê sī Siōng-Chú ūi-tio̍h I ê Kiáⁿ só͘ chò ê kiàn-chèng. 10 Sìn Siōng-Chú ê Kiáⁿ ê lâng tī sim-lāi ū chit-ê kiàn-chèng. M̄ sìn Siōng-Chú ê lâng chiū-sī lia̍h-chò Siōng-Chú teh kóng pe̍h-chha̍t, in-ūi i m̄ sìn Siōng-Chú ūi-tio̍h I ê Kiáⁿ só͘ chò ê kiàn-chèng. 11 Chit-ê kiàn-chèng chiū-sī: Siōng-Chú í-keng ū siúⁿ-sù éng-oán ê oa̍h-miā hō͘ lán, chit-ê oa̍h-miā sī tùi I ê Kiáⁿ lâi-.ê. 12 Ū kah Siōng-Chú ê Kiáⁿ kiat-liân ê lâng chiū ū chit-ê oa̍h-miā. Bô kah Siōng-Chú ê Kiáⁿ kiat-liân ê lâng chiū bô chit-ê oa̍h-miā.

Éng-oán ê Oa̍h-miā
13 Góa siá chiah-ê tāi-chì sī beh hō͘ lín sìn Siōng-Chú ê Kiáⁿ ê lâng chai-iáⁿ, lín ū éng-oán ê oa̍h-miā. 14 Lán tī Siōng-Chú ê bīn-chêng ióng-kám bô kiaⁿ, in-ūi lán khak-sìn nā chiàu I ê chí-ì bô-lūn kiû sím-mi̍h, I ē thiaⁿ lán ê kî-kiû. 15 Kì-jiân lán khak-sìn I ē thiaⁿ lán ê kî-kiû, lán chiū án-ne chai-iáⁿ lán tùi I kî-kiû ê í-keng tit-tio̍h. 16 Lâng nā khòaⁿ-tio̍h hiaⁿ-tī á-sī chí-mōe hoān-tio̍h bē tì-kàu sí ê chōe, tio̍h ǹg Siōng-Chú kî-kiû, Siōng-Chú ē sù i oa̍h-miā. Lâng só͘ hoān ê nā-sī tio̍h tì-kàu sí ê chōe, góa bô kóng tio̍h ūi chit-chióng chōe-jîn kî-tó. 17 Só͘-ū put-gī ê hêng-ûi lóng sī hoān-chōe, m̄-koh mā ū bián tì-kàu sí ê chōe. 18 Lán chai Siōng-Chú ê kiáⁿ-jî bē kè-sio̍k hoān-chōe, in-ūi ū Siōng-Chú ê Kiáⁿ teh kā in pó-siú, hit-ê Mô͘-kúi kha̍p i bē-tio̍h. 19 Lán chai lán sī sio̍k Siōng-Chú, m̄-koh choân sè-kan lóng siū hit-ê Mô͘-kúi koán-hat. 20 Lán mā chai Siōng-Chú ê Kiáⁿ í-keng lîm-kàu, koh hō͘ lán hiáu-ngō͘ lâi jīn-bat Hit-ūi chin-sîn Siōng-Chú. Lán kah chin-sîn Siōng-Chú kiat-liân, in-ūi lán kah I ê Kiáⁿ Iâ-so͘ Ki-tok mā ū kiat-liân. Chit-ūi sī chin-sîn Siōng-Chú, mā sī éng-oán ê oa̍h-miā. 21 Sè-kiáⁿ, lín tio̍h kín-sīn siám-phiah ngó͘-siōng.