《巴克禮普世版聖經(試讀本)》

| | | 轉寄

巴克禮普世版(試讀本) 啟示錄第十二章

Hū-jîn-lâng Kah Liông
Tī thiⁿ-téng koh ū chi̍t-ê tōa tiāu-thâu chhut-hiān: chi̍t-ê hū-jîn-lâng seng-khu chhēng ji̍t-thâu, kha-ta̍h goe̍h-niû, thâu-khak tì cha̍p-jī-lia̍p chheⁿ ê bián-liû. 2 I ū hoâi-īn teh-beh seⁿ-kiáⁿ, chhui-chūn ê kan-khó͘ kah thàng-thiàⁿ hō͘ i tōa-siaⁿ kiò-khó͘. 3 Tī thiⁿ-téng koh ū lēng-gōa chi̍t-ê tiāu-thâu chhut-hiān: chi̍t-bóe chhiah-sek ê tōa-bóe liông, ū chhit-ê thâu, cha̍p-ki kak, thâu-khak tì chhit-téng ông-koan. 4 Hit-bóe liông ēng bóe-liu kā thiⁿ-téng saⁿ-hūn chi-it ê chheⁿ sàu lo̍h-khì tē-chiūⁿ. Liông khiā tī teh-beh seⁿ-kiáⁿ ê hū-jîn-lâng bīn-chêng, thèng-hāu i seⁿ-liáu thang thun-chia̍h i ê kiáⁿ. 5 Hit-ê hū-jîn-lâng seⁿ chi̍t-ê cha-po͘-kiáⁿ, chiū-sī chiong-lâi beh ēng thih-koái thóng-tī bān-kok ê, m̄-koh i ê kiáⁿ hō͘ lâng chiap-khì Siōng-Chú ê bīn-chêng, lâi-kàu I ê pó-chō hia. 6 Hū-jîn-lâng tô-cháu khì khòng-iá, Siōng-Chú tī hia ū ūi-tio̍h i chún-pī chi̍t-ê só͘-chāi, thang hō͘ i tī hia siū chiàu-kò͘ chi̍t-chheng nn̄g-pah la̍k-cha̍p ji̍t. 7 Tī thiⁿ-téng chiū hoat-seng chiàn-cheng: Bí-ka-le̍k tòa i ê sù-chiá khì kah liông kau-chiàn, liông mā tòa i ê sù-chiá khí-lâi èng-chiàn. 8 Liông chiàn-su, i kah i ê sù-chiá tī thiⁿ-téng chiū bô só͘-chāi thang tòa. 9 Hit bóe tōa-bóe liông chiū hō͘ lâng hiat chhut-lâi. I chiū-sī hit-bóe lāu-chôa, kiò-chò Mô͘-kúi, mā kiò-chò Sat-tàn, choân sè-kài siū i bê-he̍k. I hō͘ lâng hiat lo̍h-lâi tē-chiūⁿ, i ê sù-chiá mā kah i chò-hóe hiat lo̍h-lâi. 10 Hit-sî góa thiaⁿ-tio̍h tī thiⁿ-téng ū tōa-siaⁿ, kóng, "Lán Siōng-Chú ê chín-kiù, koân-lêng kah kok-tō͘ í-keng si̍t-hiān à. I siat-li̍p ê Ki-tok mā teh hián-sī I ê koân-pèng, in-ūi mê-ji̍t tī lán ê Siōng-Chú bīn-chêng teh khòng-kò lán ê hiaⁿ-tī chí-mōe hit-ê, taⁿ í-keng hō͘ lâng hiat lo̍h-khì à. 11 In khò Iûⁿ-ko ê hoeh kah in só͘ kiàn-chèng ê sìn-sit í-keng iâⁿ-kòe hit-bóe liông. In sīm-chì goān-ì hi-seng in ê sèⁿ-miā. 12 Só͘-í chiah-ê thiⁿ kah tòa tī hit tiong-kan ê lâng, lín lóng tio̍h hoaⁿ-hí! M̄-koh tē kah hái ū chai-hō, in-ūi Mô͘-kúi í-keng tōa siū-khì lo̍h khì-kàu lín hia, i chai-iáⁿ ka-kī ê sî bô jōa kú à. 13 Hit-bóe liông chi̍t-ē chai-iáⁿ ka-kī hō͘ lâng hiat lo̍h-khì tē-chiūⁿ, chiū khì jiok hit-ê seⁿ cha-po͘-kiáⁿ ê hū-jîn-lâng. 14 Hit-ê hū-jîn-lâng ū tit-tio̍h tōa eng-chiáu ê nn̄g-ki si̍t thang hō͘ i poe-khì khòng-iá, kàu i ka-kī ê só͘-chāi, tī hia tit-tio̍h chiàu-kò͘ it-ti̍t kàu Siōng-Chú khòaⁿ-chò sek-tòng ê sî-kî, bô koh siū hit-bóe lāu-chôa ê kong-kek. 15 Hit-bóe chôa tī hū-jîn-lâng ê āu-bīn, tùi chhùi thò͘-chhut chhin-chhiūⁿ tōa-hô ê chúi, beh kā hū-jîn-lâng chhiong-khì. 16 Tāi-tē lâi pang-chō͘ hū-jîn-lâng, khui-chhùi kā liông thò͘-chhut ê hô-chúi thun lo̍h-khì. 17 Liông tùi hū-jîn-lâng hoat siū-khì, chiū khì kah hū-jîn-lâng kî-tha ê kiáⁿ-sun, chiū-sī chun-siú Siōng-Chú ê kài-bēng kah ūi Iâ-so͘ chò kiàn-chèng ê lâng kau-chiàn. Hit sî, liông chiū khiā tī hái-piⁿ ê soa-téng.