《巴克禮普世版聖經(試讀本)》

| | | 轉寄

巴克禮普世版(試讀本) 啟示錄第十三章

Nn̄g-chiah Béng-siù
1 Góa koh khòaⁿ-tio̍h chi̍t-chiah béng-siù tùi hái-ni̍h khí-lâi, ū cha̍p-ki kak, chhit-ê thâu. Ta̍k-ki kak lóng ū tì chi̍t-téng ông-koan, thâu-khak-téng ū húi-pòng Siōng-Chú ê miâ-hō. 2 Góa só͘ khòaⁿ-tio̍h ê hit-chiah béng-siù chhin-chhiūⁿ pà, i ê kha chhin-chhiūⁿ hîm ê kha, chhùi chhin-chhiūⁿ sai ê chhùi. Hit-bóe liông ēng i ê châi-lêng, chō-ūi kah tōa koân-pèng hō͘ hit-chiah béng-siù. 3 Hit-chiah béng-siù ê chi̍t-ê thâu-khak ná chhin-chhiūⁿ ū siū-kòe tì-miā-siong, m̄-koh i ê tì-miā-siong ū tit-tio̍h i-hó. Choân sè-kài ê lâng lóng kám-kak kî-koài, chiū lâi tòe hit-chiah béng-siù kiâⁿ. 4 Chèng-lâng pún-té to̍h teh pài hit-bóe liông, in-ūi liông kā koân-pèng kau hō͘ béng-siù, in mā pài béng-siù, kóng, "Siáⁿ-lâng ē-tàng kah chit-chiah béng-siù sio pí-phēng? Siáⁿ-lâng ē-tàng kah i kau-chiàn?" 5 Hit-chiah béng-siù ū tit-tio̍h chi̍t-ê kóng tōa-ōe kah húi-pòng ê chhùi, koh tit-tio̍h ín-chún tī sì-cha̍p-jī goe̍h-ji̍t tiong-kan lâi chò chiah-ê tāi-chì. 6 I chiū khui-chhùi kóng-chhut húi-pòng Siōng-Chú ê ōe, lâi siat-to̍k I ê miâ kah I ê hōe-bō͘ í-ki̍p hiah-ê tiàm tī thiⁿ-téng-.ê. 7 I mā ū tit-tio̍h koân-pèng thang kah sìn-tô͘ kau-chiàn, lâi kā in cheng-ho̍k, mā ū tit-tio̍h koân-pèng lâi tī-lí ta̍k-ê cho̍k-kûn, ta̍k-ê jîn-bîn, ta̍k-chióng gí-giân ê lâng kah ta̍k-e pang-kok. 8 Só͘-ū tòa tī tē-bīn-chiūⁿ ê lâng, chiū-sī chhòng-sè í-lâi in ê miâ bô kì-chài tī siū sat-hāi ê Iûⁿ-ko ê oa̍h-miā-chheh ê, lóng beh pài hit-chiah béng-siù. 9 Ū hīⁿ-khang ê lâng lóng tio̍h thiaⁿ: 10 Hiah-ê chù-tiāⁿ siū-lia̍h ê lâng lóng ē hō͘ lâng lia̍h-khì; hiah-ê chù-tiāⁿ siū sat-hāi ê lâng lóng ē siū to thâi-sí, in-ūi án-ne, sìn-tô͘ lóng tio̍h ū nāi-sim kah sìn-sim. 11 Góa koh khòaⁿ-tio̍h lēng-gōa chi̍t-chiah béng-siù tùi tē-chiūⁿ khí-lâi, ū nn̄g-ki chhin-chhiūⁿ iûⁿ ê kak, kóng-ōe chhin-chhiūⁿ liông. 12 I tī thâu-chi̍t-chiah béng-siù ê bīn-chêng chip-hêng thâu-chi̍t-chiah béng-siù ê koân-pèng. I kiò tē kah tòa tē-chiūⁿ ê lâng khì pài thâu-chi̍t-chiah béng-siù, chiū-sī hit-chiah siū-tio̍h tì-miā-siong koh tit-tio̍h i-hó ê hit-chiah béng-siù. 13 Chit tē-jī-chiah béng-siù koh kiâⁿ tōa sîn-jiah, tī lâng ê bīn-chêng kiò hóe tùi thiⁿ kàng-lo̍h tē-chiūⁿ. 14 Koh ēng tit-tio̍h ín-chún tī thâu-chi̍t-chiah béng-siù bīn-chêng só͘ kiâⁿ ê sîn-jiah lâi bê-he̍k tòa tī tē-chiūⁿ ê lâng, kiò in tio̍h kā hit-chiah tio̍h-siong iû-goân oa̍h-teh ê béng-siù chō ngó͘-siōng. 15 I koh tit-tio̍h ín-chún thang ēng oa̍h-khì pûn ji̍p-khì béng-siù ê ngó͘-siōng, hō͘ béng-siù ê siōng ē kóng-ōe, koh sat-hāi só͘-ū bô pài béng-siù ngó͘-siōng ê lâng. 16 I koh kiông-pek chèng-lâng, bô-lūn tōa-sè, hó-gia̍h á-sī sàn-chhiah, chū-iû ê á-sī chò lô͘-po̍k ê, lóng tio̍h tī chiàⁿ-chhiú á-sī thâu-hia̍h khap-ìn chò kì-hō. 17 Khap-ìn chò kì-hō, chiū-sī béng-siù ê miâ á-sī tāi-piáu i ê miâ ê sò͘-jī, nā bô chiū bē-tàng chò bé-bē. 18 Tī chia su-iàu ū tì-hūi. Chhong-bêng ê lâng ē-tàng sǹg-chhut hit-chiah béng-siù ê sò͘-jī, in-ūi hit-ê sò͘-jī tāi-piáu chi̍t-ê lâng. Hit-ê sò͘-jī chiū-sī la̍k-pah la̍k-cha̍p-la̍k.