《巴克禮普世版聖經(試讀本)》

| | | 轉寄

巴克禮普世版(試讀本) 馬可福音第七章

Chó͘-sian ê Thoân-thóng (Mt 15:1-9))

1 Āu-lâi Hoat-lī-sài-phài ê lâng kah chi̍t-kóa tùi Iâ-lō͘-sat-léng lâi ê keng-ha̍k kàu-su, tàu-tīn lâi chhōe Iâ-so͘.

2 In khòaⁿ-tio̍h Iâ-so͘ ê bûn-tô͘ tiong ū-ê ēng bô chheng-khì ê chhiú, chiū-sī bô sé-chhiú teh chia̍h-pn̄g.

3 In-ūi Hoat-lī-sài-phài ê lâng kah só͘-ū Iû-thài-lâng, lóng chun-siú kó͘-chá-lâng ê thoân-thóng, nā bô kā chhiú sé kah chin chheng-khì chiū bô chia̍h-pn̄g.

4 Tùi ke-lō͘ tńg-lâi nā bô sé-chhiú mā bô chia̍h-pn̄g. In chun-siú kî-tha chin-chē hāng, chhin-chhiūⁿ sé poe-á, koàn-á kah tâng-khì ê kui-lē.

5 Hoat-lī-sài-phài ê lâng kah keng-ha̍k kàu-su mn̄g Iâ-so͘ kóng, " Lí ê bûn-tô͘ ná-ē bô chun-siú chó͘-sian ê thoân-thóng, ēng bô sé chheng-khì ê chhiú teh chia̍h-pn̄g?"

6 Iâ-so͘ ìn kóng, " Í-sài-a kóng liáu chin tio̍h. I ī-giân lín chiah-ê ké-hó ê lâng án-ne kóng, ' Chiah-ê jîn-bîn ēng chhùi-tûn chun-kèng góa, in ê sim khiok lī-khui góa chin hn̄g.

7 In ēng lâng ê hoat-tō͘ tòng-chò Siōng-Chú ê kài-bēng, lâi kà-sī lâng. In kèng-pài góa lóng bô chhái-kang.'

8 Án-ne lín sī pàng-sak Siōng-Chú ê kài-bēng, lâi chun-siú lâng ê thoân-thóng."

9 Iâ-so͘ koh kóng, " Lín ēng kî-khiáu ê hong-hoat khì-sak Siōng-Chú ê kài-bēng, lâi beh chun-siú lín ê thoân-thóng.

10 Mô͘-se bat kóng, ' Tio̍h chun-kèng lí ê lāu-pē kah lí ê lāu-bú.' koh kóng, ' Mē lāu-pē á-sī mē lāu-bú ê lâng, it-tēng tio̍h chhù sí-hêng.'

11 M̄-koh lín kóng, ' Lâng nā tùi i ê lāu-pē á-sī lāu-bú kóng: Lí pún-té ē-tàng tùi góa tit-tio̍h ê hû-ióng-kim, í-keng hiàn hō͘ Siōng-Chú.

12 Án-ne lín chiū chún i, m̄-bián hû-ióng-kim hō͘ i ê lāu-pē á-sī lāu-bú.

13 Lín sī ēng lín só͘ thoân-siū ê thoân-thóng lâi hùi-tû Siōng-Chú ê ōe. Lín mā chò chin-chē chit khoán ê tāi-chì."

Lūn Chheng-khì kah Bô Chheng-khì (Mt 15:10-20)

14 Iâ-so͘ koh kiò kûn-chiòng lâi, kā in kóng, " Lín lóng tio̍h thiaⁿ góa ê ōe, mā tio̍h liáu-kái:

15 Tùi gōa-bīn ji̍p-khì lâng ê seng-khu ê, bē hō͘ lâng bô chheng-khì. Chí-ū tùi lâng ê lāi-bīn chhut-lâi ê, chiah ē hō͘ lâng bô chheng-khì."

16 (Ū ê chhau-pún ke chit chat:“Ū hī-khang thang thiaⁿ ê lâng tio̍h thiaⁿ.”)

17 Iâ-so͘ lī-khui kûn-chiòng ji̍p-khì chhù-lāi. Bûn-tô͘ chiū mn̄g I chit-ê phì-jū ê ì-sù.

18 Iâ-so͘ ìn kóng, " Liân lín to bē bêng-pe̍k, sī-bô? Lín kám m̄-chai tùi gōa-bīn ji̍p-khì lâng ê seng-khu ê, bē hō͘ lâng bô chheng-khì.

19 In-ūi m̄-sī ji̍p-khì lâng ê sim, sī ji̍p-khì lâng ê pak-tó͘, āu-lâi chiū pàng lo̍h-khì sái-ha̍k. (I kóng án-ne sī chí ta̍k-hāng ê chia̍h-mi̍h lóng sī chheng-khì.)

20 Koh kóng, " Tùi lâng ê lāi-bīn chhut-lâi ê chiah ē hō͘ lâng bô chheng-khì.

21 In-ūi tùi lāi-bīn, chiū-sī tùi lâng ê sim chhut-lâi ê pháiⁿ liām-thâu ē ín-khí lâng ê su-thong, thau-the̍h, thâi lâng, kan-îm

22 tham-sim, siâ-ok, kan-chà, hò͘ⁿ-sek, chi̍t-tò͘, húi-pòng, kiau-ngō͘, sī-hui put-hun.

23 Chiah-ê pháiⁿ tāi-chì lóng sī tùi lāi-bīn chhut-lâi, ē hō͘ lâng bô chheng-khì."

Chi̍t-ê Hū-jîn-lâng ê Sìn-sim ( Mt 15:21-28)

24 Iâ-so͘ tùi hia chhut-hoat khì kàu Chhui-lô kah Se-tùn ê kau-kài, ji̍p-khì chi̍t-keng chhù. I bô ài hō͘ lâng chai, m̄-koh bih bô lō͘.

25 Sûi-sî ū chi̍t-ê hū-jîn-lâng, i ê sè-hàn cha-bó͘-kiáⁿ hō͘ siâ-sîn hū-sin, thiaⁿ-tio̍h Iâ-so͘ ê tāi-chì, chiū lâi phak tī I ê kha-chêng.

26 Chit-ê hū-jîn-lâng sī chhut-sì tī Sū-lī-a Hui-nî-ki ê Hi-lia̍p-lâng, i kiû Iâ-so͘ kā i ê cha-bó͘-kiáⁿ kóaⁿ kúi.

27 Iâ-so͘ kā i kóng, " Tio̍h hō͘ gín-á tāi-seng chia̍h pá, in-ūi the̍h gín-á ê piáⁿ hiat hō͘ káu chia̍h sī m̄ hó."

28 Hū-jîn-lâng ìn kóng, " Chú ah, sī à, m̄-koh toh-kha ê káu-á mā chia̍h sè-hàn-gín-á ê piáⁿ-chhùi."

29 Iâ-so͘ kā i kóng, " In-ūi lí kóng chit kù ōe, lí thang tńg-khì, kúi í-keng lī-khui lí ê cha-bó͘-kiáⁿ à."

30 Hū-jîn-lâng tńg-kàu chhù, khòaⁿ-tio̍h cha-bó͘-kiáⁿ tó tī bîn-chhn̂g, kúi í-keng chhut-khì à.

Iâ-so͘ I-hó Chi̍t-ê Chhàu-hīⁿ Koh É-káu ê Lâng

31 Iâ-so͘ koh tùi Chhui-lô ê tē-khu keng-kòe Se-tùn kah Te-ka-pho-lī tē-khu, lâi-kàu Ka-lī-lī-ô͘.

32 Ū-lâng chhōa chi̍t-ê chhàu-hīⁿ koh é-káu ê lâng, lâi chhōe Iâ-so͘, khún-kiû Iâ-so͘ kā i hōaⁿ-chhiú.

33 Iâ-so͘ chhōa hit-ê lâng lī-khui kûn-chiòng khì piⁿ-á, chiū ēng chéng-thâu-á chhng ji̍p-khì i siang-pêng ê hīⁿ-khang, koh phùi nōa lâi boah i ê chhùi-chi̍h.

34Jiân-āu Iâ-so͘ ǹg thiⁿ thó͘-khùi, kā i kóng, " Í-hoat-tāi". Ì-sù sī kóng, " Khui!"

35 HIt lâng ê siang-pêng hīⁿ-khang chiū khui, chi̍h-kun mā tháu lēng khì, kóng-ōe chin chheng-chhó.

36Iâ-so͘ kéng-kài in m̄-thang kā lâng kóng chit-ê tāi-chì, m̄-koh I jú kéng-kài, in jú pò-iông.

37 Kûn-chiòng put-chí kî-koài kóng, " I só͘ chò ê tāi-chì lóng sī hó, hō͘ chhàu-hī-lâng ē thiaⁿ-kìⁿ, é-káu ê lâng ē kóng-ōe."