《巴克禮普世版聖經(試讀本)》

| | | 轉寄

巴克禮普世版(試讀本) 路加福音第五章

Iâ-so͘ Khai-sí Ho͘-tiàu Bûn-tô͘ (Mt 4:18-22;Mk 1:16-20)
1 Ū chi̍t piàn, Iâ-so͘ khiā tī Kek-nî-sat-le̍k-ô͘ piⁿ, kûn-chiòng kheh óa-khì beh thiaⁿ Siōng-Chú ê tō-lí. 2 Iâ-so͘ khòaⁿ-tio̍h nn̄g-chiah chûn tī ô͘-piⁿ, lia̍h-hî-lâng lī-khui chûn teh sé bāng. 3 Kî-tiong chi̍t chiah sī Se-bûn ê, Iâ-so͘ chiūⁿ-chûn, kiò i kā chûn kò khì lī-khui hōaⁿ-piⁿ ê só͘-chāi. Iâ-so͘ chiū chē tī chûn-téng kà-sī kûn-chiòng. 4 Iâ-so͘ kóng soah chiū tùi Se-bûn kóng, " Kā chûn kò khì khah chhim ê só͘-chāi, pha bāng lo̍h-khì lia̍h hî." 5 Se-bûn ìn kóng, " Lāu-su, goán kui-mê lô-khó͘ lóng lia̍h bô hî, m̄-koh Lí to kà goán án-ne chò, góa chiū lâi pha bāng." 6 In chi̍t-ē pha lo̍h-khì, chiū bāng-tio̍h chin-chē hî, tì-sú hî-bāng kiông-beh li̍h-khui. 7 In chiū ia̍t pa̍t-chiah chûn ê tâng-phōaⁿ lâi tàu kha-chhiú. Hiah-ê tâng-phōaⁿ chiū lâi, khioh hî té tòa nn̄g-chiah chûn, té kàu móa-móa soah kiông-beh tîm lo̍h-khì. 8 Se-bûn Pí-tek khòaⁿ-tio̍h án-ne, chiū phak tī Iâ-so͘ ê kha-chêng, kóng, " Chú ah, chhiáⁿ lī-khui góa, góa sī ū chōe ê lâng." 9 Se-bûn kah i ê tâng-phōaⁿ ūi-tio̍h in chi̍t-ē pha lo̍h-khì chiū lia̍h-tio̍h hiah-chē hî, ta̍k-ke lóng tio̍h-kiaⁿ koh kî-koài. 10 Se-bûn ê tâng-phōaⁿ, Se-pí-thài ê kiáⁿ Ngá-kok kah Iok-hān mā sī án-ne. Iâ-so͘ tùi Se-bûn kóng, " M̄-bián kiaⁿ, tùi chit sî khai-sí, lí ē chhin-chhiūⁿ lia̍h-hî án-ne tit-tio̍h lâng." 11 In thoa chûn óa hōaⁿ liáu-āu, chiū pàng-sak it-chhè lâi tòe Iâ-so͘.

Iâ-so͘ I-hó Thái-ko Pēⁿ-lâng (Mt 8:1-4;Mk 1:40-45)
12 Ū chi̍t ji̍t, Iâ-so͘ tī chi̍t-ê siâⁿ, tú-hó ū chi̍t-ê lâng kui seng-khu thái-ko, khòaⁿ-tio̍h Iâ-so͘ chiū bīn phak lo̍h-khì, kî-kiû kóng, " Chú ah, Lí nā khéng, chiū ē hō͘ góa chheng-khì." 13 Iâ-so͘ chhun chhiú kā i bong, kóng, " Góa khéng, hō͘ lí chheng-khì." Thái-ko sûi-sî piàn chheng-khì. 14 Iâ-so͘ hoan-hù i kóng, " M̄-thang kā lâng kóng, tio̍h khì hō͘ chè-si giām, mā tio̍h chiàu Mô͘-se só͘ kui-tēng, ūi-tio̍h lí tit-tio̍h chheng-khì lâi hiàn-chè, thang tùi chèng-lâng chèng-bêng." 15 Iâ-so͘ ê miâ-siaⁿ jú thoân jú khoah. Kui tōa-tīn lâng chū-chi̍p óa-lâi beh thiaⁿ tō-lí, mā kî-kiû in ê pēⁿ tit-tio̍h i-hó. 16 M̄-koh Iâ-so͘ thè-khì phian-phiah ê só͘-chāi kî-tó.

Iâ-so͘ I-hó Piàn-sūi ê Lâng (Mt 9:1-8;Mk 2:1-12)
17 Ū chi̍t ji̍t, Iâ-so͘ teh kà-sī lâng ê sî, ū Hoat-lī-sài-phài ê lâng kah kà lu̍t-hoat ê kàu-su tī hia teh chē. in sī tùi Ka-lī-lī-séng kah Iû-thài-séng ta̍k chng-siā í-ki̍p Iâ-lō͘-sat-léng lâi ê. Chú ê koân-lêng kah Iâ-so͘ tông-chāi, hō͘ I ē-tàng i-hó pēⁿ-lâng. 18 Hit sî ū-lâng ēng chhn̂g-pho͘ kng piàn-sūi ê lâng lâi, ài beh kng ji̍p-khì hē tī Iâ-so͘ ê bīn-chêng. 19 In-ūi lâng chin-chē, chhōe bô phāng thang kng ji̍p-khì; chiū peh khí-lih chhù-téng, thiah chhù-hiā, kā hit-ê piàn-sūi ê lâng liân chhn̂g-pho͘, tūi-lo̍h-khì chèng-lâng ê tiong-kan, hē tī Iâ-so͘ ê bīn-chêng. 20 Iâ-so͘ khòaⁿ-tio̍h in ê sìn-sim chiū kóng, " Pêng-iú ah, lí ê chōe tit-tio̍h sià-bián à." 21 Keng-ha̍k-kàu-su kah Hoat-lī-sài-phài ê lâng chiū gī-lūn kóng, " Chit-ê teh siat-to̍k Siōng-Chú ê sī siáⁿ-lâng? Siōng-Chú í-gōa, siáⁿ-lâng ē-tàng sià-chōe?" 22 Iâ-so͘ chai-iáⁿ in teh gī-lūn siáⁿ-mi̍h, chiū tùi in kóng, " Lín sim-lāi ná-ē teh siūⁿ chit-khoán tāi-chì? 23 Kóng, ' Lí ê chōe tit-tio̍h sià-bián' á-sī kóng, ' Lí khí-lâi kiâⁿ', tó chi̍t-hāng khah kán-tan? 24 M̄-koh góa beh hō͘ lín chai, Jîn-chú tī tē-chiūⁿ ū sià-chōe ê koân-pèng." Iâ-so͘ tùi hit-ê piàn-sūi ê lâng kóng, " Góa kā lí kóng, khí-lâi! giâ lí ê chhn̂g-pho͘ tńg-khì lí ê chhù." 25 Hit-ê lâng tī chèng-lâng ê bīn-chêng, sûi-sî khiā khí-lâi, giâ i só͘ tó ê chhn̂g-pho͘ tńg-khì i ê chhù, ná kiâⁿ ná o-ló Siōng-Chú. 26 Chèng-lâng lóng tio̍h-kiaⁿ koh kî-koài, mā o-ló Siōng-Chú, koh sim chûn kèng-ùi kóng, " Goán kin-á-ji̍t ū khòaⁿ-tio̍h hui-siông kî-biāu ê tāi-chì."

Iâ-so͘ Ho͘-tiàu Lī-bī (Mt 9:9-13;Mk 2:13-17)
27 Chiah-ê tāi-chì liáu-āu, Iâ-so͘ chhut-khì, khòaⁿ-tio̍h chi̍t-ê thiu-sòe-ê, miâ-kiò Lī-bī, chē tī sòe-koan. Iâ-so͘ kā i kóng, " Lâi tòe Góa!" 28 Lī-bī chiū pàng-sak it-chhè, khí-lâi tòe Iâ-so͘. 29 Lī-bī tī in chhù ūi-tio̍h Iâ-so͘ pān tōa iàn-se̍k. Ū thiu-sòe-ê kah kî-tha chin-chē lâng, lâi kah in chò-hóe chē-toh chia̍h-pn̄g. 30 Hoat-lī-sài-phài ê lâng kah sio̍k in ê keng-ha̍k kàu-su, tùi Iâ-so͘ ê bûn-tô͘ nga̍uh-nga̍uh-liām, kóng, " Lín ná-ē kah thiu-sòe-ê í-ki̍p pháiⁿ-lâng chò-hóe lim-chia̍h?" 31 Iâ-so͘ ìn kóng, " Ióng-chòng ê lâng bô su-iàu i-seng, m̄-koh phòa-pēⁿ ê lâng chiū su-iàu. 32 Góa lâi m̄-sī beh chio gī-lâng, sī beh chio pháiⁿ-lâng lâi hóe-kái."

Kìm-chia̍h ê Būn-tê (Mt 9:14-17;Mk 2:18-22)
33 Ū-lâng tùi Iâ-so͘ kóng, " Iok-hān ê bûn-tô͘ siông-siông kìm-chia̍h kî-tó, Hoat-lī-sài-phài ê bûn-tô͘ mā sī án-ne, m̄-koh Lí ê bûn-tô͘ mā lim mā chia̍h." 34 Iâ-so͘ ìn kóng, " Sin-lông kah hun-iàn ê lâng-kheh chò-hóe ê sî, lín kám ē hō͘ lâng-kheh kìm-chia̍h? 35 M̄-koh ji̍t-chí teh-beh kàu, sin-lông ē hō͘ lâng tùi in tiong-kan lia̍h-khì, tī hiah-ê ji̍t, in chiū ē kìm-chia̍h." 36 Iâ-so͘ hoh ēng phì-jū tùi in kóng, " Bô-lâng thiah sin-saⁿ lâi pó͘ kū-saⁿ. Nā án-ne chò, m̄-nā ē thiah-phòa sin-saⁿ, jî-chhiáⁿ tùi sin-saⁿ thiah lâi pó͘ hit-tè pò͘, kah kū-saⁿ mā bē ha̍h. 37 Mā bô-lâng ēng sin chiú té tī kū phôe-tē-á. Nā án-ne chò, sin chiú ē kā phôe-tē-á piak-li̍h, chiú lāu chhut-lâi, phôe-tē-á mā phah pháiⁿ. 38 Sin chiú tio̍h té ji̍p-khì sin ê phôe-tē-á. 39 Lâng nā lim kū-chiú liáu-āu, chiū bē ài lim hit-ê sin-chiú, in-ūi lâng lóng kóng, ' Kū-chiú khah hó.'"