《巴克禮普世版聖經(試讀本)》

| | | 轉寄

巴克禮普世版(試讀本) 路加福音第十六章

Piàn-khiàu Koán-ke ê Phì-jū
1 Iâ-so͘ koh tùi bûn-tô͘ kóng, " Ū chi̍t-ê hó-gia̍h-lâng, i ū chi̍t-ê koán-ke. Ū-lâng tùi chú-lâng kiám-kí chit-ê koán-ke lōng-hùi i ê châi-sán. 2 Chú-lâng kiò hit-ê koán-ke lâi kā i kóng, ' Góa ū thiaⁿ-tio̍h lí chit-khoán ê tāi-chì sī án-chóaⁿ? Taⁿ lí koán-lí ê siàu-phō͘ tio̍h chéng-lí chheng-chhó kau chhut-lâi, in-ūi lí bē-tàng koh chò koán-ke.' 3 Koán-ke ê sim-lāi siūⁿ-kóng, ' Chú-lâng beh kā góa sî koán-ke ê chit, taⁿ góa beh án-chóaⁿ chiah hó? Góa gia̍h tî-thâu bô khùi-la̍t, chò khit-chia̍h koh kiaⁿ kiàn-siàu. 4 Taⁿ góa chai tio̍h án-chóaⁿ chò, kàu hông sî-khì koán-ke ê chit liáu-āu, hit sî lâng chiah ē chiap-la̍p góa ji̍p-khì in chhù.' 5 " Hit-ê koán-ke chiū kiò chú-lâng ê chè-bū-jîn chi̍t-ê chi̍t-ê lâi. I kā thâu-chi̍t-ê kóng, ' Lí khiàm góa ê chú-lâng jōa-chē?' 6 Ìn kóng, ' Kan-ná-iû, chi̍t-pah tháng.' Koán-ke kā i kóng, ' Che sī lí ê siàu-toaⁿ. Kín chē lo̍h-lâi, kā i kái-chò gō͘-cha̍p tháng.' 7 I koh kā lēng-gōa chi̍t-ê kóng, ' Lí khiàm jōa-chē?' Hit lâng kóng, ' Be̍h-á, chi̍t-pah chio̍h.' Koán-ke kā i kóng, ' Che sī lí ê siàu-toaⁿ, kā i kái-chò peh-cha̍p chio̍h.' 8 Chú-lâng chiū o-ló chit-ê put-gī ê koán-ke chò liáu ū kàu khiáu, in-ūi sio̍k sè-kan ê lâng chhù-lí sè-sū ê ki-khiáu, pí sio̍k kng-bêng ê lâng khah ū piàn-khiàu." 9 Iâ-so͘ kè-sio̍k kóng, " Góa kā lín kóng, tio̍h ēng kim-sè ê chîⁿ-châi kiat-kau pêng-iú, kàu chîⁿ-châi ēng oân ê sî, lí chiah ē hō͘ lâng chiap-la̍p ji̍p-khì éng-oán ê khiā-ke. 10 Tùi sè-hāng tāi-chì chīn-tiong ê lâng, tùi tōa-hāng tāi-chì mā ē chīn-tiong; tùi sè-hāng tāi-chì bô láu-si̍t ê lâng, tùi tōa-hāng tāi-chì mā ē bô láu-si̍t. 11 Só͘-í lín nā tùi sè-sio̍k ê chîⁿ-châi bô chīn-tiong, siáⁿ-lâng ē kā chin-chiàⁿ ê châi-pó kau-thok lín? 12 Lín tùi sio̍k pa̍t-lâng ê mi̍h nā bô chīn-tiong, siáⁿ-lâng ē kā eng-kai sio̍k lín ê mi̍h hō͘ lín? 13 Chi̍t-ê lô͘-po̍k bē-tàng ho̍k-sāi nn̄g-ê chú-lâng, in-ūi i ē oàn-hūn chit-ê, thiàⁿ hit-ê; á-sī ē chun-tiōng chit-ê, khòaⁿ-khin hit-ê. Lín bē-tàng tông-sî ho̍k-sāi Siōng-Chú koh ho̍k-sāi chîⁿ-châi."

Lu̍t-hoat Kah Siōng-Chú Kok-tō͘ (Mt 5:31-32; 11:12-13; Mk 10:11-12)
14 Hiah-ê tham châi ê Hoat-lī-sài-phài ê lâng, thiaⁿ-tio̍h Iâ-so͘ kóng chiah-ê ōe, chiū kā I thí-chhiò. 15 Iâ-so͘ kā in kóng, " Lín chiah-ê tī lâng ê bīn-chêng ka-kī kiò-chò gī ê lâng, m̄-koh Siōng-Chú chai lín ê sim-su, in-ūi lâng khòaⁿ-chò chun-kùi ê, tùi Siōng-Chú khòaⁿ khí-lâi sī thó-ià ê." 16 " Mô͘-se ê lu̍t-hoat kah sian-ti ê kà-sī kàu Iok-hān ûi-chí. Tùi hit sî khí, Siōng-Chú Kok-tō͘ ê Hok-im thoân chhut-khì, lâng-lâng lóng piàⁿ-miā cheⁿ beh ji̍p-khì hit-ê kok-tō͘. 17 M̄-koh thiⁿ-tē ê siau-bia̍t, pí beh hùi-tû lu̍t-hoat ê chi̍t oe̍h, koh-khah kán-tan. 18 Lâng nā lî ka-kī ê bó͘ khì chhōa pa̍t-ê cha-bó͘-lâng, sī hoān kan-îm; chhōa hō͘ lâng lī-hun ê cha-bó͘-lâng, mā sī hoān kan-îm."

Hó-gia̍h-lâng Kah Lia̍p-sat-lō͘
19 Ū chi̍t-ê hó-gia̍h-lâng chhēng chí-sek kah iù-tē-pò͘ ê saⁿ-khò͘, ta̍k-ji̍t chhia-hôa iàn-lo̍k. 20 Koh ū chi̍t-ê khit-chia̍h miâ-kiò Lia̍p-sat-lō͘, kui seng-khu seⁿ kah choân lia̍p-á, tó tī hit-ê hó-gia̍h-lâng ê mn̂g-kháu, 21 beh khioh hó-gia̍h-lâng toh-kha só͘ ka-la̍uh ê chia̍h-mi̍h lâi chí-iau. Káu mā lâi chīⁿ i ê kha seⁿ lia̍p-á ê só͘-chāi. 22 Āu-lâi chit-ê khit-chia̍h sí-khì, thiⁿ-sài hû i khì kàu A-pek-la̍h-hán ê heng-chêng. Hit-ê hó-gia̍h-lâng mā sí-khì, sòa hō͘ lâng kā i bâi-chòng. 23 I tī im-kan siū tōa thòng-khó͘ ê sî, gia̍h thâu chiū khòaⁿ-tio̍h A-pek-la̍h-hán tī hn̄g-hn̄g ê só͘-chāi, mā ū khòaⁿ-tio̍h Lia̍p-sat-lō͘ tī i ê heng-chêng. 24 I chiū tōa-siaⁿ hoah kóng, ' Góa ê chó͘-sian A-pek-la̍h-hán, liân-bín góa! Kiû lí chhe Lia̍p-sat-lō͘ ēng chéng-thâu-á-bóe ùn chúi lâi hō͘ góa ê chhùi-chi̍h liâng chi̍t-ē, in-ūi góa tī chit-ê hóe-iām tiong teh siū khó͘-chhó͘.' 25 M̄-koh A-pek-la̍h-hán kóng, ' Sió-kiáⁿ ah, tio̍h kì-tit lí chāi-seⁿ hióng-siū lí ê hok-khì, m̄-koh Lia̍p-sat-lō͘ chāi-seⁿ siū chin-chē kan-khó͘. Taⁿ i tī chia tit-tio̍h an-ùi, á lí tī chia teh siū khó͘-chhó͘. 26 M̄-nā án-ne, tī goán kah lín ê tiong-kan ū tōa chhim-ian keh-khui, só͘-í tùi chia bē-tàng kòe-khì lín hia, mā bē-tàng tùi lí hia kòe-lâi goán chia.' 27 Hit-ê hó-gia̍h-lâng chiū kóng, ' Kì-jiân sī án-ne, góa ê chó͘-sian ah, kiû lí chhe Lia̍p-sat-lō͘ khì goán lāu-pē ê chhù. 28 In-ūi góa ū gō͘-ê hiaⁿ-tī, hō͘ Lia̍p-sat-lō͘ thang tùi in kéng-kò, bián-tit in mā lâi-kàu chit-ê hui-siông thòng-khó͘ ê só͘-chāi.' 29 M̄-koh A-pek-la̍h-hán ìn kóng, ' Lí hiah-ê hiaⁿ-tī ū Mô͘-se kah hiah-ê sian-ti thang kā in kéng-kò, hō͘ lí ê hiaⁿ-tī khì thiaⁿ in ê ōe.' 30 Hit-ê hó-gia̍h-lâng ìn kóng, ' Góa ê chó͘-sian A-pek-la̍h-hán ah, án-ne bô kàu gia̍h, tio̍h ū-lâng tùi sí-lâng tiong koh oa̍h khì chhōe in, in chiah ē hóe-kái.' 31 A-pek-la̍h-hán kā i kóng, ' In nā m̄ thiaⁿ Mô͘-se kah sian-ti ê ōe, chiū-sī ū-lâng tùi sí-lâng tiong koh-oa̍h, in mā m̄ siū khó͘-khǹg.'"