《台語chit條路》

| | | 轉寄

發行人ê話..台語這條路-ùi一段歷史講起

這本冊hō͘我ùi詩人、作家變做出版商。

為beh替這本冊寫一篇khah詳細ê頭尾,hō͘我想起一段罕得人知ê歷史,若m̄是出版這本冊,這段歷史就永遠無人koh提起--a。

這段歷史是一群學生tiām-tiām替台灣台灣做代誌,無hō͘社會注意著ê一段過去。Ti這段歷史內面,我扮演ê是穿針牽線ê角色,所以著愛ùi我講起。

1989下半年,為著蔡許案我去替周慧瑛助選,tī hia熟sāi hit-chūn iáu是大學生,後來嫁我ê陳豐惠。這chân代誌tī我ê詩「熟sāi tī選戰中」有記載。90年初,江蓋世接「新青年」社長,chhōe人tàu編機關刊物「台灣青年」ê總編輯。仝時chūn陳婉真tī民進黨台北市黨部做副執行長,來「新青年」chhōe人tàu編機關刊物「民進新聞」,,我kap A-惠自an--nih tī hia上班,he是阮一生上無êng ê一段日子,阮三個人舞真chē運動,我上kài記得ê是「二二八資料展」kap「1990總統民選運動」 。

三月中,「新青年」開會員大會,有社員報告講「一tīn台大大陸社ê學生tī臭頭á-廟靜坐,要球招開國是會議。」「新青年」ê成員大多數是台大ê學生iah是校友,大會臨時動議決定暫停,大家先去現場了解狀況。

阮到現場是暗頭á差不多八點外,十外個學生坐tī臭頭á廟大門口正手pêng圍牆á,大家驚khah暗ê時會hō͘強制驅散,希望有koh-khah chē人來聲援。Hit chūn我擔任市黨部文宣兼社運組長,隨kap A-惠轉去市黨部chhoân一kóa布條á,koh khà電話kho͘人來聲援,A-惠koh tī「市黨部之聲」ê電話新聞緊急放送這號消息(Hit chūn台灣iáu無地下民主電台)。

十點外就有幾十個人來聲援,大家做夥守過緊張ê一暝。尾--á真chē媒體開始報導這號新聞,演變成驚動社會ê學運事件。事件ê過程中,學生未著自主性ê考慮,無啥愛hō͘社運人士介入,我除了家己khai錢印宣傳單kho͘人來聲援以外,就tiām-tiām tī邊--a關心niâ;A-惠iáu是學生,積極參與「小蜜蜂」ê播音宣傳。這段運動kap本冊無啥khah深ê關係,m̄-koh tī hit時有兩個學生熟sāi,因為in兩個,chiah有後來ê一段歷史。

三月學運tī好笑ê「國是會議」中煞戲。三月底到四月初,我請公假去參加U.R.M ê訓練。U.R.M是台灣基督長老教會舉辦ê城鄉宣教草根組織者短期訓練班,由林宗正牧師主持,真chē社運人士lóng去過。我自真早期就報名beh去,為著社運無êng lóng一直無 hoat-tō͘ thang去。Tī hit期ê U.R.M我熟sāi iáu tī台大哲學系ê張素華,chiah知伊 tiām-tiām kap一kóa同學去參與三月學運。素華kā我講有一tīn學生真想beh替台灣做tām-po̍h-á代誌,m̄-koh in 無想beh hō͘人當做學運領袖hit類ê。Hit個時代真chē本兔社運團體lóng有出刊物,阮決定beh組一個文宣編輯短期研訓班,招有志學生來學習,了後會tàng去各團體作編輯義工。

轉來台北了後,隨進行這個khang-khóe,有十外個學生參加,除了A-惠kap簡淑惠以外,chhun--ê lóng是素華 chhōe來ê,有ê是伊ê老朋友、同學,有ê是伊tī三月學運中熟sāi ê,盧誕春(外號Loonng)就是其中一個,cha-pau學生kan-taⁿ伊niâ。這個十外人ê小團體真緊就發生作用。

五月初二,國民黨提名軍頭「郝柏村」做行政院長,學生「重返中正廟」這pái因為議題無仝,社運團體積極參與,組一個臨時性ê運動組織「反軍人干政聯盟」,簡稱「反軍盟」,我以代表民進黨台北市黨部ê身分參加決策小組,koh負責文宣ê khang-khòe。洪奇昌提議beh ùi五月二十五到五月底tī立法院門嘴靜坐,邱義仁要求文宣愛有十個人輪流tī現場顧暝留守,我當場開十二個學生ê名單,就是文宣班ê同學,,in mā lóng有照起工相放伴。

Tī靜坐ê過程中,有一工透早,警方強制驅散,tú-好輪著素華kap Loonng ê班,看警察beh衝過來,素華招Loonng坐leh警察kap群眾中間,看警察會mài衝過來, khah bē傷害著民眾。警察iáu是chàm過in ê身軀衝過,hō͘ in著傷,民眾kā in扶起來了後,素華kā Loonng mā khám-khám koh 會衝轉來,咱仝款繼續坐leh chia好bô?』Loonng mā khám-khám答應。In兩個koh hō͘警察ùi身軀頂chàm過一pái,著重傷,hō͘人送去台大病院,事後報紙有報一角á,m̄-koh無引起社會注意。

Tī「反軍盟」運動中,有真chē黨工hō͘警方掠去,賴in是暴民,民進黨mā kap國民黨同聲出氣講in是「衝組ê」、「聖戰士」、「社會邊緣人」,台權會hit chūn tng leh為中國人「唐龍」ê死刑走chông,講he是人權問題,對這tīn受難ê黨工是m̄是「政治犯」講iáu leh開會認定。這群學生真siūⁿ-氣,自an--nih結合北區政治受難者積極做探監關懷ê khang-khòe。

這段時間Loonng kap我愈來愈熟,阮tàu-tīn研討台灣前途ê問題,結論是ùi台灣語文khah文化性ê議題切入。Hit-chūn伊iáu tī交通大學leh讀碩士班,決定beh轉去創立台語社,請我做指導老師。我tī in開始ê兩節課教in羅馬字kap台語ê變調,了後開一份講師名單hō͘ in,內面有許曹德kap洪惟仁先生,交大台語社自an--nih開始運作。

Tī chia 我需要koh介紹另外二個真重要 ê 學生--謝明城、楊允言。明城擔任過台大台語社社長,tī tú-chiah ê運動中,差不多lóng有參與。楊允言tī台大讀冊ê時就真拍拚leh研究台語,bat用楊劍星ê筆名tī「台灣新文化」寫有關台語ê文章,我tī前衛出版社擔任編輯企劃ê時,伊tiāⁿ-tiāⁿ來,雖然講比我khah chió歲,我一直kā當做台語前輩。伊做兵了考入去清華ê研究所,清華kap交大ê校園連做夥,兩校ê台語社tàu-tīn辦活動,tī大部分大學ê學運冷落ê時,兩校ê台語社真有活氣。

交大了後,我kap做過幾ā間大學台語社團ê指導老師,熟sāi真chē對台語有趣味ê學生,我lóng盡量hō͘ in互相熟sāi,尾--a,台大、清華、交大、成大、實踐、淡江……in chia ê學生決定成立跨校性ê組織「學生台灣語文促進會」,首任選楊允言做會長,出版「台語學生」雜誌。Che就是這本冊ê訪問者--一tīn無仝學校ê學生會做夥做khang-khòe ê由來。

「學生台灣語文促進會」ê第二任會長是Loonng──盧誕春。Tī頭兩任會長ê期間,in推sak一kóa工作計劃,khah大ê兩項工程是「縣市長選舉各候選人ê語言政策調查」kap「台語文工作者ê訪問記錄」。前項工作完成了後,有tī報紙頂詳細刊出來,可惜是選後chiah刊ê,對選舉無發生影響力。後項工作ê成果就是這本冊。

本底這個台語工作者ê訪問計劃有分兩階段,這本冊kan-taⁿ是頭一階段ê成果niâ。(參考後面ê附錄)Tī頭階段ê訪問中koh有四篇ê訪問稿bē赴整理出來,就是訪問鄭良偉教授、台語冊ê推廣者林錦賢先生、風向雙月刊發行人陳義仁牧師kap陳明仁、陳豐惠阮這對ang-á-bó͘ ê部份。Tī chia mā beh kā鄭教授、錦賢兄kap陳牧師會失禮,看以後有機會kap第二階段ê訪問者做夥補起來bô。

這本冊ê內容允言拍字了後,一直beh chhōe人出版,咱lóng知現此時台語冊ê市場真e̍h,che koh是真嚴肅ê訪談,會買ê人真chió。四kè碰壁了後,我答應beh tàu設法hō͘出版。Tú-好莊柏林律師beh kā台笠出版社讓我經營,張春凰小姐也為伊ê散文集「青春e路途」出版頭疼,我想講台語文beh有未來,一定著愛有真chē出版物,寫台語冊ê作家罕得有人肯出版in ê作品,無,我就kā接來做。An--nih,我ùi台語作家變出版商。

「青春e路途」是我接台笠ê第一本冊,「台語這條路」是台笠第一本「台語研究」ê叢書。這兩本冊了後,阮beh koh出ê有葉國興先生ê一本台語研究ê著作;我ê第二本詩、散文集「流浪記事」(第一本是前衛出版ê「走找流浪的台灣」)kap「台灣歌謠史研究」,後pái阮會繼續chhōe台語著作出版,ǹg-望替台語文拍開一條生路。 為beh替這本冊做一個發行ê話頭soah牽一大拖,請讀者原諒,mā誠懇請kā阮批評指教。

感謝你買這本有夠冷門ê冊。