《台語chit條路》

《台語chit條路》--加學、加聽，做肥底 ─ 洪惟仁訪問(六)

作者 楊允言

言：老師你寫好hit chūn，自立著kā你出版sìm？洪：我去chhōe吳豐山mā透過吳逸民介紹ê，吳逸民有去坐ka過，平平內底ê人，mā是政治犯。吳豐山講『chit本冊hò͘ⁿ bōe bái！』hit當時台語ê書攏無人leh出lah，干taⁿ鄭良偉有幾本á，我著感覺無滿意伊he mā攏是leh教人ê，是教科書hit類ê，m̄是teh講理論，我感覺he尚過淺。言：老師你tī夏潮寫ê是che khah早ía是khah òaⁿ？洪：早幾lō年。言：夏潮以外koh有tī別位寫過bò？洪：有a，夏潮刊過一、兩篇了後，著出名起來，chiok chē雜誌，像林正杰，伊講『ê，你對台語有研究sìo？來，我hō͘你一ê題目，你去寫。』我tú出來ê時chūn我mā m̄知影現況按怎，著去chhōe資料，mā去chhōe何大安﹝註：中研院史語所研究員﹞，問伊chit-má啥人teh做研究，著去chhōe in，冊著chhōe出來看，看看ê著寫一篇。言：老師你hit chūn是用福佬話寫ê ía是…洪：中文。言：按呢tī夏潮寫e5ma7是用中文？洪：中文。言：按呢，第一篇用福佬話寫ê是ti7toh位刊ê？洪：《自由台灣》，mā是tī我寫hit本冊【註：河佬話聲調研究】以前。著是我tńg來tńg去lah，有一段時間，我是幾lō ê雜誌ê特約記者，去做採訪，訪問工人、訪問啥貨，林正杰mā是叫我去訪問，一四界mà，以後tī《自由台灣》寫，著全部攏用台語寫。言：《自由台灣》是啥人辦ê？洪：朱高正。凰：hit當時是用漢字？kám有注音？洪：用漢字，有注音。凰：是用toh一套？洪：家己發明ê。hit當時仔寫十二生肖，言：阿土伯講古，洪：阿土伯講古。干那刊無了ê款，《自由台灣》著倒去a。凰：hit chūn稿費多ía少？洪：bōe記a ne，hit當時仔我tō干那半食半餓。一擺領稿費領兩、三千箍仔著歡喜甲，我tī夏潮一個月一萬箍nîa，無啥麼錢，…我hit chūn黨外雜誌寫chiok chē ê lah，逐家攏mā teh邀稿，敢寫著一直衝出來，真正表現我本來ê思想，是以後ê代誌。言：老師，你開始寫ê時chūn，你是用啥麼款音標？洪：用教會羅馬字去改ê，改mā改無gōa chē？he撇來撇去改撇tī邊a，鼻音伊本來細ê n，我寫大寫ê N，大部分攏仝款，kám chit-má tholupa﹝註：TLPA，台灣語言音標方案﹞mā chiok óa ê。言：老師，我ê意思是，hit chūn tī《自由台灣》所寫ê，用字部分是已經有一ê底a，ía是那寫ê時chūn那teh chhōe？