《台語chit條路》

| | | 轉寄

《台語chit條路》--加學、加聽,做肥底 ─ 洪惟仁訪問(十八)

進:你想chit-ê差別kap伊ê文字化是m̄是有啥麼關係?

洪:全中國內底,真正文字化成功ê是廣東話,其實in大部分是用華語寫,用廣東話寫是寫趣味ê,我看寫廣東話ê比例可能比台語khah少。

言:但是尚無,in電視有chit種字幕。

洪:但是出來著是中文a,廣東人唱歌kap咱台灣人無仝款,咱台灣人唱歌是chiâⁿ si̍t台灣話,in m̄是ne,in唱歌是中文ê,chiah用廣東話去唱,kám那像阮老父hit沿ê,譬如看水滸傳hit種白話文,mā是用台語一字一字讀,it iūⁿ、it sia,我聽攏無。

咱ê自尊心比inkhah強,in是趣味niâ,少數人寫趣味ê,咱現時台灣人ê文字化,是一種自主ê、獨立ê,hām政治有關ê,台灣人mā有心beh建立一ê自主ê文化,廣東人無,廣東人對中國ê意識khah重lah,咱台灣人是beh脫離中國,廣東人m̄是,廣東人認為中國是tī伊ê下腳,伊是樓頂ê人。

進:廣東人想beh統一中國。

洪:in野心chiok大ê,所以香港人,in對語言有自尊心無自主性,tī英國ê統治之下,著是享受英國ê自由、富裕,從來無人tī英國ê體制下,要求香港人ê政治自尊,香港人對香港ê認同根本無夠,香港是in thàn錢ê所在,m̄是in ê土地。

敬:in攏是外來ê移民,尚chē人著無法度釘根。

洪:你去廣東,免一個月toh會曉講廣東話,你無愛講,伊toh無愛chha̍p你,伊經濟ê勢力大。

敬:東南亞hit pêng kám m̄是福佬人khah chē?

洪:著,照理講南洋應該是咱福佬人ê市場,結果phah bōe入去,原因是啥?著是台灣話去hông壓制了尚厲害,若無,台灣人ê生理會凍做比chit-má koh khah好,hit pêng ê福佬人九百萬,比廣東人加真chē,但是廣東ê文化勢力khah強,是按怎?自尊a,台灣人著是去hō͘箍面桶壓制了,台灣bōe興。chit- má 潮州ê人,著算無離開潮州,oan-ná愛講廣東話ne,he廣東話勢力太大lah。

我有時仔teh想講,做福佬人ná會chiah soe-siâu,一四界去hông欺負。其實,全世界ê福佬人算起來差不多六千萬人,若無算潮州人kap海南島人,尚少mā有三千外萬人,chia ê人講話攏會通ne,漳州、泉州去南洋著kap做伙a,kap潮州人,in講潮州人,著khah bōe合a。

假使台灣獨立,你會凍將南洋ê力量結合起來,經濟上會使領導,文化上mā會使領導,hit ê勢力比廣東人koh khah強。 今仔日是咱ê節目尚àu古a,台灣話節目ê製作實在有夠kē路,像香港,in是採取商業路線,咱家治ê文化自尊iá koh無,chit幾年有khah好a。