《台語chit條路》

 | | | 轉寄

《台語chit條路》--加學、加聽，做肥底 ─ 洪惟仁訪問(二十一)

作者 楊允言 2008.09.21

台語運動檢討

卵：老師，你做台語文做hiah久，你kám有看出一條路，感覺語言ê環境應該是按怎？

洪：我ê台語文運動是多方面ê，有關台語政策，我mā寫chiok chē文章ê，這效果mā已經出來a，這算一ê重點：第二ê重點著是文字化。

iá koh有一ê重點，著是保存語言ê事實，我創作無chiok chē，《台語文摘》講實在著是按呢，我是希望講，以這做肥底，chiah進一步去創作，因為所有ê文學，無可能講無中生有，一定是咱舊ê物件，the̍h起來koh翻新，無翻新也bōe使lah，攏無根底也bōe使。我chit-má提出台語文字化ê方式，暫時ê形式，chit-ê形式做基礎，最少人若beh發展文字化，新ê文學也好、科學也好，攏下凍ùi chia來發展；koh來著是學術研究方面，學術研究對社會ê影響是khah少，但是伊是一ê té-tì。

我tiāⁿ-tiāⁿ teh想chit-ê問題，將來台灣通用語是beh按怎？用啥麼腔口？是beh隨在人去講，按呢文字beh按怎配合語言？以台北來講，台北地區ê腔口mā chē，chit- má你beh教啥麼腔？這是一ê問題，你chia ê物件若無，隨在你去標，南部ê人去編台北ê教材，台北ê人去編南部ê教材，台語ê腔口攏hō͘你統一了了，所以你若beh做chit所在ê教材，你mā是愛調查腔口，準做需要一ê統一ê腔口，koh khah愛調查，若無，若無將來台灣ê國語是beh用toh一款？台北講我台北尚標準，台中講我tī中央tú á好，高雄講，洪惟仁講這是優勢腔，台南人講我這是古城……我ê研究，目前是iá koh看bōe出效果，但是將來效果chiaⁿ大。

卵：老師你這是拍肥底ê工作，m̄-koh真chē創作者是半路出師ê，按政治面、按toh一面插入來ê，真正teh使用文字ê人，顛倒對這無teh關心。

洪：所以tiāⁿ-tiāⁿ teh批評，chit-má teh做台語運動ê人，寫ê比讀ê koh khah chē，按呢真m̄好mà，台灣話hòⁿ，一定愛互相觀摩。一ê語言，台灣話kap福建閩南語，差chiaⁿ chē，台灣話tī日本時代進前，福佬話是chiok興ê，台灣話ê詞彙chiok chē ê，所以台灣人語言ê程度比福建人khah好。台灣話是teh行優勢腔ê路線一直teh統一，詞彙傌是仝款，這chiok豐富ê，台灣本身內底mā是koh有差別，去做方言調查著會知影，海kîⁿ ê人m̄知山頂ê話，山頂ê人m̄知海kîⁿ ê話，因為台灣話是一種生活語言，但是中文無仝款a，台灣ê華語m̄是生活語言niâ，伊ê書面語包括稿今南北，伊ê詞彙也好、文法也好，是融合性ê，台灣話ê融合性干taⁿ融合漳泉niâ，但是咱家己本身ê生活用語，老ê講老ê，少年ê講少年ê，山頂人講山頂人ê，海kîⁿ仔人講海kîⁿ仔人ê，互相之間無交流，做一ê台灣人智識份子，你ê生活用bōe著e5ma7愛學，我雖然無teh用，但是海kîⁿ仔人講「牽ko͘」，你mā愛知牽ko͘是啥。

像山ê，山崙仔，啥麼叫崙仔，咱台灣話干taⁿ山ê講法著有幾lō種，若khah細ê號做墩仔，…hit款物件是bōe變化ê，咱台灣人詞彙chiok豐富ê，但是mā干taⁿ chit角勢ê人知影，像講水chhiâng，chiok chē人聽無，咱後擺教育是beh按怎教？beh教普瀑布iá是水chhiâng？應該教水chhiâng，a有人講水chhiâng chhe，你tòa ê所在若無水chhiâng，你tō m̄知影水chhiâng是啥麼，你做一ê台灣ê智識份子bōe使按呢，台灣各地ê詞彙，應該攏愛變做台灣話ê一ê成份，chiah會豐富，新ê文化，隨時來咱著隨時吸收，這語言chiah有性命，咱台灣人以前著是按呢，日本來，lajio，chia ê新名詞著入來a，mā無去排斥，你來看台日大辭典所收ê語詞chiah chē，九萬ê詞，扣掉方言ê差別mā有七、八萬，這攏生活語言ne，he m̄是書面語言，這無簡單ne，hia ê語言，老輩差不多攏會曉講，有ê是文化9變遷ê問題，但是古早有水chhiâng chit-má mā有水chhiâng a！物件原在有，a名叫bōe出來，這著bōe使。