《雙文開講》

| | | 轉寄

聖誕禮拜2005--基督降生tī殘忍ê世界

之一

當救主耶穌誕生ê時,有chē-chē老母ê哭聲。Tī伯利恆,一群婦人人大聲哀哭,因為伊ê kiáⁿ兒hō͘希律ê兵丁thâi死lah。

救主耶穌出世,chit-ê新ê君王出世ê消息,不但(m̄-nā)感動幾位了解天文ê智慧人,由遠遠ê東方行向朝聖ê路途,chit-ê消息mā驚動當政者。救主出世ê消息傳出去,人民ê內心開始有希望,總是,一個暴力ê統治者想beh將埋藏tī民間ê希望來消滅。

Chit位將來ê君王只不過是一個平凡ê嬰á,出世tī平民ê家,暴君所得tio̍h唯一ê資料就是:chit-ê gín-á出世tī伯利恆。所以希律就派兵丁去將所有伯利恆ê兩歲以内gín-á thâi死。

Chiah-nih殘忍ê代誌,hō͘咱驚惶,咱真oh去想像hit-ê情景,咱mā時常掩面,刁工忽略chit幕情景。

文藝復興時代ê畫圖家Pieter Bruegel bat將chit幕ê情景搬到伊所tòa ê法蘭德斯ê鄉村,畫出tī落雪ê山城,穿鐵甲ê兵丁衝入厝內,威脅人。In 拔劍出來,將嬰á tùi老母ê手中強奪過來,用劍tu̍h死。畫家m̄-nā teh紀念伯利恆受thâi ê gín-á,伊同時teh紀念ti伊ê時代,爭取自由獨立ê荷蘭人民受tio̍h帝國ê西班牙軍隊無情ê鎮壓ê故事。

細漢gín-á、幼嬰,手內未bat kia̍h任何武器,嘴內mā無出半句怨言,就tī充滿衝突ê世界,受tio̍h有權勢ê政權ê殺害。這是救主耶穌所出生ê世界!這是羅馬帝國時代ê殖民地ê生活現實,是Pieter Bruegel 所生存ê十六世紀荷蘭ê現實,是台灣原住民tī 1930所經驗到ê霧社事件ê現實,是台灣人tī二二八以後所經歷ê,hō͘人驚惶、悲傷ê現實。主耶穌降生tī一個殘忍ê世界,降生tī你我所生存ê世界。

每一冬聖誕節ê時,咱時常會用快樂ê心情,享受溫暖kap和平,疼痛kap歡喜。總是teh慶祝新生命開始ê時,馬太福音ê作者為咱記載一個殘忍ê故事,hō͘咱聽tio̍h伯利恆眾老母ê哭聲,hō͘咱體會tio̍h,chit-ê拯救ê希望是包含jōa-chē ê血kap目屎,伊起頭是hiah-nih無力,hiah-nih受tio̍h烏暗勢力ê包圍。 總是,奇妙ê光星,有一日會衝破烏暗暝。顏信星牧師有作詩來講起chit-ê隱密ê希望:

遙遠ê東方 神話ê搖床,偌多ê故事 倒tī搖床無人問 奇妙ê光星 衝破烏暗冥,撥雲來見日 傳說中ê傳說 今出世


之二
小漢主耶穌,chit-ê無反抗能力ê幼嬰,tī殘忍ê大屠殺以前,就hō͘父母帶到埃及去逃避災禍。出世無jōa久就開始逃亡ê嬰á,伊親像被賣去埃及ê以色列祖先約瑟,tī艱難困苦,失落故鄉ê狀態中,靜靜等待上帝所預辦ê時刻。

咱ê心為tio̍h伯利恆遭難ê gín-á憂傷,為chit-ê殘忍ê世界擘腹(peh-pak=痛心疾首)。總是,主耶穌ê活命猶原tī chia,有一條充滿希望ê小小生命得tio̍h保全,祂beh長大,成為萬邦ê希望,帶來救贖ê信息。祂是一個無siâng款ê君王,祂安慰憂悶ê心,作和平ê使者,hō͘跟隨祂ê人tī chit-ê殘忍ê世界堅持義kap愛ê道路。伊講:「為tio̍h義受窘逐ê人有福氣,因為天國是in ê。」 因為án-ni,雖然和平世界猶原iáu未臨到,歷史已經出現轉機。