《雙文開講》

 | | | 轉寄

克拉蘆比故事(Das Bombardement der Stadt Kralupy)　簡介

作者 王貞文 2006.02.12

簡介：捷克詩人塞翡特(Jaroslav Seifert)，1901年tī布拉格出世。伊出身散赤ê工人家庭，真早就加入共產黨。二十年代末期退出共產黨，總是一直保持社會主義立場。1968年「布拉格ê春天」受蘇聯鎮壓，塞翡特利用伊ê知名度kap影響力，為真chē受迫害ê作家出力，自己soah mā因為án-ne，被禁止發表作品。一直到1979年，伊tī hit-ê風雲時代所寫ê詩chiah thang出版。

塞翡特高中讀無了，就開始tī報社工作。二○年代，伊kap一kóa少年詩人成立前衛詩社，受「達達主義」影響。伊試過真chē無siâng款ê風格，由傳統ê十四行詩(商籟)､敘事詩､到現代實驗性真強ê作品lóng有，文字鍛鍊到金金金。六○年代末期，伊ê詩風突變，用真簡單、樸素、淺白ê文字，來寫出生命無窮ê變化。

1984年，塞翡特得tio̍h諾貝爾文學獎，chit位tī捷克受群眾愛戴kap受同行敬 重ê老人，因為án-ne來受tio̍h國際文壇注意。伊tī 1986年過身去。

譯三首伊ê詩了後，我選擇伊ê「克拉蘆比故事」(Das Bombardement der Stadt Kralupy)系列來譯。

「克拉蘆比故事」總共有七首詩，是詩人tī 83歲高齡ê時，回憶少年時代ê溫暖作品。克拉蘆比今á日已經併入去布拉格大都會，tī二十世紀初，是親像台北新莊阿á hit款工業鎮。塞翡特ê媽媽是克拉蘆比人，少年時代伊若放假，就kap媽媽tńg去外家，所以對伊來講，克拉蘆比是重要ê故鄉，是一蕊「hō͘煤煙廢氣包圍ê玫瑰」。

克拉蘆比因為有化學工廠，tī二次世界大戰末期，受tio̍h盟軍摧毀性ê轟炸，隔年koh受大水蹧踏。詩人回憶酸鹹甜苦往事，hō͘咱mā ē-thang tòe伊神遊，bē厭倦。這是伊詩筆厲害ê所在，mā是伊人格可愛ê所在。有chē-chē情景，應該像tī台灣ê少年mā會經驗tio̍h oh。

我iáu是tùi德譯本來譯，一kóa用字用詞，請大家tàu相kāng來改。