《陳雷文選》

| | | 轉寄

抗爭者

這個龜怪ê抗爭到底tiâng時起勢(sì),真pháiⁿ確定。有人講,in水a年初破病hit時開始。有人講m̄是,3月19日阿扁a hō͘人tōaⁿ槍開始ê。Hit chām媒體chhiāng-chhiāng滾,mā有人賴講是電視看了siuⁿ chē。不過終其尾來,大家攏真知,花a成實有siáu。Ah無,thái會三巡告去到最高法院,攏判thâi人無罪。

有影水a病了真雄狂,醫生診斷是血癌,白血病急性ê。頭á尾2個月tō無醫,無彩才20 thóng niā-niā,連某tō猶未赴娶。花a上蓋kiáⁿ甘,孤孤水a一個。入院hit chām,ta̍k日紅豆á 79粒、烏豆á 49粒,一粒一粒算kah準準,kûn hō͘爛爛,kōaⁿ去病院,講是hō͘水a食來治癌。Che秘方mā是電視看來ê,肝癌、大腸癌、子宮癌…ta̍k項攏有效。水a過身了,原在ta̍k日紅豆á 79粒、烏豆á 49粒,kōaⁿ leh去病院kho̍k-kho̍k se̍h,人笑講是去心所願ê。阿才看伊早暗街á路ta̍uh-ta̍uh行,心狂火熱,bē輸厝裡tio̍h賊偷,金條phàng見去,路裡遇著tō kā勸:「花a,恁水a taⁿ to去a,咱作人若有敬hit個神,盡hit個情,講hit個理,ah tō攏總猶tī chia。」雙手tah心肝窟á hō͘伊看。阿才kap花a tòa仝chōa街á,tī路口三角窗賣肉丸。一日200粒,半晡賣了tō收擔無賣。Chhun ê時間去公園作義工,剪樹á整理花,去學校顧gín-á過車路。有人客問:「才a,你肉丸好食,thái m̄加賣kóa?」阿才應:「愛錢一四界有,beh thái thàn會了?按呢有夠用tō好。」有人客bē諒解,kha-chiah後keng-thé伊,錢thàn siuⁿ -chē-a-lah,你m̄知nih?Chit-má賣肉丸ê比開百貨公司khah好空。Taⁿ花a聽阿才勸,作人tō是講一個理,盡一個情,敬hit個神,也tòe伊tah心肝窟,gī-gī笑,細聲kā阿才偷nauh一句:「阮水a驚注射,走去bih…」。Tō是為著這句話,規個代誌攏惹惹來。

3月19 hit下晡,阿扁a tī台南掃街路hō͘人tōaⁿ槍。佳哉天公保庇,槍子一粒chhê過,連pak肚皮tō pōng無thàng過,hiahN一個青驚niā-tiāⁿ。隔轉日,大家投票選總統,阿扁a當選,民進黨贏,國民黨輸,ah來tō花bē直a。連ê起屁面,電視頂siak-tiō大受氣,現場hoah講:「我宣佈陳水扁當選無效。」成實ê,beh講這句話也無先請教選舉委員會。照伊ê意思,這個選舉若m̄是伊tiâu,tō攏總無算,ài koh重選。電視頂主持叩應hit個李討,mā是真受氣,假憤慨,講che規齣攏假-pâu ê,阿扁a作秀,家己去叫人來tōaⁿ ê。Ah無,大家想tō知,thái會真正tōaⁿ kah hiah準hiah真,tú-tú好pak肚皮薄thi-thi-a chhê過去。另外hit個叩應小大妹陳阿西,伊kap幾個黨主席攏真bā,特別有交陪相好。因為伊gâu社交,奶á bē細粒,人mā真開放,講查某人ê奶是上好ê社交工具。Mā是替連ê真不平,講攏是民進黨設計ê,上奸tō是阿扁a這個苦肉計,用來騙純情ê台灣人ê同情票。若無這款lah-sap步,阿扁--a絕對無可能嬴,國民黨絕對無可能輸。恁看,投票前民調,連宋嬴幾lōa十萬票,ná有可能顛倒輸2萬票?!M̄是偷作票tō是算m̄ tio̍h票,ài koh全部驗票重算。Kap連ê仝款,伊宣佈阿扁a當選無效,mā是真僥倖,beh講這句話也無先請教選舉委員會。

這chām媒體鬧kah chhiāng-chhiāng滾。花a ta̍k日看電視,聽李ê、陳ê叩應,soah學in ê步數,mā會曉抗爭。凡是抗爭,罵khah大聲、罵lú pháiⁿ聽tō是 tio̍h;起khah屁面、變khah pháiⁿ面tō是贏。

Tō是tī這款亂糟糟,花sà-sà ê中間,突然去想著in水a,kap阿扁a pōng槍仝款,明明是人設計ê。Ah無,20 thóng歲á,人好好勇kah若牛,thái 會無代無誌tio̍h血癌?!電視ná看,lú想lú鬱卒,soah kap連ê總統選無tio̍h ê心情仝款,gêng心結規丸,有卵核ê m̄認輸,開始抗爭。隨tō拍電話去電視台叩應,電話線無êng,拍bē入去。Tú好李討tī電視頂講話,叫立委ài去病院查病歷,驗傷。隔轉日,花a去仁愛病院,beh去問醫生,查病歷。病院ê公關看伊花花蕃蕃,講話kap電視內面李ê、陳ê叩應差不多,想講頭殼有têng-tâⁿ,chhìn-chhái應一句『不知道』,好禮請伊出去,無人beh chhap伊。

Koh來一時想無步,m̄知beh按怎抗爭。Tú好這日好天,有人tī總統府頭前遊行抗議。宋ê tī電視頂,烏綠肉、生sian面,心情kap連ê仝款,mā是gêng心結規丸,有卵核ê m̄認輸,叫大家『堅持真理!抗爭到底!』koh有一kóa人gia̍h旗á、gia̍h牌á teh行teh hoah,『還我真相!』『當選無效!』『打倒賣國賊陳水扁!』花a認著hit字「水」字大大字,想著in kiáⁿ水a,一個心gêng去到阿里山頂尾!透中晝坐捷運去總統府頭前凱達格蘭道,tòe人行,tòe人hoah。一晡行了腳酸,hoah了嘴ta,kap人路邊坐。Liâm-mi一隻烏頭á車來到位,大家hoah:「主席萬歲!」這個宋ê,可憐烏綠肉、生sian面tō是gêng了過度,choāiⁿ著筋路。Kap大家at手,講:『大家辛苦了!』坐落來,巾á the̍h來pa̍k頭殼hia̍h,烏墨寫大字:『團結一致,絕食到底!』記者相爭hip相。坐無10分鐘kha-chhng痛,peh起來,kā大家鼓勵:『堅持到底!絕食到底!』,坐車tō走。按呢靜坐絕食10分鐘 ,花a pak肚iau,看人teh領便當,mā分一個來食。Hit時oàn晡,雄雄天烏陰反冷,袋á內jîm一頂帽á來tì,kap人認真行、大聲hoah。有注意著邊á ê人攏teh kā看,歡喜hoah lú大聲。雄雄二個查甫惡死死對面衝--來,出手來chang伊ê帽。另外一個giah牌á『打倒賣國賊』,se̍h倒頭ùi hia̍h á tō。四邊ê人看有人出手,圍óa來鬥拍、鬥踢,he帽á相爭giú,『他媽的』cho̍h tòa土腳直直chàm,bē輸in tau tio̍h火燒厝。夭壽,tō是一頂古錐ê阿扁帽,前a競選造勢,阿才送伊ê。成實gām-gām m̄知死,the̍h來總統府頭前tì!雙手頭殼mo͘h leh,目睭kheh-kheh據在人修理,hīⁿ-á內聽人hoah『揍死他!』『揍死他!』,才知影thang驚,拚死chông,佳哉走有lī,差一sut á險險拍無死。作一梱chông來到一chōa小路,看無人jiok來才停腳。Ná喘ná想,taⁿ mā m̄知影是按怎今á日hō͘人拍,概成mā是為著抗爭,一時心內加減歡喜滿意,相手gia̍h koân hoah:「Hō͘死!…hō͘死!…民進黨拍hō͘死!…」

規身軀腳也痛、手也痛,轉來到巷á口,遇著阿才sak一隻gín-á車,lu in後生出來teh散步。阿才看伊雄狂無看路,衫褲拆一koe̍h,頭毛散iā-iā,面á 一tah青一tah烏,問伊:「你是去tó位創啥?舞kah規身軀bē輸狗gè ê!」花--a hoah:「Hō͘死!…hō͘死!…」一手kā阿才giú leh,細聲講:「民進黨ê攏拍hō͘死!。」Taⁿ koh是選舉tōaⁿ槍ê代誌,阿才好嘴kā勸:「花a,你這粒頭殼,m̄是生出來súi-súi chhāi chia好看ê,mā是ài小用leh,m̄-thang聽人講啥tō信啥。你也kā想看māi,che tōaⁿ槍ê代誌hō͘你會設計得?槍子敢成實有目睭會聽話?」可惡a,這個阿才賣肉丸早tō是阿扁a換帖ê,民進黨死忠ê。阮水a hō͘ in害chiah慘,…猶teh講chia ê有ê無ê!

也是注定beh出代誌。Hit個阿敏,2歲gín-á坐tī車內底,注死手裡gia̍h一枝民進黨ê旗á,ia̍t來ia̍t去teh chhit-thô,koh m̄知死teh kā笑。Taⁿ這聲火藥爆炸tō pòng a!雄雄面頭前這個gín-á,魔siûⁿ á青燎面,尖頭二叉角,目眉鬼á火,目睭gîn-ò͘ⁿ-ò͘ⁿ teh kā chîn 。花a大聲hiu,siáu狗母teh pūi :「你lah!…tō是你!…你這個死鬼á!…」使恁pâ chhîⁿ…óa來,開大嘴beh kā咬。可憐這個阿敏a,2歲gín-á m̄知天khah koân地khah kē,hō͘伊háⁿ一下hiahN著驚,mâ一下大聲háu。街á路ê流浪狗êng-êng無代誌ùi hia過,聽著人teh hiu,bē輸siáu狗母吹狗螺,攏圍óa來。花a驚狗,oa̍t一個kha-chhng緊tō走。

青青cho̍h-cho̍h chông轉來到厝,tǹg tòa椅á柴柴坐,gōng-gōng siòng hit台電視,四四角烏烏,若佛á chhāi tī壁角無人拜。伸手beh去kā choān來看,猶未摸著,he電視soah大聲teh講話:「伊lah!…伊害ê lah!…攏是這個死鬼á!…」概成李ê ê聲,也概成陳ê ê聲,趕緊跪落去拜,感謝神明kā伊通知。過來he電視定定kā伊講話,叫伊注意,有聽he聲,無看著影。有時李ê、 陳ê聲 ,有時連ê、宋ê聲。「伊lah!…tō是伊lah!…」日時暗時,聽kah心狂火熱,ta心peh pak,bē食bē睏。規日厝內kho̍k-kho̍k se̍h,khiā也khiā bē在,坐也坐bē定。Hīⁿ-á內ki-ki叫,李ê、陳ê、連ê、宋ê攏teh hoah,叫伊緊去救,…去救in水a,…ah無tō bē赴a,…。青狂chông入去灶腳,桌頂大枝菜刀切肉利利,gia̍h leh tō走。來到巷á口,又koh注死m̄死,對對碰著阿才,sak in kiáⁿ 出來teh散步。夭壽a,又koh魔siûⁿ á青燎面,鬼á頭二叉角,手裡一枝旗á直直ia̍t。二步chhîⁿ óa去,菜刀gia̍h起來無看tō phut,「…tō是你!…tō是你!…攏是你這個死鬼á!…」一刀phut頭殼,一刀to̍k ām-kún,一刀斬手骨,…「thâi hō͘你死!…thâi hō͘你死!…」一刀續一刀,親像路邊賣鵝肉ê火a無êng teh tok鵝。He血若水道頭,一直phū一直chōaⁿ,也是紅ê也是赤ê,m̄是生tō是死。…

可憐這個阿才,hiahN一下青驚膽破去,gāng-gāng chhāi tī hia,嘴á開hāⁿ-hāⁿ,chhun半兩身魂攏ùi hia飛出去。雄雄聽人hoah:「…thâi hō͘死!…thâi hō͘死!…」身魂才倒轉來。看見大刀phut來,無管死活,規個人車作前去,掛人掛刀ián tī土腳。Ná知he花a siáu人siáu力,翻一下身隨koh liòng起來,一枝菜刀血tin-tin,ná舞ná hoah:「水a,我來a!…阿母來救你…」

尾a大家攏知影,花a確實有siáu。Ah無,thái會三巡告去到最高法院,mā是判thâi死人無罪?Tī法庭,kap電視叩應仝款,花a有堅持,起pháiⁿ面雄死一直罵人:「…hō͘死!…thâi hō͘死!… 」唸一大堆電視內面神明kā伊講ê話。結局這個龜怪 ê凶殺案,最高法院判thâi死人無罪。關於電視媒體ê影響,是m̄是有考慮在內,che咱外面人m̄知影。總是這chām,pōng槍了幾lōa個月a,媒體猶真鬧熱,連ê、宋ê攏真堅持,阿扁a當選無效。凡是選舉委員會、法院判決ê,攏總無kah意、無算。Tī這個抗爭ê社會,ham報電視仝款,烏白講、講白賊人會信,hoah khah 大聲、罵khah pháiⁿ 聽tō是tio̍h,變khah pháiⁿ 面、起khah屁面tō是嬴。這步in攏真內行。Chit-má猶真chē人認真看電視,將來若是連ê、宋ê koh再落選,抑是其他khah堅持ê立委選無tiâu,mā可能會koh再發展作某一種龜怪ê抗爭?所以我先kā這件不幸ê凶殺案詳細寫起來,hō͘大家參考。

這chām阿才有koh轉去賣肉丸,未曾半晡一百粒賣了,tō收擔無賣。人客勸伊,才a,你ê肉丸好食,thái lú賣lú少,m̄加賣kóa?應講,愛錢四界有,thàn bē了lah,按呢有夠用tō好。Mā是有去公園剪樹á整理花,學校顧gín-á過車路。有人客bē諒解伊,講你m̄知nih?chit-má賣肉丸ê比開百貨公司khah好空。m̄-kú in某春喜a,攏生理作了,收擔tō bih tī厝內底,beh成冬a,無出來kap人交chhap。有人替伊煩惱,按呢bih tī厝內,電視若看siuⁿ chē,可能oan-nā m̄是真好ê代誌。