《陳雷文選》

| | || 轉寄

講著這個『拍』,有大拍、小拍,有用chhôe-á拍、chhìn-chhái用手拍,有罕罕一時á拍,有三不五時拍,----種種無仝款ê拍法。若是阮厝邊hit個阿惠,大家攏知影,大拍小拍,不管時teh拍,tō是按呢真正食力lah。

阿惠嫁來beh二冬,頭a hit個月無拍,用罵ê niā-niā。過來差不多ta̍k禮拜拍,有時拍二、三擺。代先是按怎拍起勢(khí-sì) ê,大概無人知影,連阿惠家己mā bē記得。量情(liōng-chêng)是hit時阿惠tú嫁來無外久,ta̍k項生(chheⁿ)手,he鵝á大隻sa̍h bē好勢ê關係。Taⁿ in翁勇a tī三角窗賣鵝肉也五、六冬a,he阿勇鵝肉chíⁿ koh nńg,chhiⁿ koh幼,咱chia人人o-ló,上蓋時行。Tō是阿惠嫁來了後,大隻鵝伊teh sa̍h,問題出tī chia。有熟悉人客kā勇a講:「你che鵝肉chit-má有khah老。」勇a上驚人嫌伊ê肉,應講:「敢有影?A̍h tō仝款hia ê鵝。」Tiām-tiām liàm一tè來哺,ai-ioh,成實tēng kah若雞母肉,半pak火lún leh,轉來厝掠in某tō罵:「使恁né!連一個鵝肉bē曉sa̍h!----」阿惠驚勇a惡,無應伊。又koh罵:「幹!讀國中ê有khah choa̍h!----」有人講,tō是勇a家己無讀冊,怨度in某讀國中,刁治故beh kā伊phih-siùⁿ凌治。Che我看也無tú-tú是。不過阿惠雖然有讀國中,pō͘-pīⁿ tī厝裡m̄-bat sa̍h雞煮鴨,灶腳ê代誌khah han-bān是有影。所以家己知影,tiām-tiām無應聲,據在勇--a hat,罵pháiⁿ嘴。

僥倖過來人客kā勇a講:「你ê鵝taⁿ也sa̍h無熟。」勇a應:「Ná有影!A̍h to仝hia ê火teh sa̍h。」Kā看,成實he肉紅hóaⁿ紅hóaⁿ,血水sa̍h無透!Taⁿ piàng a,一pak火放leh to̍h,轉來 厝入門tō罵:「使恁né!Kap恁pē tèⁿ死tèⁿ活----」一tè鵝肉tō kā khian去。「叫你mài sa̍h老,你tō kā sa̍h hō͘無熟!----」tú-tú he肉khian著阿惠ê面。阿惠m̄敢應聲,也m̄敢走,khiā hia據在伊tìm。等候伊tìm soah,頭chhih-chhih,ku落去khioh鵝肉,嘴內才細聲應講:「明á chài sa̍h khah熟。」勇a半khaⁿ鵝肉khian了,一pak火猶未消,聽伊應話,chhîⁿ來出手tō pa。Siàn一下阿惠phiāng tī土腳,鵝肉chhia規身軀。「明á chài!明á chài!人客走了了--」鵝肉sa來對阿惠ê嘴直直chiⁿ:「你會tèⁿ siáu!Kā恁pē食看māi----」

這個以後,tō用拍ê,無用罵ê。有時小拍,有時大拍,有時有代誌拍,有時無代誌也拍。勇a拍了chiâu勻順手,阿惠mā hông拍慣勢去。不而過有時拍了厲害,人實在艱苦bē堪得,tō走轉去chhōe老母chiù慘。老母講:「khah忍leh。查甫人攏按呢lah。」看查某kiáⁿ hia̍h-á一bong青一bong紅,一lûi phòng一lûi nah,心內m̄甘,罵:「你thài chiah gōng?人若拍,m̄ tio̍h頭殼顧leh,腳手hō͘伊拍。」A̍h tō雙手mo͘h頭殼,身軀áu一球,學hō͘查某kiáⁿ看,kā伊教。Che阿惠,chēng細漢老母hō͘老pē拍,也m̄是m̄-bat看過。代先關tī房間內底拍,阿惠kap阿姊看bē著,聽老母tī房間內大聲哀,叫m̄敢。二人tī房間外kan-na會曉驚,tòe人哀,mè-mè-khàu。

Hit日拍kah房間門lòng破,才看著老母teh hō͘人拍,拍kah衫拆拆破。He好a雙手頭殼mo͘h leh,身軀kiu作一球,跪tī土腳叫m̄敢----。阿惠kap阿姊óa去衛老母,順續食拍。過來見若老pē拍人,房間門m̄免關,阿惠kap阿麗m̄敢óa去衛,也m̄敢tī hia khàu,攏走去bih。二個姊妹á lám作一伙,學老母頭殼mo͘h leh驚。

阿惠聽老母吩咐,「頭殼顧leh,身軀據在伊拍。」結果拍kah腳手烏青結血,出門穿長褲,長ńg衫,掩leh無人看。一回手tê á拍折去,一手腫歪歪。隔壁陳太太看著,問伊啥代誌。阿惠chhìn-chhái應:「Poa̍h倒lòng著。」陳太太伊tī國中teh教冊,目睭lāi,這款拍某ê代誌也m̄是m̄-bat,雞婆tō kā伊講:「你知影,chit-má查甫人拍某,若是去報警察,法律會制裁。」阿惠聽講報警察,驚一tiô,緊應:「M̄通報!M̄通報!若去報,我會hō͘拍死。」陳太太替伊不平,講:「恁勇a é koh so͘腰,sán猴兼無尾,比你khah細漢,你是teh驚啥?!Chit-má若koh拍,作你kap伊hut!我chhōa你去學空手道。」阿惠a驚,講:「你tō m̄知影伊外惡leh。」「外惡?!Soah bē kā惡倒轉去!」阿惠a搖頭:「伊若mài kā咱拍tō好a,咱koh beh拍伊!」想想leh,問陳太太:「恁翁若拍你,你敢攏有teh回手?」陳太太起愛笑:「阮翁拍我?!To m̄是kā in公a借膽ko̍h。」阿惠才知影,世間也有人in翁m̄-bat拍某ê,也有人in某m̄免hō͘翁拍ê。

Taⁿ咱講翁á某冤家,kiáⁿ mā是ài bóng 生。阿惠有身了後,煩惱pak肚內嬰á會拍傷著,轉去問老母。老母教伊:「Khah早阿母有恁ê時,pak肚hâ巾á,衫褲攏穿雙iân。」Koh再講:「你厝裡若是有棍á、chhôe-á,攏kā收收起來。」阿惠轉去厝,衫褲雙iân穿kāu-kāu,pak肚tîⁿ圍巾á。厝--裡棍á、chhôe-á攏藏起來。又koh驚勇a beh拍臨時sa無物,烏白hut,另外chhoân一枝草pīⁿ ê掃手頭,khǹg tòa壁邊通hō͘伊用。按呢準備好勢,koh bē放心,去請教對面張太太,問伊:「你有身ê時,穿按呢敢有夠?」張太太無瞭解阿惠ê意思,笑講:「Ai-ioh,你成實m̄-bat生過kiáⁿ!按呢會熱死lah。」摸伊ê pak肚講:「Che嬰á tī pak肚內燒hut-hut,bē去冷著lah。」才知影張太 太有身ê時無hâ圍巾á,也無穿kāu衫,in翁m̄-bat kā拍。 半信m̄信,厝邊隔壁ta̍k個太太攏去探聽,結果攏無人穿kāu衫,hâ巾á,咱chia四kho͘ liàn轉tō是kan-na伊一個。這時才明白知轉(chai-tńg),m̄是像老母講ê『查甫人攏按呢。』明明阿母kā伊教m̄-tio̍h。Lú想lú m̄願。Hit日勇a koh拍人,阿惠勇敢走,轉去chhōe老母,kā老母講:「我m̄轉去a。」老母勸伊:「咱查某人為著kiáⁿ,khah lún leh。查甫人攏按呢lah。」阿惠雄雄明白,心內叫:「阿母a,你tō是teh講你家己,為著阮姊妹á lún一世人。」

勇a等阿惠無轉去,放tiau若koh m̄轉來,tō beh拍hō͘死。過來háⁿ bē行,用姑成ê,chiù-chōa m̄ koh拍人,若koh拍,雷公kòng hō͘死。阿惠bē堪得老母苦勸、勇a姑成,包袱á款leh koh轉去。

成實無拍也無罵,平安成禮拜。Hit日暗勇a lim酒,bē記得『雷公kòng hō͘死』,mā是koh拍人,拳頭母cheng kah鼻á歪哥嘴chhi̍h-chhoah。阿惠透暝走,老母koh kā勸:「查甫人lim酒pháiⁿ性癖,攏會lah。」這回阿惠下決心,據在老母姑成也m̄轉去,kā老母講:「我若生一個查某kiáⁿ,koh學像我按呢慣勢hō͘人拍,a̍h tō害。」拜託作老師ê陳太太鬥相仝,去法院告離緣。成半冬過了,勇a têng koh chhōa,tō是咱菜市á hit個『大pù-a』,聽講是死翁ê。這個大pù-a人大仙,生作kau-chhiâng koh粗phoh,真是大丈夫氣概。若是khiā tī豬tiam斬骨tok豬肉,bē輸賀伯風颱掃過海,連查甫人mā閃伊。勇a tō是chhōa這款ê pù-a。Taⁿ也tio̍h暗時賣鵝,早時菜市á鬥tok肉,ná有pù-a hit個扮!所以不時hō͘人罵hō͘人嚷。He大pù-a手裡一枝thâi豬á刀,pin-pin piàng-piàng斬豬tok肉,勇a ná敢應一聲,頭chhîⁿ-chhîⁿ據在伊hat。所以終歸hit日勇a hō͘人拍,無人想意外,攏講:「知知leh lah。」厝邊頭尾大家攏有看著,勇a ùi厝內chông出來,巷á底一領褲làu-làu直直走。大pù-a手裡gia̍h一枝掃手頭tī後面jiok,ná嚷:「---M̄信恁pē kòng你bē驚----,koh走!轉來你tō知死----」人講咱作人好事有好報,其實無tú-tú。若是講pháiⁿ事有phiáⁿ報,che我想是猶khah有實在。