《主編e5話》

| | | 轉寄

台語《荒漠甘泉》大贈送

「信望愛資訊中心,he m̄是某一個基督教大財團或機構所設立ê網站mah?」真chē人án-ne teh誤會。因為進入搜尋引擎beh chhōe有關基督教ê資料,大概行來行去無幾分鐘,就會落入去信望愛WWW集團。

信望愛全球資源網 http://www.fhl.net
台語信望愛 http://taigi.fhl.net
信望愛信仰kap聖經資源中心 http://bible.fhl.net
信望愛圖片資源中心 http://photo.fhl.net

以及其他只要見tio̍h OOOOO.fhl.net ,lóng是信望愛支持平台環境ê數十個教會機構(http://service.fhl.net/about.html)

但事實上,信望愛資訊伊m̄是大財團ê產物,反顛倒是「寡婦兩個小錢」、或「五餅二魚」所造就出來ê神蹟。本中心kui-ê一年kan-ta需要七、八十萬ê硬體kap專線費用,其他ê程式開發管理維護、網頁設計、網頁影音文字內容,全靠世界各地各行各業ê義工,奉獻其專業kap時間。十年落來,累積豐富ê基督信仰資產。

舊年年底信望愛資訊中心正式成立「財團法人信望愛資訊文化藝術基金會」,並tī今年(2006)二月25日借台北懷恩堂舉行基金會成立感恩禮拜暨網友會。但,即使成立了基金會,信望愛資訊iáu kap以前仝款,維持全義工組織,這tī教會機構中,非常罕見。

講到為何beh成立基金會?講起來網路人自由慣lah,眾義工大多無想beh成立什麼基金會來綁tiâu家己。但發展多年落來,發現有正式ê名分,比較好辦tāi-chì。Ná親像《珍本聖經數位典藏》(http://cbol.fhl.net/new/ob.html)雖然咱擁有資料庫kap數位化技術,但需要正式名分chiah ē-tàng簽約合作,chiah ē-tàng取得中文聖經ê數位刊載權。

也因為án-ne,下一波,信望愛資訊phah算kap東南亞國家ê聖經公會試探合作ê可能,推出越南文、馬來西亞文、泰國……等聖經kap中文或台語文聖經ê對照,來嘉惠tùi chiah-ê國家來ê新台灣新娘(新郎),幫助in離鄉背井也ē-tàng讀聖經。對教會做外國來ê朋友關懷事工,也有幫助。

講到,維持全義工ê組織型態,無人事經費ê包袱,咱ē-tàng全力拼事工,m̄免分心去為奉獻收入是m̄是夠用而傷腦筋。另外,網路事工kap實體機構無仝,變化siuⁿ大,一般ê教會機構微薄ê薪資,則oh得聘到chit種不斷創新、跟tòe會tio̍h時代ê人。因此,逆向思考,乾脆就直接呼籲各行各業ê兄弟姊妹,奉獻專業、奉獻時間,參與網路事工。

以下就各部門負責人義工紹介
●台語信望愛 http://taigi.fhl.net 主編: 林俊育
●信望愛BBS http://wbbs.fhl.net 大站長: 盧瑞興
●信望愛信仰kap聖經資源中心 http://bible.fhl.net CBOL計畫主持人: 蔡哲民 CBOL總校閱: 徐成德、蔡筱楓、馬倩平、梁望惠、王道仁
●信望愛福音歌仔戲 http://twop.fhl.net 負責人: 劉南芳
●信望愛全球資訊網http://www.fhl.net 義工編輯作者群,請參見 http://www.fhl.net/profile/
●信望愛財務部 http://info.fhl.net 主任兼會計: 林雅敏;出納: 文美華
●信望愛技術部主任: 蔡哲彥
●信望愛網站服務主任: 陳昭珊
●信望愛貓虎家族 http://maohoo.fhl.net(http://www.fhl.net 已先推出貓虎網路廣播專欄,網站則tī建置中)節目主持人: 游建國、劉儷

當然,名字無列tī頂面ê義工koh-khah chē。最後tī-chia呼籲,若您有感動參與網路福音事工,歡迎加入咱ê義工陣容。

另外,chia有一個特別公報:台語信望愛主編林俊育捐50本漢羅版ê《荒漠甘泉》,陳清俊長老捐50本白話字版ê《荒漠甘泉》。In指定chiah-ê書beh送hō͘奉獻本基金會金額超過3,500元ê網友,以表感謝。捐款ê時,請註明你beh ti̍h漢羅版或白話字版,以方便寄hō͘你你所beh ài ê冊。

信望愛資訊teh見證上帝「五餅二魚」ê神蹟,直到現今∼∼