《主編e5話》

| | || 轉寄

把握好機會來報揚教會羅馬字福音

九月二十九日,教育部國推會通過台灣羅馬字拼音方案,爭議多年致使台灣母語教育一直無法度進展ê Hō-ló台語拼音問題,有一個完滿ê結局。這是值得咱歡喜慶祝ê tāi-chì,但台語文運動m̄是到chia為止,應該是一個契機ê開始。

第2849期(10月2~8)ê台灣教會公報頭條新聞:「歷經五年教育部台語拼音定案─確定台灣羅馬字拼音 教會表歡迎」。可惜到taⁿ iáu未看tio̍h任何呼籲,咱長老教會tio̍h如何把握chit-ê好機會來報揚教會羅馬字ê福音。

台羅拼音方案是由教會羅馬字(通稱白話字)、台灣語言拼音方案(TLPA)kap TLPA改良式整合而成。其實眾人lóng知,TLPA有約90%是採用教會羅馬字系統,所以台羅拼音方案ē-sái講是修訂教會羅馬字,hō͘伊koh-khah接近國際音標(IPA),ē-tàng kap國際接軌。

通稱白話字ê教會羅馬字是咱信仰祖先留hō͘咱ê寶貝資產,長老教會無teh致意來保存,顛倒是教會外ê人phah拚teh推廣。目前台灣羅馬字協會會員約有95% m̄是基督徒,in是為tio̍h讀寫台語文,去hit當時由鄭兒玉牧師開ê白話字班上課。

五年前,我參加台灣羅馬字協會主辦ê「世界台語文化營」,tú-tio̍h人就展講我是長老教會ê會友。結果被人責備講:「Lín長老教會siōng無效,kan-ta一個鄭兒玉牧師,其他lóng無效!」我無受氣,我家己檢討反省了後,發見hit句話是千真萬確ê事實,我就發奮圖強來認真學白話字,將白話字文獻數位化並上網。Chiah-ê工作需要電腦工具,我就不辭勞苦四界向電腦專家請教,hō͘我ê工作進度神速,尤其是頂年四月kap信望愛網站( http://fhl.net )合作開設台語信望愛( http://taigi.fhl.net )了後,有開發真chē台語文電腦工具tī網路頂面,hō͘人免費使用。

現今是電腦ê時代,有電腦工具ê語言chiah有可能活落去。我有chit-ê理念,就kā開發好勢ê電腦工具掛起lih台語信望愛,hō͘人免費下載來使用,並四界去報揚hō͘大家知,kah-ná teh傳「台語福音」,我也感覺jú來jú有使命感。

感謝主,經過我詳細說明了後,有kóa教會機構馬上採取行動來把握chit-ê好機會。台灣神學院有安排我tī 11月初一去kap全校師生分享「台語文ê電腦使用kap資源」;11月初四boeh去總會kap白話字種子教師基礎班及台灣母語教師協會辦ê台語對外教學師資培訓班分享;koh-boeh tī 11月12日去東門教會kap會友及社區民眾分享。Ǹg望透過chiah-ê分享,將咱長老教會白話字ê福音傳hō͘社會大眾。

台灣長老教會總會助理總幹事也是教育部國語推行委員會委員ê星.歐拉姆牧師,tī台灣教會公報第2849期發表「教會永續展開羅馬拼音之優勢」,伊呼籲講:「教會kap社會之語言發展策略及長遠目標,須從長計議。」

咱長老教會tio̍h把握chit-ê好機會,積極向社會宣講「教會羅馬字→台灣羅馬字」ê福音,hō͘社會人士明白台灣長老教會tī台語文運動歷史上ê角色地位。